2 Kurintu 13:5 - Manobo Western Bukidnon

⁵ Susiya niw is gehinawa niw wey niw metueni ke tutuu ve is kedtuu niw ki Kristu. Wazè niw ve metueni he midlumunan kew ni Kristu? Ne emun wazà, ne tarù is kedtuu niw ne wazè kew mezawat ni Kristu.

2 Kurintu 13:5 Кръстосани препратки

Juan 14:23

Ne midtavak si Jesus te, “Ke zuen etew he mahal a ziyà te g̵ehinawa zin, edtumanen din is menge sug̵ù ku, ne zutun mahal sikandin diyà te g̵ehinawa te Amey ku. Ne siak wey is Amey ku, edhendiyè key te kandin ne ziyà key ed-ubpà te kandin.

Juan 15:4

Kenè kew suwey kediey iring te kenà a zaan edsuwey keniyu. Wazà subpang he ebpekepemeg̵as ke ebpekesuwey ziyà te lawa te pinemula, ne sikiyu zaan, emun edsuwey kew kediey kenè kew ebpekepemeg̵as.

Juan 17:23

Su ziyà a te kandan ne zini ka zaan te kedì wey mehustu is kegkesevaha te isip dan su wey metueni te tivuuk he menusiyà he midsug̵ù a kenikew, ne wey metueni zaan te menusiyà he mahal sikandan diyan te g̵ehinawa nu iring daan te mahal a ziyan te g̵ehinawa nu.

Juan 17:26

Impesavut ku kandan ke hentei ka ne ibpenigudu ku pa ibpesavut kandan heini su wey mehimu he ziyà a te kandan ne mahal ziyà te g̵ehinawa te uman sevaha kandan is minsan hentei kandan iring te mahal a zaan diyan te g̵ehinawa nu.”

Juan 6:56

Is egkaan te lawa ku wey ed-inum te lengesa ku, kenà ed-awà dini te kediey ne siak, kenà a zaan ed-awà diyà te kandin.

Juan 6:6

(Umba migkag̵i zin heini su egezaman din si Felipe su si Jesus, netuenan din en man ke hengkey is ebeelan din dutun.)

Ruma 1:28

Ne g̵eina te egkeg̵iyen dan he wazè en pulus te kedtuuwi te Megbevayà, mid-iniyug̵an sikandan te Megbevayà ne tenged kayi iyan ebayàbayà kandan is kelelalung he netag̵ù diyà te isip dan ne ed-ul-ulahan dan is kenà hustu.

Ruma 8:10

Iyan, emun diyà te keniyu si Kristu, minsan pa te ebpatey zed is lawa niw tenged te salà, duen niw en gihapun beg̵u he untung tenged te mid-isip kew en te Megbevayà he metazeng.

1 Kurintu 11:28

Ne tenged dutun kinahanglan he susiya te kada sevaha is kandin he g̵ehinawa ke tutuu ve is kedsarig din te kebpatey ni Jesus ne human egkehimu he egkaan wey ed-inum sikandin.

1 Kurintu 11:31

Emun edsusiyen ta is kenita he g̵ehinawa, kenè ki en edsilutan te Megbevayà.

1 Kurintu 3:16

Sikiyu is menge tumutuu te Megbevayà, utew a egkeinuinu keniyu su henduen be te wazè niw mesavut he iyan kew kes baley he ed-ubpaan te Megbevayà su ziyan te keniyu ed-ubpà is Wag̵as he Mulin-ulin he Megbevayà.

1 Kurintu 6:15

Netuenan niw ve he heini is menge lawa tew te menge tumutuu, ne parti te lawa ni Kristu. Ne tenged kayi kenà egkehimu he egemiten ta is parti te lawa ni Kristu te kedhuliza te vahi he meremerik is ulaula zin.

1 Kurintu 6:19

Siguradu netuenan niw he is lawa niw, ne iyan ed-ubpaan te Wag̵as he Mulin-ulin he imbeg̵ey keniyu te Megbevayà. Kenè ki en maan teg̵ig̵aked te lawa ta, kekenà,

1 Kurintu 6:2

Wazè niw ve metueni he sikitew is menge tumutuu, iyan kiw ebpenhusey keuzemà te langun he menge etew zini te kelibutan? Ne emun egkehimu he ebpenhusey kiw te tivuuk he menusiyà, wey pe be kenà egkehimu he edhusayen tew heini is menge zeisey he sumbung?

