2 Kurintu 4:8 - Manobo Western Bukidnon

⁸ Layun key ebpekeag̵i te kemereg̵enan, iyan, kenà egkeawà is kedsarig dey. Henduen be te wazè dey en layun paag̵i, iyan, edsarig key g̵ihapun te tavang te Megbevayà.

2 Kurintu 4:8 Кръстосани препратки

Juan 14:18

Ne kenè ku sikiyu ed-ewaan he iring te nengeilu su edlikuan ku zed sikiyu.

1 Kurintu 10:13

Is minsan hengkey he ibpenuley kenita ni Setanas, ne kenà beg̵u su layun din en ibpenuley te menusiyà is iring dutun. Iyan, egkeserig̵an ta is Megbevayà su kenè din idtug̵ut he ebpenulayan ki te subra te egkeantus ta. Layun din ibeg̵ey kenitew is kelig-en su wey zuen paag̵i te kedlikayi ta he kenè ki mekeulaula te mezaat.

2 Kurintu 12:10

Ne meupiya en utew te g̵ehinawa ku is kurang ku te ketau, is kedsumpelita wey is pesipala kediey te menge etew, wey is menge kemereg̵enan wey is kemeresayan tenged te kedtuu ku ki Kristu. Su netuenan ku he emun wazè en kediey he ketau, dekelà is ibeg̵ey kediey ni Kristu he ketau.

2 Kurintu 6:12

Kenè iyan minus is gehinawa zey keniyu, kekenà, iyan kew minus is gehinawa niw kenami.

2 Kurintu 6:4

Ne umba ebpurungan dey is ulaula zey su wey zey ikepaahà he menge sulug̵uen key te Megbevayà te minsan hengkey he paag̵i. Ne tenged kayi ed-antus key te minsan hengkey he kemereg̵enan, kemeresayan, wey menge samuk.

2 Kurintu 7:5

Ne hein nekeuma key en dini te prubinsya he Mesidunya, wazè key g̵ihapun meewai te menge seeng dey. Su nereg̵enan key te mezakel he samuk. Mibpekidtebek kenami is menge kuntada zey ne ingkeipeng dey is menge tumutuu.

Gelasya 4:20

Angin ke ziyan a te keniyu su wey ku sikiyu melelag̵i; kenè ku egketuenan ke hengkey is meupiya he idsurat ku he ibpeuwit ku ziyan su egkeipeng a keniyu.