2 Kurintu 5:21 - Manobo Western Bukidnon

²¹ Wazà minsan hengkey he mezaat he ulaula ni Kristu, iyan, midhimu te Megbevayà he iyan sikandin midsilutan tenged te salè tew su wey pinaag̵i te kebpekidsevaha tew kandin, egkehimu he ed-isipen kiw he metazeng te Megbevayà.

2 Kurintu 5:21 Кръстосани препратки

Lucas 1:35

Ne midtavak haazà is belinsug̵uen te, “Is Wag̵as he Mulin-ulin, iyan ebpengelintau kayi ziyan te kenikew ne edlig-enan ka te g̵ehem te Megbevayà. Ne tenged kayi, heini is id-anak nu, pudu metazeng is menge ulaula zin ne egkengezanan sikandin he Anak te Megbevayà.

Nengeulaula 3:14

iyan, sikiyu, wazè niw mesuati sikandin is wag̵as he wazà kandin he mezaat he ulaula. Midhangyù kew he iyan libriya ni Pilatu kes teremunù he nepirisu.

Ruma 1:17

Su pinaag̵i te Meupiya he Tudtulanen ibpetuenan kenitew te Megbevayà is paag̵i wey kiw zin meisip he metazeng. Ne heini is paag̵i, ne pinaag̵i te kedtuu zà. Su zuen insurat he Lalag te Megbevayà he edhenduen te, “Is etew he nehimu he metazeng pinaag̵i te kedtuu zin, ne iyan ebeg̵ayan te untung he wazè din pidtemanan.”

Ruma 4:25

Iyan si Jesus kes midsug̵ù te Megbevayà wey mebpehimatey te silut tenged te menge kedsupak tew. Ne zutun mibanhew sikandin te Megbevayà wey mehimu he metazeng is ked-isipa kenitew te Megbevayà he iring te wazè kiw keenu mekeulaula te mezaat.

Ruma 5:19

Ne tenged te kedsupak te sevaha zà he etew nehimu is mezakel he mekesesalà, iyan, tenged daan te kebmetinumanen te sevaha zà he etew he si Jesus te ebpeveelan kandin te Megbevayà, egkehimu he ed-isipen te Megbevayà he metazeng is mezakel he menge etew.

1 Kurintu 1:30

Ne minsan pa zutun, midhimu te Megbevayà he mesevaha si Jesu Kristu wey sikitew ne midhimu zin daan he zuen ketau tew he ebpuun te ki Kristu. Ne pinaag̵i ki Kristu mid-isip kiw en he metazeng te Megbevayà ne nehimu kiw en daan he menge g̵aked te Megbevayà, ne nevelukasan kiw zin te kegkeuripen tew te mezaat he ulaula.

2 Kurintu 5:17

Ne sikan is etew he nekidsevaha en ki Kristu, beg̵u en sikandin he linimbag. Nahanew en diyà te kandin is daan he netag̵ù te isip din ne mid-ilisan en heini te veg̵u.

Gelasya 3:13

Minsan pa te nesupak te en is kesug̵uan, nelibri ki ni Jesus te silut su midrewakan en si Jesus he elili kenitew zutun te kedrensanga kandin te krus, su zuen insurat he Lalag te Megbevayà he edhenduen te, “Ke zuen etew he edhimetayan ne idtaud te impasek he kayu ne tuus heini te rawak kandin te Megbevayà.”

Ipisu 5:2

Kinahanglan he ipeehè niw layun he mahal ziyà te g̵ehinawa niw is menge zuma niw iring te mahal kiw ziyà te g̵ehinawa ni Kristu. Mibpehimatey sikandin he elili kenitew wey kiw zin melibri. Nehimu heini he pemuhat he utew mehemut, he ke và dà egkeg̵iya, utew egkesuati te Megbevayà.

Pilipus 3:9

su wey a zaan meisip te Megbevayà he metazeng tenged ki Kristu. Wazà a meisip he metazeng pinaag̵i te kediey zà he ulaula te kedtumana te kesug̵uan, su mibpeketazeng a te Megbevayà pinaag̵i te kedtuu ku ki Kristu. Heini is kebmetazeng, ne idtuvad kenita te Megbevayà emun edtuu ki ki Kristu.

Hibriyuhanen 4:15

Ne heini si Jesus is lavew he memumuhat tew, nesavut din is keg̵uyè tew tenged te kememenusiyai tew su neseg̵azan din he mibpenulayan sikandin dengan ni Setanas te minsan hengkey he paag̵i iring te ebpenulayan kiw zaan, iyan, wazà mulà sikandin mepenulayi.

Hibriyuhanen 7:26

Iyan si Jesus lavew he memumuhat he egkinehenglanen tew su wazà igkesewayi te menge ulaula zin, wazè din salà, ne wazè din sayep. Ne kenà sikandin iring te menge mekesesalà he menusiyà, ne midhimu sikandin te Megbevayà he lavew te minsan hentei ziyà te langit.

1 Pedro 3:18

Kesevaha zà is kebpehimatey ni Kristu wey mepesaylu is menge salè tew. Mibpehimatey su wey mehimu sikandin is metazeng he elili tew te kenà memetazeng wey kiw mehimu he menge g̵aked te Megbevayà. Nepatey is lawa zin, iyan, nevanhew sikandin

1 Juan 3:5

Netuenan niw en he umba mibpeetew si Kristu su wey zin maawà is menge salè tew. Ne netuenan niw zaan he wazà minsan sevaha he salà he nehimu zin wey egkehimu zin.