2 Kurintu 13:2 - Manobo Western Bukidnon

² Dutun te ikezuwa he kebpenumbelayi ku keniyu, sikiyu is memezaat is ulaula zengan, migkag̵i ku keniyu he emun kenè niw ed-engkezan haazà is memezaat he ulaula niw ne edsilutan ku sikiyu emun ebpekelikù a. Ne ed-umanan ku egkeg̵iya g̵untaan diyan te keniyu wey ziyà te minsan hentei pa he ed-ulaula te mezaat. Ke ebpekeuma a, wazà minsan hentei he ed-ulaula te mezaat he ebpekelikey te kedsiluti ku kandin.

2 Kurintu 13:2 Кръстосани препратки

1 Kurintu 5:5

engkezi niw sikandin, ne iveg̵ey niw sikandin diyà te ki Setanas su wey mezeeti is lawa zin ne human egkelibri is gimukid din te silut te Megbevayà keuzemà te andew te kedsusi te Nengazen tew he si Jesus.

2 Kurintu 1:23

Siluti a te Megbevayà emun kenà tutuu is egkeg̵iyen ku. Netuenan din he iyan ketezengan ke maan is wazà a mekepenumbaley ziyan te Kurintu su wey kenè kew meseeng pinaag̵i te kedsusiya ku te menge ulaula niw.

2 Kurintu 12:14

Ed-endaman ku en is kedhendiyan ku ne iketelu en heini is kebpenumbaley ku ziyan te keniyu. Ne iring ded te nehuna, kenà egkehimu he ebuyù a keniyu te selapì. Kenè ku egkesuatan is selapì niw, kekenà, egkesuatan ku he mahala a keniyu ziyà te g̵ehinawa niw. Nehimu a he amey niw su pinaag̵i kedì neketuu kew te Megbevayà. Ne kenà egkehimu he ebuyuan is menge vatà te amey zan, kekenà, iyan ebuyù is menge vatà.

2 Kurintu 13:10

Umba ebpesuratan ku sikiyu te zini e pa te meziyù su ke ebpekeuma a ziyan kenè en kinahanglan he meg̵amit ku is keg̵ehem ku te epustul te kedsilut. Imbeg̵ey kedì te Megbevayà heini is keg̵ehem. Kenà iyan imbeg̵aya zin kayi te keg̵ehem su wey maawà is upakat niw te tumutuu, kekenà, wey meheg̵et is upakat niw.