2 Kurintu 2:3 - Manobo Western Bukidnon

³ Umba, menge suled, iyan mibeelan ku zutun is mibpeuwitan ku zà sikiyu te surat. Su kenè ku zutun egkesuatan he ebpenumbaley a ziyan su netuenan ku he sikiyu is menge etew he kinahanglan pezem he iyan igkelipey ku, ne igkeseeng ku zutun. Ne netuenan ku zaan he emun egkelipey a, egkelipey kew zaan.

2 Kurintu 2:3 Кръстосани препратки

1 Kurintu 4:21

Ne hendei zapit is egkesuatan niw? Emun kenè niw ed-iniyug̵an is mezaat he ulaula, ebeyaan ku sikiyu wey ku sikiyu mesiluti. Ne emun meupiya is ed-ul-ulahan niw, meupiya g̵ihapun is kebpenumbaley ku ziyan, ne zekelà is gag̵ew ku wey hizu ku keniyu.

2 Kurintu 1:15

Ne g̵eina te netuenan ku he siguradu nesavut niw en heini, neisip ku he edhuna a ebpenumbaley ziyan te keniyu su wey kezezuwa ku sikiyu metevangi

2 Kurintu 1:23

Siluti a te Megbevayà emun kenà tutuu is egkeg̵iyen ku. Netuenan din he iyan ketezengan ke maan is wazà a mekepenumbaley ziyan te Kurintu su wey kenè kew meseeng pinaag̵i te kedsusiya ku te menge ulaula niw.

2 Kurintu 12:11

Henduen a te tulebung he etew su edantal a, iyan, neteg̵el a keniyu su iyan kew pezem ebeg̵ey te menge ketezengan ku he idtavak keniyan te menge uvag kun epustul ni Kristu. Ne minsan pa te wazà kediey he ketau wazà a g̵ihapun melevawi kayi te uvag menge utew lavew he kenà tutuu he epustul ni Kristu.

2 Kurintu 12:21

Egkesemukan a su kela ke zutun te kebpekeuma ku ziyan ne igkeeled ku sikiyu ziyà te Megbevayà ne kela ke utew a egkeseeng tenged te mezakel he netuenan ku zengan he nekevaal te mezaat ne wazè dan pa engkezi is menge mahawag he ulaula zan iring te kedhilavet te kenè dan esawa wey is kedtumana zan te mezaat he kebayè dan.

2 Kurintu 13:10

Umba ebpesuratan ku sikiyu te zini e pa te meziyù su ke ebpekeuma a ziyan kenè en kinahanglan he meg̵amit ku is keg̵ehem ku te epustul te kedsilut. Imbeg̵ey kedì te Megbevayà heini is keg̵ehem. Kenà iyan imbeg̵aya zin kayi te keg̵ehem su wey maawà is upakat niw te tumutuu, kekenà, wey meheg̵et is upakat niw.

2 Kurintu 2:9

Umba mibpeuwitan ku sikiyu te surat ku su wey ku maahà ke metinumanen kew ve te langun he menge sug̵ù ku.

2 Kurintu 7:12

Kenà iyan dà impesurati ku keniyu is mehitenged duen te etew he nekesalà wey kes neselaan din, kekenà, ebpeketistig̵us is Megbevayà he umba mibpesuratan ku sikiyu su wey niw meisipisip ke sengemenu key kemahal diyan te g̵ehinawa niw.

2 Kurintu 7:16

Ne tenged kayi, utew ad egkelipey su netuenan ku he ebpekepurung ad ebpekesarig keniyu.

2 Kurintu 7:6

Iyan, is Megbevayà he metau he edlipey te egkengeseeng, midhimu zin he meupiya is gehinawa zey pinaag̵i te kebpekeuma ni Tito.

2 Kurintu 7:8

Su minsan ke pinaag̵i zutun te surat ku ne neseeng kew, neisip ku he meupiya utew te neveelan ku haazà. Hein aney, nekedsendit a su maan is neveelan ku is nehimu he ingkeseeng niw, iyan, petuluy zà naawà haazà is kegkeseeng niw.

2 Kurintu 8:22

Ne zuen pa suled tew he ibpezuma zey engki Tito. Mibpurungan ku sikandin susiya ne utew zekelà is gustu zin te edtavang te menge tumutuu, iyan, tuwas pa zekelà is gustu zin te edtavang keniyu g̵eina te zekelà is kedsarig din keniyu.

Gelasya 5:10

Ne minsan pa zutun, dekelà is kedsarig ku te Nengazen he pinaag̵i te kedtavang din keniyu, ebpemineg̵en niw zed is hustu he impenurù ku keniyu. Iyan, haazà is etew he nekesamuk te isip niw pinaag̵i te penurù din he tarù, siguradu he edsilutan sikandin te Megbevayà.

2 Tiselunika 3:4

Tenged te kedsarig dey te Nengazen, netuenan dey he ebpenigudu kew pa edtuman te menge sug̵ù dey keniyu.

Pilimun 1:21

Dekelà is kedsarig ku kayi te kebpesurati ku kenikew su netuenan ku he ebpemineg̵en a kenikew. Netuenan ku he zekelà is edhimuwen nu, kenà te idhangyù ku.