2 Kurintu 12:20 - Manobo Western Bukidnon

²⁰ Egkesamuk is gehinawa ku su kela ke zutun te kebpekeuma ku ziyan ne iyan ku egkeahà diyan te keniyu is menge ulaula he kenè ku egkesuatan. Ne emun iyan haazà ne zuen ed-ul-ulahan ku zutun he kenè niw zaan egkesuatan su kinahanglan he edsewayen ku is keniyu he ulaula. Su kela ke zuen ebpekigkuntada ziyan te menge zuma zin, kela ke zuen egkesina, duen petuluy egkepauk, wey leg̵ezen, kela ke zuen diyan ebpenemperasà wey edsulà te zuma zin, kela ke zuen bereituk. Kela ke zuen diyan te keniyu gelbuwen, wey kela ke wazè niw kebpekid-uyun te menge tumutuu.

2 Kurintu 12:20 Кръстосани препратки

Ruma 1:29

Iyan dà egkeisip dan is kelelalung wey is mezaat he ulaula. Leg̵ezen dan ne meremerik is ulaula zan. Egkesina sikandan; ebpemumunù dan; ebpeeg-eg̵etè dan; edtarùtarù dan; ne ebpesipelahan dan is menge zuma zan. Ed-ituk dan,

Ruma 1:30

ne edsudien dan is menge zuma zan. Menge kuntada sikandan te Megbevayà. Ne wazè dan kedtahud te minsan hentei. Ebpelavew zan ne edantal zan. Utew zan metau he ed-isip te menge veg̵u he paag̵i te kebaal te mezaat. Kenè dan ebpemineg te menge g̵inikanan dan

Ruma 2:8

Iyan, duen daan duma he menge etew he iyan dan ed-isipen is kandan he egkesuatan ne kenè dan edtuuwan is tutuu he tuluuwen, kekenà, iyan dan edtumanen is kenà hustu. Ne kenà deisek dà is pauk te Megbevayà he ibpeehè din kandan, kekenà, utew meveg̵at is idsilut din kandan.

1 Kurintu 1:11

Umba egkeg̵iyen ku heini, menge suled, su zuen menge zuma ni Keluwi he midtudtul kedì he egkengetebektebek kew ziyan.

1 Kurintu 14:33

Kenà egkesuatan te Megbevayà he mebperedredseey kew emun edtig̵um kew is edsimba kandin. Su kenà iyan in-ulin kenitew is kegkeliveg̵i, kekenà, iyan is melinawen he ulaula.

1 Kurintu 5:2

Ne minsan pa zutun kemulu kew pa ebpegalbu. Kunaan niw vuwa ke utew meupiya is ulaula niw! Deyzey pezem ke egkeseeng kew. Kinahanglan pezem he wazè niw tug̵uti heeyan is maama he mebpekiduma keniyu.

2 Kurintu 1:23

Siluti a te Megbevayà emun kenà tutuu is egkeg̵iyen ku. Netuenan din he iyan ketezengan ke maan is wazà a mekepenumbaley ziyan te Kurintu su wey kenè kew meseeng pinaag̵i te kedsusiya ku te menge ulaula niw.

2 Kurintu 10:2

Idhangyù ku keniyu he purungi niw is ulaula niw su wey kenà kinahanglan he mebmeg̵arang is menge lalag ku emun diyan a te keniyu. Duen duma keniyu he egkag̵i he iring a te etew zà duen he kenà dekelà diyà te g̵ehinawa zin is egkesuatan te Megbevayà. Ne hanu man su kayi te kedhendiyan ku te keniyu emun kenè dan ebpurungan is menge ulaula zan, ne egkeehè dan ke sengemenu keg̵arang is menge lalag ku.

2 Kurintu 10:6

Ne emun ibpeehè niw en he metinumanen kew te menge sug̵ù ni Kristu, ne zutun edsilutan dey is minsan hentei pa he tumutuu ziyan he kenè pa egkesuat he ebpemineg te menge sug̵ù din.

2 Kurintu 12:21

Egkesemukan a su kela ke zutun te kebpekeuma ku ziyan ne igkeeled ku sikiyu ziyà te Megbevayà ne kela ke utew a egkeseeng tenged te mezakel he netuenan ku zengan he nekevaal te mezaat ne wazè dan pa engkezi is menge mahawag he ulaula zan iring te kedhilavet te kenè dan esawa wey is kedtumana zan te mezaat he kebayè dan.

2 Kurintu 13:2

Dutun te ikezuwa he kebpenumbelayi ku keniyu, sikiyu is memezaat is ulaula zengan, migkag̵i ku keniyu he emun kenè niw ed-engkezan haazà is memezaat he ulaula niw ne edsilutan ku sikiyu emun ebpekelikù a. Ne ed-umanan ku egkeg̵iya g̵untaan diyan te keniyu wey ziyà te minsan hentei pa he ed-ulaula te mezaat. Ke ebpekeuma a, wazà minsan hentei he ed-ulaula te mezaat he ebpekelikey te kedsiluti ku kandin.

2 Kurintu 2:1

Ne tenged kayi, menge suled, neisip ku he kenà ad ed-uman ebpenumbaley ziyan emun iring ded dutun te nehuna he kedhendiyan ku, su zutun ingkeseeng niw is kebpenumbaley ku.

Gelasya 5:15

Iyan, emun iyan niw zà ed-ul-ulahan is kebpepespesipelehey wey kebpeeg-eg̵età, ne egkepurung egkezeeti is upakat niw te menge tumutuu ki Kristu.

Gelasya 5:26

Kinahanglan he kenè ki ebpelavew, kenè ki zaan ebpekidtebek te menge zuma he etew, kenè ki zaan egkesina te zuma ta.

Santiago 4:11

Menge suled, kenè kew mebpesudsudiey wey mebpesewsewayà su is edsudì wey edsawey te zuma zin he tumutuu, ne iring te edsudien din wey edsewayen din is lavew he sug̵ù. Ne emun edsewayen ta haazà is sug̵ù, kenè ta edtumanen, kekenà, edsumpeliten ta.

1 Pedro 2:1

Ne g̵eina te veg̵u ki en he etew, ed-iniyug̵an te en is minsan hengkey he kebpesipala wey is kedtarùtarù. Kinahanglan he kenà tarù is kedsundan ta te Megbevayà; kenè ki egkesina ne kenè ki ebpemenulà.

2 Pedro 2:18

Uvag mezalem is menge lalag dan, iyan, wazà pulus te egkeg̵iyen dan. Duen menge etew he ed-engkezan dan pezem is menge zaan he zuma zan he ed-ulaula te sayep, iyan, ebpenulayen sikandan dutun te menge menunudlù pinaag̵i te meremerik he kebayà te lawa zan.

Hudas 1:16

Ne haazà is menge etew he netagnà ni Inuk, menge perelivak wey perevasul sikandan. Iyan dan edtumanen is menge memezaat he kebayè dan. Memepelevawen dan, iyan, edigdig̵en dan is menge zuma he etew su wey zan melimbungi.