2 Kurintu 4:5 - Manobo Western Bukidnon

⁵ Kenà iyan dey ibpenurù su wey key mevantug te menge etew, kekenà, iyan dey ibpenurù su wey mevantug si Jesu Kristu he iyan Nengazen te langun. Sikami, edtevangan dey en sikiyu su wey zey metuman is sug̵ù ni Jesus.

2 Kurintu 4:5 Кръстосани препратки

Mateo 23:8

Kenè niw itug̵ut he iyan id-umew keniyu is ‘menunudlù’ su teltelesuled kew is langun ne sebsevaha zà is menunudlù niw he iyan a.

Mateo 3:11

Wahig is ibewtismu ku keniyu,” ke si Juan, “he tuus te mid-iniyug̵an niw is mezaat he ulaula, iyan, duen etew he ed-ilis kediey ne iyan ibewtismu zin keniyu is Wag̵as he Mulin-ulin, ne emun kenà, ne hapuy. Lavew sikandin kedì, ne minsan is ked-uwit dà te sepatus din, kenè e pa zait he sulug̵uen din.

Juan 7:18

Su ke zuen etew he ibpenurù din is kandin dà he isip, ebpevantug dà te menge etew, iyan, is etew he ibpenurù din is kegkevantug te midsug̵ù kandin, egkeserig̵an is lalag din su kenà tarù is ibpenurù din.

Nengeulaula 10:36

Netuenan niw en is Meupiya he Tudtulanen he impesavut te Megbevayà kenami te menge kevuwazan ni Israyil su pinaag̵i ki Jesu Kristu he iyan Nengazen te langun he menge etew, impesavut din he egkeawà is pauk te Megbevayà kenitew.

Nengeulaula 2:36

Na,” ke si Pedro, “kinahanglan he edsevuten tew te langun he menge kevuwazan ni Israyil he si Jesus, sikan is inransang niw te krus, midhimu en te Megbevayà he Nengazen wey hadì tew te langun.”

Nengeulaula 5:31

Ne midtulus din en ne ziyè en sikandin te zapit te egkekewanan te Megbevayà. Sikitew is menge kevuwazan ni Israyil, egalen tew sikandin wey iyan kenitew edlibri te silut. Ne ebpeiniyug̵an din kenitew is mezaat he ulaula ne ebpeseyluwen kiw zin.

1 Kurintu 1:23

Ne sikitew mulà, ibpenurù tew is mehitenged ki Kristu he inransang te krus. Is menge Hudiyu, igkeepes dan utew heini ne is menge Gerisyahanen ne kunaan dan ke tarù ne wazè din pulus.

1 Kurintu 10:33

Siak, ebpen-ahaan ku layun is paag̵i su wey meketavang te minsan hentei is menge ulaula ku. Kenè ku iyan ebpen-ahaan is kediey he igkezeyzey, kekenà, iyan is igkezeyzey te langun he menge zuma he etew. Umba ebeelan ku heini su wey meketuu sikandan ne melibri sikandan te silut.

1 Kurintu 12:3

Ne tenged kayi ibpesavut ku zaan keniyu he ke zuen etew he ed-ulinan te Wag̵as he Mulin-ulin, kenà egkehimu he egkeg̵iyen din he zait he edrewaken si Jesus, ne iring din ded daan kenà egkehimu he egkeg̵iyen din he Nengazen din si Jesus emun kenà pinaag̵i te ked-ulini kandin te Wag̵as he Mulin-ulin.

1 Kurintu 15:47

Ne haazà is nehuna he etew he si Adan, linimbag sikandin ne is limbag̵an din ne iyan is tanà, iyan, haazà is etew he ed-ilis kandin he iyan si Kristu, ne ebpuun sikandin mulà diyà te langit.

1 Kurintu 2:2

Su neisip ku he iyan ku zà ibpesavut diyan is penurù mehitenged ki Jesu Kristu wey is kedrensanga kandin te krus.

1 Kurintu 4:15

Su minsan pa te utew mezakel is menge etew he ed-ag̵ak keniyu te menge tumutuu ki Kristu, sebsevaha ku zà is iring te amey niw tenged te kedtuu niw. Su hein impesavut ku keniyu is Meupiya he Tudtulanen, nehimu a he amey niw zutun te kedtuu niw ki Jesu Kristu.

1 Kurintu 8:6

Ne minsan pa zutun, sikitew, netuenan tew mulà he sebsevaha zà is kenitew he Megbevayà he iyan Amey tew he nenlimbag te minsan hengkey. Iyan sikandin edlingahaan tew te minsan hengkey he timpu. Ne sebsevaha zà daan is Nengazen tew he iyan si Jesu Kristu. Pinaag̵i kandin nelimbag is minsan hengkey, ne pinaag̵i zaan kandin mibeg̵ayan kiw en te veg̵u en he untung.

2 Kurintu 1:19

Sikami engki Silas wey si Timoteo, impenudtul zey ziyan te keniyu kes Anak te Megbevayà he iyan si Jesu Kristu. Ne netuenan niw he metinumanen sikandin te lalag din ne kenà egkehimu he kenè din edtumanen is penaad din.

2 Kurintu 1:24

Kenè dey egkesuatan he ebayàbayè key ke hengkey is edtuuwan niw su netuenan dey he meheg̵et en is kedtuu niw. Egkesuatan dey zà he mehimu key he timbang niw te ebpeveelan kenitew te Megbevayà su wey kew melipey.

Gelasya 5:13

Na, menge suled, tutuu iyan he impetuu ki te Megbevayà wey ki zin melibri ne wazè en kinahanglan he ebpeuripen ki te kesug̵uan. Ne minsan pa zutun wazè ki melibri su wey iyan mebayàbayà kenita is mezaat he kebayà te lawa ta. Kinahanglan he tenged te zekelà is gag̵ew tew te menge zuma tew ne medtitinevangà is kada sevaha kenitew te menge tumutuu.

Pilipus 1:15

Is duma, ne iyan idsengyawa zan te impenurù ni Kristu is: tenged te nesina zan kediey ne wey e zan melevawi. Iyan, duen duma he iyan idsengyawa zan te menge penurù ni Kristu su igkesuat dan heini te ebpenudtul.

Pilipus 2:11

ne ebpekekag̵i zan he iyan si Jesu Kristu Nengazen te minsan hengkey. Ne pinaag̵i kayi egkevantug dan daan is Amey tew he Megbevayà.

2 Timoteo 2:10

Ne tenged kayi ed-entusen ku is minsan hengkey he merasey wey ku metevangi is menge etew he pinilì te Megbevayà. Egkesuatan ku he melibri sikandan te silut pinaag̵i te kebpekidsevaha zan ki Jesu Kristu ne mekezawat dan te ketulusan he wazà pidtemanan.

Tito 1:11

Kinahanglan he ibpeengkezan nu kandan is kebpenurù dan su ke zuen sevaha he egketazin is isip din pinaag̵i te kedtuuwi zin kayi he penurù egkesemukan is kebpekid-upakat din te menge zuma zin dutun te pemilya zin. Iyan dà ibpenurua zan dutun te kenà hustu he ibpenurù is wey zan mekepenapì.

2 Pedro 2:3

Tenged te suat dan te selapì, ebpenepian kew zan pinaag̵i te penurù dan he tarù. Daan en he midteg̵ana is silut kandan; andam en is Megbevayà te kedsilut kandan.