2 Kurintu 3:6 - Manobo Western Bukidnon

⁶ Su iyan sikandin ebeg̵ey kenami te ketau wey zey ikepenurù is beg̵u he paag̵i he midtukud din te kebpekidsevaha zin te menusiyà. Ne wazà heini is beg̵u he paag̵i iveg̵ey pinaag̵i te insurat he kesug̵uan, kekenà, imbeg̵ey zin heini kenitew pinaag̵i te Wag̵as he Mulin-ulin. Su emun iyan ta edserig̵an is kedtumana ta te kesug̵uan, ne kemetayen he wazà pidtemanan is ebperetengen ta. Iyan, ke ibeg̵ey kenitew is Wag̵as he Mulin-ulin ne untung he wazà pidtemanan is ebperetengen ta.

2 Kurintu 3:6 Кръстосани препратки

Mateo 13:52

Ne mid-uman megkag̵i si Jesus te, “Ne tenged kayi,” ke sikandin, “ke zuen menunudlù te kesug̵uan he nekesundan te hadì tew he Megbevayà, ebpekeiring sikandin te etew he zekelà is ketig̵eyunan din diyà te valey zin. Su kenà iyan dà igkepenurù din is kinezaan, kekenà, igkepenurù din daan is beg̵u.”

Mateo 26:28

Su lengesa ku heini he ibpetig̵is wey mepelisi is mezakel he menge etew wey mepesaylu is menge salè dan. Tuus heini te paag̵i te kegkelibri he midtukud te Megbevayà.

Marcos 14:24

Ne migkag̵i si Jesus te, “Iyan heini lengesa ku he ibpetig̵is wey mepelisi is mezakel he menge etew. Tuus heini te paag̵i te kegkelibri he midtukud te Megbevayà.”

Lucas 22:20

Ne hein neipus dan dutun is egkaan ne migkuwa en maan ni Jesus is tasa ne migkag̵i te, “Heini ve is inumen, ne tuus te veg̵u en he paag̵i te kegkelibri he midtukud te Megbevayà ne egkehimu heini pinaag̵i te lengesa ku he ibpaag̵as tenged keniyu.

Juan 5:21

Is Amey ku, ebenhawen din is menge minatey ne ibeg̵ey zin kandan is untung. Ne siak is anak din, untung daan is ibeg̵ey ku ziyà te minsan hentei he ebpilien ku.

Juan 6:63

Iyan dà ebpekeveg̵ey te untung he wazà pidtemanan is Wag̵as he Mulin-ulin. Wazà egkehimu te lawa zà duen. Is menge lalag he migkag̵i ku keniyu, diyà ebpuun te Wag̵as he Mulin-ulin, ne ebpekeveg̵ey te untung he wazà pidtemanan.

Ruma 1:5

Pinaag̵i ki Jesu Kristu midtuvazan a te Megbevayà su midhimu e zin he epustul, he ke và dà egkeg̵iya, sug̵ù, su wey mevantug si Jesus. Umba mid-ulaula zin heini su wey ku mepenurù is menge etew he kenà menge Hudiyu ziyà te minsan hendei he inged wey zan mekepemineg ne wey zan meketuu ki Jesu Kristu.

Ruma 3:20

Su wazà minsan hentei etawa he egkeisip te Megbevayà he metazeng pinaag̵i te kedtumana zin te kesug̵uan su layun din egkesupak is kesug̵uan. Umba imbeg̵ey is kesug̵uan su wey tew mesavut he mesinupaken kiw ves te menge sug̵ù te Megbevayà.

Ruma 4:15

Ne kenè kiw egkezeyzey pinaag̵i te kesug̵uan, su is kesug̵uan, ne iyan mulà igkepeuki kenitew te Megbevayà su kenè tew egketuman. Angin ke wazà kesug̵uan su kenà egkehimu he zuen egkesupak ta.

Ruma 4:17

Ne zuen insurat he Lalag te Megbevayà diyà te ki Abraham, ke sikandin te, “Ibpenaad ku kenikew he edhimuwen ku sikew he kepuun te utew mezakel he menge kelasi te menge etew.” Ne zutun mid-isip din si Abraham he kepuun tew te langun he midtuu he iring kandin. Ne is Megbevayà he iyan edtuuwan tew, ne utew sikandin mekeg̵eg̵ehem su iyan ebpekevanhew te menge minatey, ne is minsan hengkey he wazè pa meulaula, netuenan din en he zaan iring te neulaula en.

Ruma 7:6

Ne hein nemeketuu kiw ki Jesus, nelibri kiw te Megbevayà ne wazè en kinahanglan he iyan tew pa edserig̵an is kedtuman te kesug̵uan, su zutun te kebpatey ni Jesus minatey kiw zaan ne nevelukasan kiw te kegkeuripen kenitew te salà. Ne g̵untaan beg̵u en is paag̵i te ked-ul-ulaha tew te egkesuatan te Megbevayà su pinaag̵i heini te kedtavang te Wag̵as he Mulin-ulin, ne kenè en pinaag̵i te zaan he paag̵i he iyan is kenitew he kedtumana te insurat he kesug̵uan.

