2 Kurintu 5:15 - Manobo Western Bukidnon

¹⁵ Minatey sikandin he elili te tivuuk he menusiyà su wey sikandan is menge etew he uuyag pa, kenè dan en maan med-ulaula te kandan he egkesuatan, kekenà, med-tuman dan en te egkesuatan ni Kristu he iyan midhimetayan wey nevanhew su wey melibri sikandan te silut.

2 Kurintu 5:15 Кръстосани препратки

Lucas 1:74

su impenaad din he sikitew is menge kevuwazan ni Abraham, edlibriyen kiw zin wey kiw kenà mezaag te menge kuntada tew ne zutun kenè kiw egkengehandek is ed-ulaula te egkesuatan din.

Juan 5:24

Utew venar is egkeg̵iyen ku he is minsan hentei he ebpemineg te menge lalag ku ne edtuu te Megbevayà he midsug̵ù kediey zini, iyan ebpekeangken te untung he wazà pidtemanan. Kenà sikandin keuzemà edsilutan su nekelikey en te kemetayen is gimukud din wey naangken din en is untung he wazà pidtemanan.

Juan 6:57

Is Amey ku he iyan midsug̵ù kediey, duen din untung, ne tenged dutun duen ku zaan untung. Ne iring din ded daan is egkaan kediey su ebeg̵ayan ku sikandin te untung he wazà pidtemanan.

Ruma 12:1

Na, menge suled, tenged te utew zekelà he hizu kenitew te Megbevayà, edhengyuan ku sikiyu he ipeveyveyai niw kandin is lawa niw wey g̵ehinawa niw. Iyan heini ibpemuhat he kenà edhimetayan, ne kinahanglan he wazà igkesawey zuen su wey mesuati te Megbevayà. Ne iyan heini hustu he ked-ezapa niw kandin.

Ruma 4:25

Iyan si Jesus kes midsug̵ù te Megbevayà wey mebpehimatey te silut tenged te menge kedsupak tew. Ne zutun mibanhew sikandin te Megbevayà wey mehimu he metazeng is ked-isipa kenitew te Megbevayà he iring te wazè kiw keenu mekeulaula te mezaat.

Ruma 6:2

Ne kenà heini egkehimu su kenà egkehimu he ebpeniguduwan ta te ed-ulaula is mezaat su wazè en kelavet kenita te mezaat he ulaula. Su iring ki te minatey he naawè en diyà te kandin is daan he untung din.

Ruma 6:6

Su netuenan tew he is daan he mesinupaken he kegkeetew tew, ne iring te inransang duma ki Kristu ziyà te krus su wey mebpatey. Ne tenged kayi, egkeawà is layun tew kebpekesalà ne human dutun kenè kiw en egkeuripen te ked-ulaula te mezaat.

Ruma 8:10

Iyan, emun diyà te keniyu si Kristu, minsan pa te ebpatey zed is lawa niw tenged te salà, duen niw en gihapun beg̵u he untung tenged te mid-isip kew en te Megbevayà he metazeng.

Ruma 8:2

Su pinaag̵i te kebpekidsevaha ta ki Jesu Kristu imbeg̵ey kenita te Wag̵as he Mulin-ulin is beg̵u en he untung ne tenged kayi nelibri ki en te kebpekesalè ta he iyan edungguan din is kemetayen he wazè din pidtemanan.

Ruma 8:6

Ne emun iyan ebayàbayà te isip te etew is menge mezaat he suat te lawa zin, edsilutan sikandin te kemetayen he wazè din pidtemanan. Iyan, emun iyan mulà ebayàbayà te isip din is Wag̵as he Mulin-ulin, wazà pidtemanan te untung din, ne melinew en is kedepitè dan te Megbevayà.

1 Kurintu 10:33

Siak, ebpen-ahaan ku layun is paag̵i su wey meketavang te minsan hentei is menge ulaula ku. Kenè ku iyan ebpen-ahaan is kediey he igkezeyzey, kekenà, iyan is igkezeyzey te langun he menge zuma he etew. Umba ebeelan ku heini su wey meketuu sikandan ne melibri sikandan te silut.

2 Kurintu 12:10

Ne meupiya en utew te g̵ehinawa ku is kurang ku te ketau, is kedsumpelita wey is pesipala kediey te menge etew, wey is menge kemereg̵enan wey is kemeresayan tenged te kedtuu ku ki Kristu. Su netuenan ku he emun wazè en kediey he ketau, dekelà is ibeg̵ey kediey ni Kristu he ketau.

