2 Kurintu 11:23 - Manobo Western Bukidnon

²³ Netuenan ku he henduen a te ebuneg̵en kayi te menge lalag ku, iyan, kenà egkesabpeng is bèbè ku kayi te egkeg̵iyen ku. Egkeg̵iyen dan he menge sulug̵uen sikandan ni Kristu. Siak, lavew e pa he metinumanen he sulug̵uen ni Kristu. Utew memereg̵en is ebpeveelan din kediey. Lelayun ad egkepirisu ne sikandan, kenà layun. Lelayun ad ebug̵ela te menge etew he kuntada te Megbevayà, kenà te sikandan. Mezakel en is nengeeg̵iyan ku he edhimetayan a pezem, kenà te sikandan.

2 Kurintu 11:23 Кръстосани препратки

Nengeulaula 14:19

Ne nekeuma is menge Hudiyu he tig-Entiyukya ziyà te prubinsya he Pisidya wey elin dutun is menge Hudiyu he tig-Ikunya. Midhimu zan he mengepauk engki Pablo haazà is menge etew. Midtuleng dan si Pablo te vatu ne miguyud dan in-awà dutun te inged su kunaan dan ke minatey en.

Nengeulaula 20:23

Iyan dà egketuenan ku is: diyà te kada inged he imbayè dey ne impezayag kedì te Wag̵as he Mulin-ulin he egkepirisu ad ne mezakel pa he kemereg̵enan is egkeseg̵azan ku.

Nengeulaula 21:11

Mid-uvey ziyà te kenami ne migkuwa zin is bakes ni Pablo ne imbakus din te kandin he menge paa wey menge velad din ne ke sikandin te, “Ibpesavut kenitew te Wag̵as he Mulin-ulin he is teg̵ig̵aked kayi te vakes, iring kayi is kebekusa kandin te menge Hudiyu ziyà te Hiruselim ne ibpalad dan sikandin diyà te kenà menge Hudiyu.”

Nengeulaula 25:14

Ne nekepira pa zutun impesavut ni Pistu ki Egripa is kasu mehitenged ki Pablo, ke sikandin te, “Duen pirisu kayi he wazà libriya ni Felix.

Nengeulaula 27:1

Ne hein neisip dan he ibpeuntud key en te barku su ibpeuwit key ziyà te Italya, impalad dan si Pablo wey is duma pa he pirisu ziyà te ki Julio. Si Julio, serhintu sikandin te kumpeniya te sundaru he egngezanan te Kumpeniya te Lavew he Hadì.

Nengeulaula 28:16

Ne hein diyè key en te Ruma wazà si Pablo iseled te pirisuwan, kekenà, impeveyàbayà sikandin ke hendei ed-ubpà, asal zuen sundaru he ebantey kandin.

Nengeulaula 28:30

Ne seled te zezuwa pa he tuig dutun, diyà med-ubpà si Pablo te valey he mibpilitiyan din ne impepemenahik din is minsan hentei he ebpenumbaley ziyà te kandin.

Nengeulaula 9:16

Ne ibpesavut ku kandin he mezakel is menge kemereg̵enan he egkeeg̵iyan din tenged te sulug̵uen ku sikandin.”

Ruma 8:36

Su zuen insurat dengan he Lalag te Megbevayà he edhenduen te, “Tenged te midtuuwan dey sikew, layun key hapit edhimetayi te menge etew. Iring key te ayam he kerehidu he in-andam te kedlepaa su ebpespesesag̵ad key zà ke keenu key edhimetayi.”

1 Kurintu 15:10

Iyan, utew zekelà is hizu kediey te Megbevayà. Umba nehimu a he epustul su zuen pulus te kegkehizuwi zin kediey. Tenged kayi, dekelà is nehimu ku kenà te nehimu te langun he menge zuma ku he epustul, asal, kenà a iyan is nekehimu kayi, kekenà, nehimu heini is langun pinaag̵i te tavang te Megbevayà.

1 Kurintu 3:5

Isipa niw man heini. Siak si Pablo, hentei a? Ne hentei zaan si Epulus? Sulug̵uen key zà te Megbevayà. Pinaag̵i kenami midhimu zin he meketuu kew. Edtumanen dey zà is ebpeveelan din kenami. Ne iyan dà ed-ul-ulahan dey.