1 Kurintu 9:24

Netuenan niw he ke zuen lumbaan ne mezakel is ebpekibanggà, iyan, sevaha zà is ebpekezaag ne iyan edsuhulan. Ne sikiyu is tumutuu ki Jesus, iringi niw is edlumbà su wey kew mesuhuli keuzemà te Megbevayà.

1 Kurintu 9:27

Ne heini is lawa ku, ke zuen mezaat he suat din, ne edhimuwen ku is taman te egkehimu ku su wey ku meeg̵en su kela ke, siak is nekepenurù te zuma, ne iyan a kenà egkesuhulan keuzemà te Megbevayà.

2 Kurintu 6:16

Ne is simbahan he Valey te Megbevayà he zutun ed-ezapa sikandin, kenà egkehimu he zutun daan ed-ezapa is menge tarù he ed-ezapen. Ne iring din ded daan sikitew is tumutuu su iyan kiw iring te valey he ed-ubpaan te wazè din kemetayen he Megbevayà. Su migkag̵i is Megbevayà te, “Edlumunan ku sikandan ne ebpekiduma a kandan ne egkehimu he iyan a edsimbahan dan he Megbevayà ne iyan sikandan menge g̵aked ku he etew.”

Gelasya 2:20

Tenged te kedsarig ku ki Kristu, inransang a te krus duma kandin su elili ku sikandin. Minatey a, iyan, uuyag a g̵ihapun su zini ed-ubpà te kediey si Kristu ne heini is kebpengungubpaan ku zini te kelibutan, pinaag̵i zà te kedsarig ku kandin te Anak te Megbevayà. Mahal a ziyà te g̵ehinawa zin ne mibpehimatey sikandin he elili kediey su wey a melibri.

Gelasya 4:19

Henduen be te menge anak ku en sikiyu su minahal ku sikiyu. Iring te edlised is bahi ke ed-anak, egkereg̵enan a zaan te ked-isipa ku keniyu su egkesuatan ku he meg̵aan niw itug̵ut he iyan ebayàbayà keniyu si Kristu.

Gelasya 6:4

Deyzey ke ebpurungan edsusiya te uman sevaha is menge ulaula zin. Ne emun meupiya, egkehimu he ibmeupiya te g̵ehinawa zin. Iyan, kenè din isukud is menge ulaula te zuma zin te kandin he ulaula.

Ipisu 3:17

su wey, pinaag̵i te kedtuu niw, melumuni is gehinawa niw ni Jesu Kristu. Ne idhangyù ku zaan he heg̵eti zin wey lig-eni zin is kebmahala niw te minsan hentei. Umba idhangyù ku heini su wey sikiyu,

Kulusas 1:23

Iyan, kinahanglan he kenè niw engkezi is kedtuu te tutuu he tuluuwen, kekenà, lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen. Heini is nekag̵i he Meupiya he Tudtulanen, ne insangyew ziyà te menge etew ziyà te minsan hendei. Siak si Pablo, midsug̵ù a wey ku ikesangyew is Meupiya he Tudtulanen.

Kulusas 1:27

su egkesuatan din he sikitew is menge g̵aked din, ne egkesayud kiw ke hengkey is utew lavew he meupiya he edhimuwen din diyà te langun he menge etew. Ibpesayud din en kenitew he edlumunan kiw ni Kristu ne tenged kayi egketuenan tew he edtulusen kiw keuzemà.

Kulusas 2:19

Ne wazè dan en upakat ki Kristu he iyan ed-uwit kenitew. Iyan si Kristu puunà te zesen te kedtuu tew ne pinaag̵i kandin ed-iseg is kezesen te upakat tew te langun he tumutuu sumalà is egkesuatan te Megbevayà, iring te lawa tew, ne ed-iseg daan is desen din ne kenè ebpekedsusuwey pinaag̵i te kegkevagkes kayi zutun te menge ug̵at din.

Kulusas 2:7

Purung kew pendalid diyà te kandin; purungi niw istudyuwi is menge ulaula zin; purungi niw tuuwi sikan is tutuu he tuluuwen he impenurù keniyu. Ne kinahanglan he layun niw peselemati te Megbevayà is gag̵ew zin keniyu.

