2 Kurintu 10:1 - Manobo Western Bukidnon

¹ Duen egkag̵i he siak, si Pablo, telawen a emun diyan a te keniyu, iyan, memeg̵arang kun is menge lalag ku keniyu emun edlelag̵an ku sikiyu pinaag̵i te surat. Iyan, guntaan, kenà meg̵arang is menge lalag ku, kekenà, edhangyù a keniyu pinaag̵i te menayù he menge lalag iring te menayù wey velig̵eg̵awen si Kristu.

2 Kurintu 10:1 Кръстосани препратки

Mateo 11:29

Beeli niw is idsug̵ù ku keniyu ne pepenurù kew kedì ne ebpekehimeley kew su kenà a eengeren ne kenà a ebpenlupig te minsan hentei.

Mateo 21:5

“Tudtuli niw is menge meg̵inged diyà te Siyun te, ‘Ebpekeume en guntaan is hadì niw. Kenà meinit is kedhadì din keniyu ne ed-untud sikandin te nati te asnu;’ ” iyan heini lalag dutun te ebpeneuven.

Nengeulaula 8:32

Iyan ebesahan dutun te upisyal is insurat ni Esaias dengan he edhenduen te, “Iring sikandin te vuutan he kerehidu he migkuwa zan su edhimetayan. Ne wazà migkag̵i zin su iring sikandin te nati he kerehidu he kenà ed-erang ke ed-elutan.

Ruma 10:20

Ne keladu pa utew is Lalag te Megbevayà he impenudtul zengan ni Esaias su edhenduen te, “Neturedu a te menge etew he kenà ebpen-ahà kedì, ne minsan ke wazè e zan iinsà, impesavut ku kandan ke hentei a,” ke sikandin.

Ruma 12:1

Na, menge suled, tenged te utew zekelà he hizu kenitew te Megbevayà, edhengyuan ku sikiyu he ipeveyveyai niw kandin is lawa niw wey g̵ehinawa niw. Iyan heini ibpemuhat he kenà edhimetayan, ne kinahanglan he wazà igkesawey zuen su wey mesuati te Megbevayà. Ne iyan heini hustu he ked-ezapa niw kandin.

Ruma 15:15

Ne minsan pa te iyan heini, kayi te surat ku kenà a egkelenew he edsambag keniyu su zuen mezakel he impenurù keniyu he kenè ku egkesuatan he melipati niw. Umba kenà a egkelenew su mibeg̵ayan a te Megbevayà te keg̵ehem

1 Kurintu 2:3

Ne hein nekeuma a ziyan te keniyu utew a migkulbai su utew a egkehandek su kela ke kenè ku egkehimu is ebpeveelan kedì te Megbevayà.

1 Kurintu 4:10

Sikami, egkeg̵iyen te menge etew he kenè key metau he ed-isip su ibpenurù dey is lalag ni Kristu. Ne sikiyu mulà, egkeg̵iyen niw he utew kew metau tenged te kedtuu niw ki Kristu! Telawen key kun, iyan, sikiyu, utew kew memevurut! Edtehuzen kew te menge etew, iyan, sikami, kenè key mulà edtehuzen, kekenà, ebpesipelahan key zan.

1 Kurintu 4:21

Ne hendei zapit is egkesuatan niw? Emun kenè niw ed-iniyug̵an is mezaat he ulaula, ebeyaan ku sikiyu wey ku sikiyu mesiluti. Ne emun meupiya is ed-ul-ulahan niw, meupiya g̵ihapun is kebpenumbaley ku ziyan, ne zekelà is gag̵ew ku wey hizu ku keniyu.

2 Kurintu 10:10

iyan, duen egkag̵i he siak si Pablo, utew a mevurut he edawey keniyu emun ebpekidlalag a keniyu pinaag̵i te surat, iyan, emun diyan a te keniyu, telawen e kun ne kenè e kun metau he egkag̵i.

2 Kurintu 10:2

Idhangyù ku keniyu he purungi niw is ulaula niw su wey kenà kinahanglan he mebmeg̵arang is menge lalag ku emun diyan a te keniyu. Duen duma keniyu he egkag̵i he iring a te etew zà duen he kenà dekelà diyà te g̵ehinawa zin is egkesuatan te Megbevayà. Ne hanu man su kayi te kedhendiyan ku te keniyu emun kenè dan ebpurungan is menge ulaula zan, ne egkeehè dan ke sengemenu keg̵arang is menge lalag ku.

2 Kurintu 10:7

Purungi niw isipa is nesavut niw en su zuen menge zuma niw he kunaan dan ke iyan dan dà menge hustu he sulug̵uen ni Kristu. Kinahanglan he mesavut dan he sikami, hustu key zaan he menge sulug̵uen ni Kristu.

