2 Kurintu 11:3 - Manobo Western Bukidnon

³ Egkeipeng a keniyu su kela ke meengkezi niw is kebpurungi niw kedtumana te menge sug̵ù ni Kristu su kela ke mesahug is kedtuu niw te selakew he edtuuwen. Kela ke meiringi niw si Ibà dengan su mid-akalan sikandin te teruen he uled he iyan si Setanas.

2 Kurintu 11:3 Кръстосани препратки

Mateo 24:24

Su zuen ebpemenlepew he menge teruen. Ne egkag̵i is kada sevaha kandan te, ‘Iyan a sikan is hadì,’ ne emun kenà, ne ke sikandin te, ‘Ebpeneuven a te Megbevayà.’ Ne ebpemeehè dan te egkein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà.

Juan 8:44

Iyan amey niw si Setanas, ne is egkesuatan te amey niw, iyan daan egkesuatan niw he meveeli niw. Puun pa te puunà ne memumunù en si Setanas. Ne wazè din kelavet te tutuu he tuluuwen su wazà diyà te kandin is minsan hengkey he tutuu. Emun egkag̵i sikandin, ne tarù is lalag din su tarù dà is egkeisip din. Teruen man sikandin wey ziyà te kandin ebpuun is minsan hengkey he tarù.

Ruma 12:8

Ne emun iyan imbeg̵ey kenita is ketau te kedheg̵eta te kedtuu te menge zuma ta ne iyan heini ed-ul-ulahan ta. Ne emun iyan imbeg̵ey kenita is ketulanged ta te kedtavang te menge etew he egkengeayuayu, ne kinahanglan he edtulanged ki te kedtavang kandan. Ne emun iyan imbeg̵ey kenita is kedumelaha te menge tumutuu ne kinahanglan he ebpurungan ta is kedumala ta. Ne emun iyan imbeg̵ey kenita is kedtavang te menge etew he edlised ne kinahanglan he kenà pinaag̵i te ked-usur is ked-ul-ulaha ta kayi.

2 Kurintu 1:12

Duen, menge suled, idantal zey ne netuenan dey he tutuu heini, ne iyan is: layun meupiya is ulaula zey ziyà te minsan hentei he etew, lavew en diyan te keniyu. Su layun key edtuman te egkesuatan te Megbevayà ne utew hustu is tuyù dey. Wazè dey g̵emita is ketau zey te etew zà duen, kekenà, iyan igkehimuwa zey te langun is mekeg̵eg̵ehem he tavang te Megbevayà.

2 Kurintu 11:20

Su ke zuen minsan hentei he ebmandarmandar keniyu wey ke zuen ed-ag̵ew te menge azen niw wey ke zuen edlimbung keniyu wey ke edlupig̵en kew zan wey ke ebug̵elen kew zan ne ed-entusen niw.

2 Kurintu 11:29

Su ke zuen tumutuu he edlised su ebmeg̵uyà is kedtuu zin, ne edlised a zaan su egkeipeng a kandin. Ke zuen nepenulayan ne nekesalà, ne haazà is etew he nekepenuley kandin, utew ku igkeepes.

2 Kurintu 2:17

Iyan, sikami, kenè dey ed-iringan is ulaula te mezakel he ebpenurù su ziyà te kandan henduen be te ibpenapì dan is Lalag te Megbevayà. Ne tenged te midsugù key te Megbevayà, ne tenged daan te edsusiyen key layun te Megbevayà, tutuu is tuyù dey wey egkeg̵iyen dey su nekidsevaha key ki Kristu.

2 Kurintu 4:2

Sikan is menge mahawag he ulaula he meeles he ebeelan te zuma, kenè dey mulà ebeelan. Kenè key edtarùtarù ne kenè dey edhelinen is Lalag te Megbevayà, kekenà, hustu is kedsengyawa zey su wey mesavut te minsan hentei he kenà tarù is ebeelan dey. Iyan edsusi kayi is Megbevayà.

