2 Kurintu 3:18 - Manobo Western Bukidnon

¹⁸ Ne, menge suled, sikitew is langun, nesavut tew en he utew lavew is gehem te Nengazen tew, ne wazà ebpekealang te kedsevuta tew kayi. Ne pinaag̵i kayi te g̵ehem he ebpuun te Nengazen he iyan kes Wag̵as he Mulin-ulin, edhimuwen kiw zin he iring te kandin ne layun ed-iseg heini is gehem.

2 Kurintu 3:18 Кръстосани препратки

Juan 1:14

Ne sikan is nekag̵i he Lalag te Megbevayà, nehimu he menusiyà ne mid-amur kenitew. Utew sikandin belig̵eg̵awen wey utew tutuu is menge lalag din. Neehè dey is utew zin kebpekelavew he iyan is kebpekelavew te vudtung he Anak te Megbevayà. Ne haazà is kebpekelavew zin, imbeg̵ey kandin te Amey zin he Megbevayà.

Juan 12:41

Umba migkag̵i ni Esaias haazà is menge lalag su netuenan din dengan he utew zekelà is gehem ni Jesus, ne iyan si Jesus egkeg̵iyen din dutun.

Juan 17:22

Is kegkehimu ku he lavew he imbeg̵ey nu kediey, imbeg̵ey ku zaan kandan wey zan mesevaha te isip iring te kegkesevaha ta.

Juan 17:24

Amà, is menge etew he imbeg̵ey nu kediey, egkesuatan ku he ziyè dan mekeamur te kediey diyà te ed-ubpaan ku keuzemà wey zan maahà is mekeg̵eg̵ehem he anlag ku he imbeg̵ey nu kediey zengan te wazè pa tukuza heini is kelibutan. Umba mibeg̵ayan a kenikew te anlag su mahal a ziyan te g̵ehinawa nu.

Ruma 12:2

Kenè niw iringi is menge ulaula te menge etew he kuntada te Megbevayà, kekenà, itug̵ut niw he helina kew te Megbevayà pinaag̵i te kebeg̵uwa zin te isip niw. Ne zutun egkesavut niw human is egkesuatan te Megbevayà, he ke và dà egkeg̵iya, egkesavut niw ke hengkey is menge ulaula he metazeng he egkesuatan he kenà egkesewayan te Megbevayà.

Ruma 13:14

Ne idsun-ud ta is Nengazen tew he si Jesu Kristu, he ke và dà egkeg̵iya, ed-ul-ulahan ta is ulaula zin. Ne kenè te en maan ed-isipen is kedtumana te menge mezaat he kebayà te lawa ta.

Ruma 8:29

Su zengan te puunè pa te minsan hengkey, netuenan te Megbevayà ke hentei is egkehimu he menge anak din ne migkag̵i zin he edhimuwen din sikandan he iring te Anak din he si Jesus. Ne zutun, egkehimu si Jesus he kakey tew te utew mezakel he menge hazi zin.

Ruma 8:4

Umba mid-ulaula heini te Megbevayà su wey ki meketuman te hustu sumalà is insug̵ù te kesug̵uan. Ne egkehimu heini su wazè en kinahanglan he edtumanen ta is mezaat he suat te lawa ta, kekenà, ebpeketuman ki te hustu su edtevangan ki te Wag̵as he Mulin-ulin.

Ruma 8:7

Emun ebeyveyaan is isip te etew te menge mezaat he kebayà te lawa zin, kuntada sikandin te Megbevayà su kenè din edtumanen is menge sug̵ù te Megbevayà. Ne kenà duen dà taman su kenà egkehimu he egketuman din.

1 Kurintu 13:12

Ne iring din ded daan, sikita, su g̵untaan iyan dà egketuenan ta is iring te alung he egepunen he egkeehè ta ziyà te peg̵elungan. Kenè te pa egkesavut is hustu. Iyan, keuzemà, kenà alung dà is egkeehè ta, kekenà, iyan en si Jesu Kristu is egkeehè ta. Ne zutun hustu mulà is kegkesevuta ta te langun iring te is Megbevayà, hustu is kegkesevuta zin kenita.

1 Kurintu 15:49

Su g̵eina te nekeiring is lawa tew te lawa te nehuna he etew he tanà is limbag̵an din, kinahanglan he ebpekeiring is lawa tew zaan te lawa ni Kristu he iyan sikan is etew he ebpuun diyà te langit.

2 Kurintu 3:17

Ne heini is egkeg̵iyen he Nengazen, ne iyan kes Wag̵as he Mulin-ulin, ne emun ed-ulinan is etew te Wag̵as he Mulin-ulin nevelukasan en sikandin te kegkeuripena kandin te kesug̵uan.

2 Kurintu 4:4

Kenè dan edtuu su mid-elangan is isip dan ni Setanas he iyan ed-ezapen te menge etew kayi te kelibutan. Tenged kayi kenà egketeyawan is isip dan te Meupiya he Tudtulanen mehitenged te utew kegkelavew ni Kristu. Pinaag̵i ki Kristu egkesayud ki ke hentei is Megbevayà su iyan sikandin dagwey te Megbevayà.

2 Kurintu 4:6

Su zutun te kedlimbag̵a te Megbevayà te langun migkag̵i sikandin te, “Maawà is kerusireman ne mehimu is kerayag.” Ne iyan daan sikandin kes midtayew te isip dey su wey zey mesavut ke hengkey is gehem te Megbevayà he impezayag pinaag̵i ki Jesu Kristu.

2 Kurintu 5:17

Ne sikan is etew he nekidsevaha en ki Kristu, beg̵u en sikandin he linimbag. Nahanew en diyà te kandin is daan he netag̵ù te isip din ne mid-ilisan en heini te veg̵u.

Gelasya 6:15

Kenà ebpulus is kebpesirkunsidar ne kenà daan ebpulus is kenà kebpesirkunsidar. Iyan dekelà is pulus din is kegkehimu kenita he veg̵u en he linimbag.

Kulusas 3:10

Ne g̵untaan midhimu ki en te Megbevayà he veg̵u en he etew he edhimuwen din he iring te kandin. Umba midhimu ki zin he veg̵u su wey ta mepurung mesavut ke hentei sikandin.

1 Timoteo 1:11

Ne heini is hustu he tuluuwen, ne ebpuun te Meupiya he Tudtulanen mehitenged te utew zekelà he g̵ehem te Megbevayà. Is Megbevayà he iyan dait he edelig̵en, insarig din kedì heini is tudtulanen wey ku mesangyew.

Tito 3:5

midlibri ki zin te silut. Iyan ingkelibriya zin kenita is: kenà tenged te menge metazeng he ulaula he nehimu ta, kekenà, tenged dà te hizu zin kenita. Midlibri ki zin pinaag̵i te kedlumpiyuwi kenita he iyan is kebpeuman ta kebpaanak pinaag̵i te g̵ehem te Wag̵as he Mulin-ulin he nekeveg̵ey kenita te veg̵u he untung.

Santiago 1:23

Su ke zuen minsan hentei he taman dà te kebpemineg te Lalag te Megbevayà, iyan, kenè din edtumanen, iring sikandin te etew he ed-alung diyà te peg̵elungan.

1 Juan 3:2

Menge minahal ku he menge emig̵u, menge anak kiw en te Megbevayà ne kenè tew pa egketuenan ke hengkey is egketemanan te kegkeenaka kenitew te Megbevayà. Iyan, netuenan tew he ke edlikù si Kristu, egkehimu zutun is kenitew he zagwey he iring te kandin he zagwey su zutun egkeehè tew human is tutuu he zagwey zin.