1 Timoteo 2:15

Ne minsan pa te iyan haazà, egkelibri g̵ihapun is menge vahi te silut pinaag̵i te ked-anak te vatà ke kenè dan edlekaan is kedtuu zan, wey is kebmahala zan te menge zuma zan wey is menge ulaula zan he igkesuat te Megbevayà wey is ked-erengana zan te langun he ed-ul-ulahan dan.

2 Timoteo 3:8

Haazà is menge maama zaan, edsumpalit dan te tutuu he tuluuwen. Netazin en utew is isip dan ne uvag dà is kedtuu zan te Nengazen. Iring sikandan ki Hanis wey ki Hembiris he midsumpalit dengan ki Moises.

Tito 1:13

Ne utew venar is migkag̵i zin. Tenged dutun kinahanglan he pekezeseni nu sikandan te edawey wey mehustu is kedtuu zan

Tito 1:16

Duen menge etew he egkeg̵iyen dan he emig̵u sikandan te Megbevayà, iyan, pinaag̵i te menge ulaula zan egketuusan ta he kuntada sikandan te Megbevayà. Utew zin sikandan egkeepesi su kenè dan ebpememineg te tutuu he tuluuwen. Ne tenged dutun kenè dan dait he ibpeulaula zin te minsan hengkey he meupiya.

Tito 2:2

Is menge meg̵urang en he maama, ne iyan ipenurù nu kandan is: kinahanglan he metau sikandan he ed-eg̵en te menge suat te lawa zan; kinahanglan he zait sikandan he edtehuzen tenged te menge ulaula zan he meupiya; kinahanglan he metau zan he ed-isip te hustu. Meheg̵et is kedtuu zan te Megbevayà, ebmahalen dan diyà te g̵ehinawa zan is menge zuma zan, wey meinentusen sikandan.

Hibriyuhanen 12:15

Bantey kew su kela ke zuen duma keniyu he kenà edawat te g̵ag̵ew te Megbevayà. Su is iring kayi he etew, ne ebpekeiring te sagbet he ebpemeg̵as te mepait he ebpekehilu. Ebpekesamuk sikandin te menge tumutuu ne mezakel he etew is ebpekeiring kandin te ed-ulaula te mezaat.

Hibriyuhanen 4:1

Ne minsan pa zutun, wazà iawà te Megbevayà is daan he penaad din he zuen menge etew he ebpekeseled dutun te inged din wey zan mekehimeley zuma kandin. Ne tenged kayi kinahanglan he ebpekeandam kiw su wey wazà minsan sevaha kenitew he kenà edtug̵utan te Megbevayà he mekeseled dutun.

Hibriyuhanen 6:8

Iyan, ke zuen tanà he iyan dà ebpeketuvù duen is menge zug̵iyen he sagbet wey menge hilemunen, ne wazè din pulus, ne ed-engkezan, ne ebinsulan te teg̵itanà. Ne iring din ded daan is etew he iring kayi te tanà su edsilutan te Megbevayà.

Santiago 4:4

Kenè kew metinumanen te pesarig niw ziyà te Megbevayà. Wazè niw ves metueni he emun iyan niw egkesuatan is mezaat he ed-ul-ulahan te menge kuntada te Megbevayà dini te kelibutan, ne menge kuntada kew zaan te Megbevayà. Is minsan hentei he iyan egkesuatan din is mezaat he ulaula zini te kelibutan, mibpekigkuntada sikandin te Megbevayà.

1 Pedro 5:9

Sukuli niw sikandin, ne hamen kew sarig te Megbevayà su netuenan niw he is menge zuma niw he tumutuu zini te tivuuk he kelibutan, ebpekeantus dan daan te merasey he iring te egkeantus niw.

Impezayag 2:5

Tentenuzi niw sikan is kedekelaa niw zengan kediey ziyà te g̵ehinawa niw; iniyug̵i niw is mezaat he ulaula ne ul-ulaha niw is meupiya he mid-ulaula niw zengan su emun kenà, ebeyaan ku sikiyu. Ne id-awè ku is sulù niw ziyà te selevukè din emun kenè niw edlikuan is daan he ulaula niw.