Gelasya 1:6

Utew ku sikiyu igkeinuinu su wazè en utew meug̵et ne henduen be te nahalin en is kedtuu niw, ne is Megbevayà he iyan mibpetuu keniyu pinaag̵i te g̵ag̵ew ni Kristu, ed-iniyug̵an niw ne edtuuwan niw is selakew he tuluuwen he egngezanan daan te menge etew he Meupiya he Tudtulanen.

Gelasya 2:4

Iyan, duen menge etew he kenà tutuu he menge tumutuu te tutuu he tuluuwen he midtampu kenami. Egkesuatan dan dutun he sirkunsidara si Tito. Umba midtampu zan he id-eles dan he kenè dan tutuu he tumutuu su wey zan maahà ke edtumanen tew is menge sug̵ù he imbilinbilin ni Moises. Su egkesuatan dan he meiring kiw te uripen pinaag̵i te kedtuman te kesug̵uan minsan te nelibri kiw en ni Jesu Kristu ne wazè en kinahanglan he ebenteyanan tew pa is kesug̵uan.

Gelasya 3:1

Sikiyu is menge tigGelasya, henduen be te kenè kew metau he ed-isip-isip! Utew a egkeinuinu keniyu! Maan is ebpemineg̵en niw is menge etew he ebpetuman keniyu te kesug̵uan he imbilinbilin ni Moises? Utew keladu is kebpenurua ku keniyu te nehimu ni Jesu Kristu kenitew pinaag̵i te kebpatey zin diyà te krus.

Gelasya 4:11

Utew ku sikiyu igkeipeng su kela ke kenà ebpulus is langun he impenurù ku keniyu.

Ipisu 4:14

Dutun ne egkehimu he kenè kiw en ebpekeiring te vatà su is etew he iring dutun ne egkehalinhalin is kedtuu zin su melemu ebpeketuu te minsan hengkey he tuluuwen he ibpenurù kandin te menge teruen he etew he metau he edlimbung.

Ipisu 4:22

Tenged kayi engkezi niw is menge isip te zaan he kegkeetew niw su nesakup heini te zaan he menge mezaat he ulaula niw. Ebpekezezaat keniyu heini pinaag̵i te ebpemekelimbung he kebayè din.

Ipisu 6:24

Berakat he ikeg̵ag̵ew te Megbevayà is minsan hentei he kenà egkeawà diyà te g̵ehinawa zin is kebmahala zin te Nengazen tew he si Jesu Kristu.

Kulusas 2:18

Duen daan menge etew he egkag̵i he lavew sikandan tenged te zuen kun menge egkein-inuwan he impaahà kandan wey tenged te kenè dan mepelevawen. Ne ibpenurù dan he kinahanglan he ebpekeazap ki te menge velinsug̵uen te Megbevayà ziyà te langit. Kenè niw, menge suled, itetenged is kedsudì dan keniyu su is iring dutun he etew, ne ebpezalig dà, iyan, wazà hustu he ketezengan te kebpezalig dan su iyan ebayàbayà te isip dan is kelibutanen he kebayè dan.

Kulusas 2:4

Egkeg̵iyen ku heini su wey wazà mekekabig keniyu he minsan hentei pinaag̵i te menge ketezengan he henduen be te hustu, iyan, tarù.

Kulusas 2:8

Andam kew su kela ke zuen egkabig keniyu pinaag̵i te kebpenurù te tuluuwen he tarù ne wazè din pulus su imbilinbilin dà te menge etew. Kenà haazà hustu he tuluuwen su kenà ebpuun diyà te ki Kristu.

1 Tiselunika 3:5

Ne tenged kayi hein kenè ku en egkeantus is kegkeipeng ku keniyu, midsug̵ù ku ziyan si Timoteo wey ku metueni ke nemenumenu en is kedtuu niw. Nahandek a su kela ke nepenulayan kew ni Setanas ne naawà is pulus te kedhag̵ù dey ziyan te keniyu.

1 Timoteo 1:3

Ed-umanan ku egkeg̵iya kenikew is sambag ku hein mid-awà a ziyan pehendiyà te Mesidunya. Iyan is: kenè ka med-awà diyan te Ipisu. Iyan idsembag̵i ku kenikew su zuen menge etew ziyan he kinahanglan he zewaya nu. Dewaya nu he med-engked dan te kebpenurù te menge sayep he tuluuwen

1 Timoteo 2:14

Ne kenà iyan si Adan neekalan ni Setanas, kekenà, iyan si Ibà neekalan ne tenged dutun nekesupak sikandin te intelaan kandan.

