2 Kurintu 12:2 - Manobo Western Bukidnon

² Dengan, duen tumutuu he nekilala ku he mibpengelinteuwan he mekepenumbaley sikandin diyà te utew metikang he langit he ed-ubpaan te Megbevayà. Sepulù en wey heepat he tuig heini is kegkehitavù kayi. Wazè ku metueni ke nekehendiyè be is lawa zin wey ke impeehè dè be heini kandin te Megbevayà pinaag̵i te teg̵einep; iyan dà nesayud kayi is Megbevayà.

2 Kurintu 12:2 Кръстосани препратки

Lucas 24:51

Ne zutun te kemulu pa sikandin ebpenuvadtuvad ne nevatun sikandin pehendiyà te langit.

Juan 6:56

Is egkaan te lawa ku wey ed-inum te lengesa ku, kenà ed-awà dini te kediey ne siak, kenà a zaan ed-awà diyà te kandin.

Nengeulaula 14:6

Ne hein netuenan heini eni Pablo, mibpelag̵uy zan pehendiyà te inged he Dirbi wey Listera wey te siringan dutun he menge inged diyà te prubinsya he Likeunya.

Nengeulaula 22:17

Ne mid-ulì a zini te inged he Hiruselim ne zutun te ked-ampù ku ziyà te simbahan he Valey te Megbevayà, duen mibpaahà kediey.

Ruma 16:10

Ipengemusta a ki Epilis. Netuenan te langun he metinumanen sikandin te menge sug̵ù ni Kristu. Ipengemusta a te pemilya ni Eristubulu.

Ruma 16:3

Ipengemusta a ki Priscila wey si Ekilu. Menge timbang ku sikandan te kedtumana ku te ebpeveelan kedì ni Jesu Kristu.

Ruma 16:7

Ipengemusta a zaan ki Andruniku wey si Hunias. Menge zuma ku sikandan he Hudiyu he mibpirisu zuma kedì. Telehuzen sikandan te menge epustul, ne nehuna sikandan neketuu ki Kristu, ne human a.

Ruma 16:9

Ipengemusta a zaan ki Urbano te zuma ku he sulug̵uen ni Kristu wey si Istakis he utew ku zaan emig̵u.

Ruma 8:1

Ne sikita is nekidsevaha ki Jesu Kristu, kenè ki en egkehukuman te silut.

1 Kurintu 1:30

Ne minsan pa zutun, midhimu te Megbevayà he mesevaha si Jesu Kristu wey sikitew ne midhimu zin daan he zuen ketau tew he ebpuun te ki Kristu. Ne pinaag̵i ki Kristu mid-isip kiw en he metazeng te Megbevayà ne nehimu kiw en daan he menge g̵aked te Megbevayà, ne nevelukasan kiw zin te kegkeuripen tew te mezaat he ulaula.

2 Kurintu 11:11

Kunaan niw vuwa ke umba egkeg̵iyen ku he kenà a ebuyù diyan te keniyu su wazà gehinawa ku keniyu, iyan, utew kew mahal zini te g̵ehinawa ku. Netuenan te Megbevayà he mahal kew zini te g̵ehinawa ku.

2 Kurintu 13:5

Susiya niw is gehinawa niw wey niw metueni ke tutuu ve is kedtuu niw ki Kristu. Wazè niw ve metueni he midlumunan kew ni Kristu? Ne emun wazà, ne tarù is kedtuu niw ne wazè kew mezawat ni Kristu.

2 Kurintu 5:17

Ne sikan is etew he nekidsevaha en ki Kristu, beg̵u en sikandin he linimbag. Nahanew en diyà te kandin is daan he netag̵ù te isip din ne mid-ilisan en heini te veg̵u.

2 Kurintu 5:21

Wazà minsan hengkey he mezaat he ulaula ni Kristu, iyan, midhimu te Megbevayà he iyan sikandin midsilutan tenged te salè tew su wey pinaag̵i te kebpekidsevaha tew kandin, egkehimu he ed-isipen kiw he metazeng te Megbevayà.

Gelasya 1:22

Ne wazè e pa zutun mekilala te menge gurupu te menge tumutuu ki Jesus he ziyà te prubinsya he Hudiya.

Gelasya 5:6

Su emun tumutuu ki en ki Jesu Kristu, neked-iiring kiw en diyà te Megbevayà is nengesirkunsidar wey is wazà mesirkunsidar. Iyan dà duen din pulus diyà te Megbevayà is kedtuu ta kandin he egketuusan heini pinaag̵i te g̵ag̵ew ta te zuma ta.

Ipisu 4:10

Ne haazà is midhendini te tanà he iyan si Kristu, iyan daan sikandin nevatun pehendiyà te langit wey minsan diyà dapit te utew metikang he langit. Ne umba mid-ulaula zin heini su wey mehimu he ziyà sikandin te minsan hendei te tivuuk he kelimbag̵an.

1 Tiselunika 4:17

Ne human kiw is menge uuyag pa, ebpekezuma kiw zaan kandan diyà te menge g̵apun su edtelavuk kiw te Nengazen diyà te zivavew. Ne zutun kenè kiw en ebpekesuwey te Nengazen te wazà pidtemanan.

Hibriyuhanen 4:14

Ne tenged kayi, menge suled, edhemenan tew is kedtuu he impenurù kenitew. Su zuen utew lavew he memumuhat he iyan datù tew he nekid-etuvang en te Megbevayà. Iyan heini si Jesus he Anak te Megbevayà.

Hibriyuhanen 9:24

Dutun te kebpemuhat ni Kristu, wazè sikandin medseled diyà te utew mahal he rug̵u te simbahan he zini te kelibutan su alung dà heini te tutuu he simbahan he ziyà te langit. Iyan midselezan din kes tutuu he simbahan he ziyà te langit ne g̵untaan iyan sikandin datù tew he edtavang kenitew ziyà te etuvangan te Megbevayà.

Impezayag 1:10

Ne zutun te sevaha he andew he Duminggu, utew mezesen is ked-uwita kedì te Wag̵as he Mulin-ulin ne zuen impeehè din kedì. Diyà te egkeiniyug̵an ku nezineg ku is egkag̵i he iring te vudyung su utew mezag̵ing,

Impezayag 12:5

Ne zutun inlusad is batà he maama. Ne haazà is batà, edhedian din keuzemà is langun he menge g̵inhedian dini te kelibutan ne wazà ebpekesukul kandin dutun te kedhadì din. Ne haazà is batà, midsekelew te Megbevayà ne mibatun din diyà te langit, diyà te pinuuwà te kedhadì din.

Impezayag 4:2

Ne zutun impehendiyà a te Wag̵as he Mulin-ulin. Ne hein diyè e en te langit, neehè ku is pinuuwà te edhadì ne zuen ebpimpinuu zutun.