2 Kurintu 4:18 - Manobo Western Bukidnon

¹⁸ Su iyan netag̵ù mepurung dini te g̵ehinawa zey, kenà is menge vutang he egkeehè ta zini te kelibutan, kekenà, iyan is menge vutang he kenè te pa egkeahà he ziyà te langit. Su is menge vutang he egkeehè ta zini te kelibutan, ne meg̵aan dà egkehanew, iyan, sikan is kenè pa egkeahà he ibeg̵ey te Megbevayà, ne kenà mulà egkehanew te wazà pidtemanan.

2 Kurintu 4:18 Кръстосани препратки

Mateo 25:46

Ne heini he menge etew,” ke si Jesus, “id-awà kayi su edsilutan sikandan te silut he wazè din pidtemanan; iyan, is menge metazeng mulà, ebeg̵ayan sikandan te untung he wazè din pidtemanan.”

2 Kurintu 5:7

Su ibpeikul ta is ibayè ta zini te kelibutan pinaag̵i te kedsarig dà te Megbevayà su kenè te pa egkeahà is edungguan ta ziyà te langit.

2 Tiselunika 2:16

Berakat he lipaya kew wey lig-eni kew te Nengazen tew he si Jesu Kristu wey te Amey tew he Megbevayà su wey meupiya is langun he menge vaal niw wey is langun he menge lalag niw. Mahal kiw layun diyà te g̵ehinawa zin ne pinaag̵i te g̵ag̵ew zin kenitew zuen tew igkelipey he wazè din pidtemanan wey zuen tew zaan utew meupiya he ebperetengen.

Hibriyuhanen 11:1

Emun duen kedtuu ta te Megbevayà, egketuenan ta he egkezawat ta is meupiya he ebperetengen ta. Pinaag̵i te kedtuu ta, egketag̵ù dini te g̵ehinawa ta is kedewata ta keuzemà te menge vutang he wazè te pa maahà.

Hibriyuhanen 11:13

Ne heini sikandan he neketuu te Megbevayà, pudu zan minatey te wazè dan pa mezawat haazà is impenaad kandan te Megbevayà he egkeangken dan haazà is tanà. Ne minsan pa zutun te wazè dan pa mezawat haazà is impenaad te Megbevayà, wazè dan engkezi is kedtuu zan su netuenan dan he egkeug̵et pa zutun egkezawat dan is ebperetengen dan he impenaad te Megbevayà. Ne ingkepesavut dan he kenà sikandan hustu he meg̵inged dini te kelibutan su iyan hustu he inged dan is langit.

Hibriyuhanen 9:11

Ne g̵untaan nekeuma en si Kristu, ne nehimu sikandin he lavew he memumuhat mehitenged kayi te veg̵u he paag̵i he meupiya kenà kes daan. Ne midseled sikandin diyà te meupiya pa wey lavew pa he simbahan he wazà beeli te etew zà duen su kenà dini te kelibutan.

1 Juan 2:25

Su iyan impenaad kenitew ni Kristu is untung he wazà pidtemanan.