2 Timoteo 3:13

Iyan, is menge lalung he etew, wey is menge uvag kun tumutuu, ed-iseg mulà ebmezaat is menge ulaula zan. Edtezinen dan is isip te menge etew, iyan, egketazin daan is kandan he isip.

Tito 1:10

Umba egkeg̵iyen ku heini su zuen mezakel he menge zuma niyu ziyan he edsumpalit te hustu he penurù. Iyan is menge Hudiyu he tumutuu en ki Kristu. Wazà pulus te egkeg̵iyen dan wey tarù is ibpenurù dan.

Hibriyuhanen 13:9

Umba, kenè niw tuuwi is menge selakew he tuluuwen he kenà iyan kes tutuu he impenurù keniyu. Iyan hustu he ibmelig-en te kedtuu tew is kedtevangi kenitew te Megbevayà, ne kenà iyan is kedlikayi te menge egkeenen he indawey te kesug̵uan su wazà heini ikezeyzey te menge etew he ebantey kayi.

2 Pedro 3:17

Minahal ku he menge suled, geina te netuenan niw en heini he zaan, andam kew su wey kenè kew meketuu te menge tarù he ibpenurù te menge lalung he etew ne egkelipatan niw is tutuu he tuluuwen he midtuuwan niw.

2 Pedro 3:3

Idhuna ku keniyu ibpesavut he keuzemà te ketepusan he timpu duen ebpemenlepew he menge etew he iyan ebayàbayà kandan is menge mezaat he kebayè dan. Edsumpeliten kew zan he egkag̵i te,

1 Juan 2:18

Menge anak ku, meg̵aan en egketapus heini is timpu. Nezineg niw en he keuzemà duen edlepew he egeraran te Kuntada ni Kristu. Guntaan duen en mezakel he menge kuntada ni Kristu ne tenged dutun netuenan ta he meg̵aan en iyan egketapus heini is timpu.

1 Juan 4:1

Menge minahal ku he suled, kenè niw petuluy tuuwi is etew he egkag̵i he mid-ulinan sikandin te Wag̵as he Mulin-ulin. Gezami niw zè pa wey niw metueni ke ebpuun be te Megbevayà is ed-ulin kandin. Umba egkeg̵iyen ku heini su mezakel en is menge ebpenurù te tarù he midlepew zini te kelibutan he mid-ulinan sikandan te teruen he mulin-ulin.

Hudas 1:4

Umba kinahanglan he egkeg̵iyen ku heini su zuen menge etew he nekeamur keniyu, iyan, id-eles dan he kenà hustu is edtuuwan dan. Wazè dan kedtahud te Megbevayà; edhelinen dan pezem is tutuu he tuluuwen su ibpenurù dan he egkehimu ke ed-ul-ulahan tew is meremerik su utew kun belig̵eg̵awen is Megbevayà ne ebpeseyluwen kiw zin gihapun. Kenè dan edtuu he si Jesu Kristu, iyan dà egalen tew wey Nengazen tew. Dengan dà isurat te menge ebpeneuven te Megbevayà ke hengkey is silut kandan.

Impezayag 12:15

Ne zutun, haazà is uled, impelepew zin diyà te vèbè din is dekelà he wahig su wey maanud haazà is bahi,

Impezayag 12:9

midsegseg haazà is dekelà he uled puun te langit. Ne haazà he deragun, iyan si Setanas, sikan is mezaat he mulin-ulin he mid-ekalan din is tivuuk he menusiyà. Ne sikandin wey is langun he menge velinsug̵uen din, intimbag sikandan pehendini te tanà.

Impezayag 20:2

Ne midakep din sikan is dekelà he uled he deragun he iyan ded sikan is uled dengan he iyan daan kes mezaat he mulin-ulin he si Setanas ne mibpusasan din. Ne kenà ibpaawà haazà seled te nengkelibu he tuig.