1 Kurintu 4:1

Ne sikami is ebpenurù, kinahanglan he isipa key keniyu he menge sulug̵uen dà ni Kristu. Insarig te Megbevayà kenami is kedseysaya te langun he menge in-eles din dengan he tuluuwen.

1 Kurintu 4:11

Sikami, minsan guntaan, egkealang-alang key te egkeenen dey wey ed-inumen dey; ebpemug̵elen key ne minsan is hustu he ugelingen dey, ne wazà. Ne minsan is ed-ubpaan dey ne wazà daan.

1 Kurintu 4:9

Umba egkekag̵i ku heini su sikami is menge epustul, midhimu te Megbevayà he iyan key menge etew he utew minus is pid-etawan din. Iring key te menge pirisu he edhimetayan he ebentayan te langun he menge linimbag, wey te tivuuk he menusiyà, wey te langun he menge velinsug̵uen te Megbevayà he ebpemuun te langit.

2 Kurintu 10:7

Purungi niw isipa is nesavut niw en su zuen menge zuma niw he kunaan dan ke iyan dan dà menge hustu he sulug̵uen ni Kristu. Kinahanglan he mesavut dan he sikami, hustu key zaan he menge sulug̵uen ni Kristu.

2 Kurintu 11:5

Ne heini is menge uvag kun lavew he epustul ni Kristu, kunaan dan ke utew zan lavew, iyan, netuenan ku he wazè e zan melevawi

2 Kurintu 3:6

Su iyan sikandin ebeg̵ey kenami te ketau wey zey ikepenurù is beg̵u he paag̵i he midtukud din te kebpekidsevaha zin te menusiyà. Ne wazà heini is beg̵u he paag̵i iveg̵ey pinaag̵i te insurat he kesug̵uan, kekenà, imbeg̵ey zin heini kenitew pinaag̵i te Wag̵as he Mulin-ulin. Su emun iyan ta edserig̵an is kedtumana ta te kesug̵uan, ne kemetayen he wazà pidtemanan is ebperetengen ta. Iyan, ke ibeg̵ey kenitew is Wag̵as he Mulin-ulin ne untung he wazà pidtemanan is ebperetengen ta.

2 Kurintu 4:11

Su minsan keenu he timpu kenà egkeawà dini te kenami is kebpemiligru zey te menge etew he egkesuat he edhimatey kenami tenged te kedsengyawa zey te ngazan ni Jesus. Umba egkeulaula zini te kenami heini su wey metueni he uuyag en maan si Jesus su layun key zin edtevangan su wey key kenà mehimetayi.

2 Kurintu 6:9

Duen egkag̵i he utew minus is pid-etawan dey, iyan, nasì dekelà is bentug̵an dey. Layun key ed-ed-edisi te kemetayen, iyan, idtug̵ut pa te Megbevayà he kenè key pa mebpatey. Edsilutan key te Megbevayà wey key mepenurù, iyan, kenè key zin edhimetayan.

Gelasya 6:17

Puun dà guntaan, kinahanglan he wazà minsan hentei he megkag̵i he wazà iveg̵ey kediey ni Jesus is keg̵ehem te kebpenurù. Egketuusan kayi te lawa ku is kedtumana ku te menge sug̵ù ni Jesus. Mezakel is menge tulak te menge palì ku he nehimu te menge kuntada ni Jesus.

Ipisu 3:1

Ne tenged kayi te langun, siak si Pablo, is pirisu tenged te kedsundan ku ki Jesu Kristu, layun ku sikiyu id-ampù diyà te Megbevayà. Umba nepirisu a su insangyew ku is Lalag te Megbevayà diyan te keniyu te kenà menge Hudiyu.

Ipisu 4:1

Ne tenged kayi te langun, siak is pirisu tenged te midtuman ku is menge sugù te Nengazen, edhengyuan ku sikiyu he g̵eina te midhimu kew te Megbevayà he menge tumutuu zin, ul-ulaha niw is ulaula he zait he ed-ul-ulahan te tumutuu.