Ruma 8:2

Su pinaag̵i te kebpekidsevaha ta ki Jesu Kristu imbeg̵ey kenita te Wag̵as he Mulin-ulin is beg̵u en he untung ne tenged kayi nelibri ki en te kebpekesalè ta he iyan edungguan din is kemetayen he wazè din pidtemanan.

1 Kurintu 11:25

Ne zutun hein nekekaan dan en, migkuwa ni Jesus is tasa he nepenù te inumen ne ke sikandin en maan te, “Heini is inumen, ne tuus te veg̵u en he paag̵i te kegkelibri he midtukud te Megbevayà ne egkehimu heini pinaag̵i te lengesa ku he ibpaag̵as. Ne emun ed-inumen niw heini is inumen te minsan keenu he timpu isipa a keniyu,” ke si Jesus.

1 Kurintu 12:28

Ne is tivuuk he menge tumutuu, mibeg̵ayan te Megbevayà is kada sevaha te kenà ebpeked-iiring-iring he ebpeveelan din. Iyan aney he vaal zin is: mibpilì din is menge etew he midhimu zin he menge epustul. Ikezuwa, imbeg̵ey zin diyà te zuma is ketau te kedseysey te impesavut te Megbevayà. Iketelu, ne mibeg̵ayan din is duma he menge etew te ketau te kebpenurù te lalag din, ne mibeg̵ayan din is duma te g̵ehem te kebpekehimu te egkein-inuwan. Ne is duma pa ne mibeg̵ayan din te g̵ehem te kebewii te menge egkengezeruwan. Ne mibeg̵ayan din daan is duma te ketau te kedtevangi zan te menge zuma zan. Ne is duma pa, ne mibeg̵ayan din te ketau te ked-uwita zan te menge tumutuu. Ne is duma pa, mibeg̵ayan din te ketau te kegkag̵i te kineg̵iyan he kenè dan egkesavut.

1 Kurintu 15:45

Su zuen insurat he Lalag te Megbevayà he edhenduen te, “Haazà is nehuna he etew he si Adan, ne mibeg̵ayan te Megbevayà is lawa zin te g̵ehinawa su wey mekeubpà dini te tanà.” Iyan, si Kristu mulà, haazà is migeraran te huziyan he Adan, iyan sikandin ebeg̵ey te untung he wazà pidtemanan su wey kiw mekeubpà diyà te langit.

1 Kurintu 3:10

Ne siak, henduen a te pandey te Megbevayà su imbeg̵ey zin kediey is gehem su wey mehimu he iyan a edsavuk diyan te keniyu te vatu he edtukuzan te valey ne selakew en is ebevaley zuen, he ke và dà egkeg̵iya, selakew en is ebpenurù keniyu g̵untaan. Ne kinahanglan he is kada sevaha he ebevaley ne purungi zin is baal zin.

1 Kurintu 3:5

Isipa niw man heini. Siak si Pablo, hentei a? Ne hentei zaan si Epulus? Sulug̵uen key zà te Megbevayà. Pinaag̵i kenami midhimu zin he meketuu kew. Edtumanen dey zà is ebpeveelan din kenami. Ne iyan dà ed-ul-ulahan dey.

2 Kurintu 11:23

Netuenan ku he henduen a te ebuneg̵en kayi te menge lalag ku, iyan, kenà egkesabpeng is bèbè ku kayi te egkeg̵iyen ku. Egkeg̵iyen dan he menge sulug̵uen sikandan ni Kristu. Siak, lavew e pa he metinumanen he sulug̵uen ni Kristu. Utew memereg̵en is ebpeveelan din kediey. Lelayun ad egkepirisu ne sikandan, kenà layun. Lelayun ad ebug̵ela te menge etew he kuntada te Megbevayà, kenà te sikandan. Mezakel en is nengeeg̵iyan ku he edhimetayan a pezem, kenà te sikandan.

2 Kurintu 3:14

Su zutun neelangan daan is menge kedsavut dan. Ne wazà daan mahalin heini g̵untaan su kemulu pa neelangan is kedsavut te menge Hudiyu. Ne emun ebasa zan mehitenged te zaan he paag̵i kenè dan egkesavut. Ne emun duen kandan edtuu ki Kristu, id-awà te Megbevayà is ebpekealang te isip din ne human sikandin ebpekesavut.

2 Kurintu 3:3

Su iring is kedtuu niw te surat he ibpesavut dutun he hustu is ulaula zey. Ne iyan mibaal kayi te surat si Kristu su midsug̵ù key zin diyan wey kew meketuu. Ne zeyzey heini is surat su wazà isurat pinaag̵i te kintà ne wazà daan isurat diyà te menge edsuratan he vatu iring te kesug̵uan he imbilinbilin ni Moises, kekenà, pinaag̵i te Wag̵as he Mulin-ulin insurat te Megbevayà diyà te g̵ehinawa niw te menge etew.