2 Kurintu 3:6

Su iyan sikandin ebeg̵ey kenami te ketau wey zey ikepenurù is beg̵u he paag̵i he midtukud din te kebpekidsevaha zin te menusiyà. Ne wazà heini is beg̵u he paag̵i iveg̵ey pinaag̵i te insurat he kesug̵uan, kekenà, imbeg̵ey zin heini kenitew pinaag̵i te Wag̵as he Mulin-ulin. Su emun iyan ta edserig̵an is kedtumana ta te kesug̵uan, ne kemetayen he wazà pidtemanan is ebperetengen ta. Iyan, ke ibeg̵ey kenitew is Wag̵as he Mulin-ulin ne untung he wazà pidtemanan is ebperetengen ta.

2 Kurintu 5:16

Is paag̵i zey te ked-isipa te minsan hentei he etew, ne kenà iyan is paag̵i he egemiten te menge etew he wazà medtuu. Dengan, iyan heini migamit dey he paag̵i su mid-isip dey he etew zà duen si Kristu, iyan, guntaan netuenan dey he kenà etew zà duen sikandin.

Gelasya 5:25

Ne is Wag̵as he Mulin-ulin, geina te mibeg̵ayan ki zin te veg̵u en he untung, kinahanglan he ebpevayàbayè ki zaan kandin.

Ipisu 4:17

Tenged te sug̵ù a te Nengazen, ebpeketelteleenan ku sikiyu he engkezi niw en is menge mezaat he ulaula he iyan ed-ul-ulahan te menge etew he kenà edtuu te Nengazen wey wazà pulus te ed-isipen dan.

Ipisu 5:14

Ne mehitenged kayi zuen erubasa he edhenduen te, “Sikew is edlipezeng, gimerat kad; sikew is minatey, ne mevanhew kad ne egketeyawan ka ni Jesu Kristu.”

Kulusas 2:12

Ne tenged kayi inleveng kew zuma kandin dutun te kebewtismuwi keniyu, ne nevanhew kew zaan duma kandin su nekidsevaha kew kandin tenged te midtuuwan niw he mekeg̵eg̵ehem is Megbevayà. Iyan sikandin sikan is mibanhew ki Kristu.

Kulusas 3:1

Ne, menge suled, nevanhew si Kristu ne iring te nevanhew kiw zaan duma kandin su zuen tew en untung he wazè din pidtemanan. Ne tenged kayi, kinahanglan he ebpurungan ta layun ed-isipa is ibpeisip-isip kenita te Megbevayà diyà te langit he zutun edhadì si Kristu he ebpinuu ziyà te zapit te egkekewanan te Megbevayà.

Kulusas 3:17

Ne minsan hengkey he egkeg̵iyen niw wey ed-ul-ulahan niw, kinahanglan he zait heini he ulaula te sulug̵uen te Nengazen tew he si Jesus. Ne kinahanglan daan he layun dekelà is kebpeselemati niw te Amey tew he Megbevayà pinaag̵i te kebpekidsevaha niw ki Jesus.

Kulusas 3:23

Ne minsan hengkey is ebpeveelan keniyu, ne purungi niw su iyan edsusi keniyu is Nengazen ne kenà iyan dà haazà is kelibutanen he egalen niw,

1 Tiselunika 5:10

Ne minsan ke uuyag kiw pa wey ke minatey kiw en be zutun te kedlikù ni Kristu, duen tew en gihapun untung he wazà pidtemanan duma kandin su iyan heini ketezengan ke maan is mibpehimatey sikandin.

Tito 2:14

Mibpehimatey sikandin he elili kenitew wey kiw zin melibri te kebpekeulaula tew te mezaat ne wey kiw zin daan mehimu he menge g̵aked din he etew he nelumpiyuwan he utew en egkengesuat he ed-ulaula te meupiya.

1 Pedro 4:6

Sikan is menge etew he nemematey en, impesavut en kandan dengan is Meupiya he Tudtulanen he ebpuun diyà te Megbevayà su wey meveg̵ayi sikandan te untung he wazà pidtemanan minsan pa te kenè dan egkelikayan is kebpatey te lawa zan su iyan silut te Megbevayà diyà te tivuuk he menusiyà.

1 Juan 4:9

Impehendini te Megbevayà is sebsevaha zà he Anak din te kelibutan su wey pinaag̵i kandin mekeangken kiw te untung he wazà pidtemanan. Iyan haazà kebpaahaa zin te g̵ag̵ew zin kenitew.

Impezayag 1:18

Iyan a kes Megbevayà he wazè din kemetayen. Mibpehimatey a ne g̵untaan kenà ad maan ebpatey te minsan keenu. Iyan a ebayàbayà te menge minatey, ne zuen ku zaan keg̵ehem diyà te Iveyaan.