Ipisu 6:20

Umba nehimu a he sulug̵uen te Megbevayà su wey ku ikepenudtul heini is Meupiya he Tudtulanen. Ne tenged daan kayi te kebpenudtul ku, nehimu a he pirisu. Umba, menge suled, iampù a su wey kenà a mahandek te kebpenudtul su iyan heini ketengdanan he imbeg̵ey kediey te Megbevayà.

Pilipus 1:13

Su is langun he menge sundaru he guwardya zini te turug̵an te hadì wey is minsan hentei pa kayi, ne netuenan dan he mibpirisu a tenged dà te sulug̵uen a ni Kristu.

Pilipus 2:17

Is kedtuu niw te Megbevayà, ne iring te pemuhat he edewaten din. Ne emun egkesuatan din pa he id-uman is kebpatey ku kayi te pemuhat, igkelipey ku pa. Ne igkelipey ku zaan is kedtuu niw iring te nelipey kew.

Kulusas 1:24

Maambe ke ebpekeantus a g̵untaan te merasey su iyan igkezeyzey niw. Igkelipey ku heini su iring te kegkerasey ni Kristu edhimesazan ku en is langun he mereg̵en he ibpaantus din kediey su wey mezeyzey is lawa ni Kristu, he ke và dà egkeg̵iya, is menge tumutuu kandin.

Kulusas 1:29

Siak, ebpenigudu a ebaal he edlig-enan te zekelà he zesen ni Kristu su wey metuman heini.

1 Tiselunika 3:2

Ne zutun midsug̵ù dey ziyan si Timoteo he suled tew wey sulug̵uen daan te Megbevayà te kegkesengyawa te Meupiya he Tudtulanen mehitenged ki Kristu. Iyan insug̵ua zey kandin su wey zin meheg̵eti is kedtuu niw ne wey kew zin mesembag̵i

1 Timoteo 4:6

Emun ibpenurù nu heini ziyà te menge zuma he tumutuu egkehimu ka he metinumanen he sulug̵uen ni Jesu Kristu. Ne egkeheg̵et is kedtuu nu pinaag̵i te ked-istudyu nu te tuluuwen tew wey pinaag̵i te kedhamen nu te hustu he impenurù kenikew.

2 Timoteo 1:16

Iyan, berakat he mehizuwi te Nengazen si Unisipuru wey pemilya zin. Su layun e zin edtevangi kayi te menge keseengan ku. Wazè din ikeeled is kebpenumbaley zin kedì te pinirisu,

2 Timoteo 1:8

Ne tenged dutun kenè nu ikeeled is kebpenurù nu mehitenged te Nengazen tew ne kenà a zaan kenikew ikeeled is gaked din wey nepirisu tenged te kedsengyawa kandin, kekenà, pinaag̵i te g̵ehem te Megbevayà he idtavang kenikew, ambit ka zaan kayi te ked-entusa ku te kemeresayan tenged te kedsengyawa te Meupiya he Tudtulanen.

2 Timoteo 2:9

Ne tenged kayi te kebpenudtul ku te Meupiya he Tudtulanen midrasey a te menge kuntada te Megbevayà ne neeg̵en a te kedina he iring te mesinupaken, iyan, kenà mulà egkeeg̵en is Lalag te Megbevayà.

2 Timoteo 3:11

Netuenan nu zaan is menge kemeresayan wey menge keseengan he nengeantus ku. Netuenan nu zaan is langun he neeg̵iyan ku ziyà te menge inged he Entiyukya, wey Ikunya, wey Listera wey is langun he utew merasey he naantus ku. Is Megbevayà, ne midlibri e zin kayi te langun.

Pilimun 1:9

iyan, tenged te utew ka mahal zini te g̵ehinawa ku, edhangyù e zà kenikew. Siak, si Pablo, is meg̵urang wey g̵untaan pinirisu a zaan tenged te kedtuu ku ki Kristu,

Hibriyuhanen 10:34

Ne nehizuwan niw, ne midtevangan niw is menge tumutuu he nengepirisu. Ne minsan pa te mibpen-ileg te menge etew is langun he menge azen niw, midlipey kew gihapun su netuenan niw he zuen azen niw he utew pa meupiya ziyà te langit he kenà egkeileg diyà te keniyu te wazè din pidtemanan.