2 Kurintu 11:21

Utew zan mevurut, iyan, sikami, telawen key ne egkeeled a su haazà is menge ulaula zan keniyu he kunaan niw ke utew meupiya, wazè dey meulaula ziyan te keniyu. Ne g̵eina te wazè dan en kegkehandek te edantal ne kenà a zaan egkehandek he edantal minsan ke ebpekeiring a te tulebung.

2 Kurintu 11:30

Kenè ku egkesuatan he edantal a, iyan, emun kinahanglan he ibpezantal a, idantal ku is menge kemeresayan he nengeeg̵iyan ku su pinaag̵i kayi egketuenan niw he zekelà is kurang ku te ketau.

2 Kurintu 12:5

Ne egkehimu he idantal ku heini is nehitavù kandin, iyan, kenè ku iyan idantal is menge ketau ku, kekenà, iyan ku idantal haazà is ebpekepaahà te kurang ku te ketau.

2 Kurintu 3:12

Ne g̵eina te ebpekesarig key he kenà heini egkeawà te minsan keenu kenè key egkehandek te kedsengyawa zey te Lalag te Megbevayà.

2 Kurintu 5:20

Umba midsug̵ù key ni Kristu su wey pinaag̵i kenami ebpekehangyù keniyu is Megbevayà. Ne tenged ki Kristu edhengyuan dey zaan sikiyu he itug̵ut niw he himuwa kew te Megbevayà he menge emig̵u zin.

2 Kurintu 6:1

Ne g̵eina te nehimu key en he menge timbang te Megbevayà, edhengyuan dey sikiyu he himuwa niw he mebpulus is gag̵ew zin keniyu.

2 Kurintu 7:4

Utew zekelà is kedsarig ku keniyu; dekelà layun is kebpekezalig ku keniyu. Ne tenged kayi minsan pa te mezakel is menge seeng dey, meupiya g̵ihapun is g̵ehinawa ku; utew zekelà is kelipey ku tenged keniyu.

Gelasya 4:13

Netuenan niw he umba nehimu is aney ku en kebpenudtuli keniyu te Meupiya he Tudtulanen su nezeruwan a.

Gelasya 5:2

Utew tutuu heini is egkeg̵iyen ku keniyu he ke iyan niw edserig̵an is kedsirkunsidara keniyu wey kew meluwas, ne kenè kew egketevangan ni Kristu.

Ipisu 3:1

Ne tenged kayi te langun, siak si Pablo, is pirisu tenged te kedsundan ku ki Jesu Kristu, layun ku sikiyu id-ampù diyà te Megbevayà. Umba nepirisu a su insangyew ku is Lalag te Megbevayà diyan te keniyu te kenà menge Hudiyu.

Ipisu 4:1

Ne tenged kayi te langun, siak is pirisu tenged te midtuman ku is menge sugù te Nengazen, edhengyuan ku sikiyu he g̵eina te midhimu kew te Megbevayà he menge tumutuu zin, ul-ulaha niw is ulaula he zait he ed-ul-ulahan te tumutuu.

Pilipus 4:5

Kinahanglan he peketulanged kew te minsan hentei su meg̵aan en edlikù is Nengazen.

Kulusas 1:23

Iyan, kinahanglan he kenè niw engkezi is kedtuu te tutuu he tuluuwen, kekenà, lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen. Heini is nekag̵i he Meupiya he Tudtulanen, ne insangyew ziyà te menge etew ziyà te minsan hendei. Siak si Pablo, midsug̵ù a wey ku ikesangyew is Meupiya he Tudtulanen.

2 Tiselunika 3:17

Iyan a si Pablo; impirma ku kayi is ngazan ku. Iyan heini tuus he idsavuk ku te langun he menge surat ku, wey iyan heini paag̵i te kedsurat ku.

Pilimun 1:19

Ahaa nu is kedsurata ku kayi: Iyan a si Pablo ebayad. Asal netuenan nu he zekelà daan is utang nu kedì su pinaag̵i kediey nekeangken ka te untung he wazè din pidtemanan.

Pilimun 1:9

iyan, tenged te utew ka mahal zini te g̵ehinawa ku, edhangyù e zà kenikew. Siak, si Pablo, is meg̵urang wey g̵untaan pinirisu a zaan tenged te kedtuu ku ki Kristu,

1 Pedro 2:11

Menge minahal ku he suled, kenè en hustu he inged tew heini is kelibutan su menge humuhulevungà kiw zà dini. Ne tenged dutun edhengyuan ku sikiyu he kenè niw pezumdumahi is menge mezaat he kebayè niw su ebpekesanggen heini te kedsundan niw te Megbevayà.

Impezayag 1:9

Iyan a si Juan is sevaha he suled niw tenged te kedtuu ku ki Jesus. Iring keniyu nekeantus a zaan te menge kemeresayan su sakup a zaan te g̵inhedian din. Tenged te ingkepauk te gubirnu is kebpenudtul ku te Lalag te Megbevayà wey is kebpenurù ku te impesavut ni Jesus, impesivey a ne ziyà a ibpeubpà te sengepupulu he egngezanan te Patmus.