2 Kurintu 3:7

Dutun te kedsurata zengan te Megbevayà te kesug̵uan, duen te menge edsuratan he vatu, neselikuvungan si Moises te ed-anlag he g̵ehem te Megbevayà. Ne zutun nenganlag is paras ni Moises tenged te g̵ehem te Megbevayà ne nekesirang te menge etew he kevuwazan ni Israyil. Ne minsan pa zutun te utew merayag haazà, naawà gihapun haazà is gehem. Iyan ibpesavut kenita pinaag̵i te kesug̵uan is: ebpatey is gimukud te menusiyà. Ne minsan pa zutun utew zekelà is gehem he impaahà te Megbevayà dutun te kedsurata zin kayi.

2 Kurintu 3:9

Emun dekelà is gehem te kesug̵uan he iyan idsiluti te menusiyà, iyan pe be kenà dekelà pa utew is gehem te paag̵i he iyan ebpekehimu he mebmetazeng is menusiyà.

Gelasya 3:21

Ne kunaan niw vuwa ke kenà egkeuyun is kesug̵uan wey is menge penaad dengan te Megbevayà, iyan, kenà egkehimu he kenà heini egkeuyun. Su ke zuen kesug̵uan he pinaag̵i kayi egkeveg̵ayan kiw te untung he wazè din pidtemanan ne siguradu egkehimu kiw he metazeng pinaag̵i zaan kayi te kesug̵uan.

Ipisu 2:1

Dengan, henduen kew te minatey su wazè niw pa untung he wazà pidtemanan tenged te kenè kew pa zutun ebpemineg te menge sug̵ù te Megbevayà wey tenged te menge mezaat he ulaula niw.

Ipisu 2:5

Ne minsan pa te iring kiw te minatey tenged te kenè tew kebpemineg te menge sug̵ù din, dutun te kebenhawa zin ki Kristu, inragkes kiw zin daan su wey tew maangken is untung he wazà pidtemanan. Midlibri kiw zin te silut tenged dà te g̵ag̵ew zin kenitew.

Ipisu 3:7

Nehimu a he sulug̵uen te Megbevayà te kedsengyawa te Meupiya he Tudtulanen. Tenged dà te g̵ag̵ew zin kediey wey pinaag̵i te g̵ehem din imbeg̵ey zin kediey heini is ketengdanan.

1 Timoteo 4:6

Emun ibpenurù nu heini ziyà te menge zuma he tumutuu egkehimu ka he metinumanen he sulug̵uen ni Jesu Kristu. Ne egkeheg̵et is kedtuu nu pinaag̵i te ked-istudyu nu te tuluuwen tew wey pinaag̵i te kedhamen nu te hustu he impenurù kenikew.

2 Timoteo 1:11

Ne siak, midtezù a te Megbevayà wey a mehimu he epustul ne wey ku ikesangyew wey ipenurù haazà is Meupiya he Tudtulanen,

Hibriyuhanen 12:24

Mid-uvayan tew zaan si Jesus he iyan datù tew he midhimu te veg̵u en he paag̵i te kebpekidsevaha tew te Megbevayà. Pinaag̵i te lengesa zin nengepelisan is menge salè tew. Tuus is lengesa zin te g̵ag̵ew kenitew te Megbevayà he utew haazà meupiya kenà te lengesa ni Abel zengan su is lengesa ni Abel, iyan tuus te silut te Megbevayà.

Hibriyuhanen 13:20

Is Megbevayà, mibanhew zin is Nengazen tew he si Jesus. Midtig̵is is lengesa zin he iyan tuus te veg̵u wey wazà pidtemanan he paag̵i te kebpekidsevaha tew te Megbevayà. Ne tenged dutun nehimu si Jesus he mekeg̵eg̵ehem he ed-elima kenitew te menge kerehidu zin.

Hibriyuhanen 7:22

Ne tenged kayi te penaad te Megbevayà, pinaag̵i ki Jesus egkesiguru tew he utew pa meupiya heini is beg̵u he paag̵i he midtukud te Megbevayà te kedlibriya zin kenitew kenà is daan.

Hibriyuhanen 8:13

Ne g̵eina te migkag̵i te Megbevayà he zuen beg̵u en he paag̵i, egkesavut tew he kenè en ebpulus haazà is daan. Ne ke zuen minsan hengkey he zaan en he kenè en egkeg̵amit ne ed-engkezan en su ed-ilisan te veg̵u.

1 Pedro 3:18

Kesevaha zà is kebpehimatey ni Kristu wey mepesaylu is menge salè tew. Mibpehimatey su wey mehimu sikandin is metazeng he elili tew te kenà memetazeng wey kiw mehimu he menge g̵aked te Megbevayà. Nepatey is lawa zin, iyan, nevanhew sikandin

1 Juan 1:1

Ebpesuratan ku sikiyu mehitenged ki Kristu. Migeraran sikandin te Lalag he ebpekeveg̵ey te wazà pidtemanan he untung. Daan en sikandin te wazè pa tukuza is kelibutan. Ne minsan pa zutun neehè dey sikandin ne nekepemineg key te migkag̵i zin. Neehè dey ne neg̵ewezan dey sikandin.