2 Kurintu 1:19 - Manobo Western Bukidnon

¹⁹ Sikami engki Silas wey si Timoteo, impenudtul zey ziyan te keniyu kes Anak te Megbevayà he iyan si Jesu Kristu. Ne netuenan niw he metinumanen sikandin te lalag din ne kenà egkehimu he kenè din edtumanen is penaad din.

2 Kurintu 1:19 Кръстосани препратки

Mateo 17:5

Ne te kemulu pa heini is lalag ni Pedro, neselikuvungan sikandan te ebpenganlag he g̵apun. Ne ebpuun dutun te g̵apun nezineg dan is midtik-ew megkag̵i te, “Iyan heini sikan is Anak ku he utew ku minahal; ingkesuat ku utew sikandin. Pemineg̵a niw sikandin.”

Mateo 24:35

Egkehanew is langit wey tanà, iyan, heini is migkag̵i ku, kenà mulà egkehanew te minsan keenu.

Mateo 27:40

Ke sikandan te, “Na! Kunaan nu ke egkeg̵evè nu sikan is simbahan he Valey te Megbevayà ne egkevangun nu te seled te tetelu he andew. Libriya nu kun is keugelingen nu. Emun tutuu ka he Anak te Megbevayà, penaug ka keniyan te krus.”

Mateo 27:54

Sikan is menge sundaru wey sikan is kepitan dan he mibantey ki Jesus, hein midtik-ew medlinug wey hein nengeehè dan is duma pa he nengehitavù dutun ne nengehandek dan. Ke sikandan te, “Tutuu ves iyan he Anak sikandin te Megbevayà!” egkag̵i zan.

Mateo 3:17

Ne zutun nezineg is Megbevayà diyà te langit he egkag̵i, ke sikandin te, “Iyan heini Anak ku he utew ku minahal. Utew ku sikandin igkelipey.”

Mateo 4:3

Ne zutun mid-uvayan ni Setanas si Jesus ne mibpenuley zin he egkag̵i te, “Emun tutuu iyan he Anak ka te Megbevayà pengelinteuwi nu he mevaluy he egkeenen heini is menge vatu.”

Marcos 1:1

Si Esaias, is tipehuna he ebpeneuven dengan te Megbevayà, insurat din is Lalag te Megbevayà duen te Anak din, ne iyan haazà puunà te Meupiya he Tudtulanen te keag̵i ni Jesu Kristu he Anak te Megbevayà. Migkag̵i is Megbevayà te, “Duen keuzemà ibpehuna ku kenikew he etew he ibpepenudtul ku he meg̵aan ka ebpekeuma.

Lucas 1:35

Ne midtavak haazà is belinsug̵uen te, “Is Wag̵as he Mulin-ulin, iyan ebpengelintau kayi ziyan te kenikew ne edlig-enan ka te g̵ehem te Megbevayà. Ne tenged kayi, heini is id-anak nu, pudu metazeng is menge ulaula zin ne egkengezanan sikandin he Anak te Megbevayà.

Juan 1:34

Neehè ku en,” ke si Juan, “ne egkeg̵iyen ku keniyu he iyan sikandin sikan is Anak te Megbevayà.”

Juan 1:49

Ne zutun migkag̵i si Natanael te, “Datù, tutuu ves iyan he iyan ka sikan is Anak te Megbevayà; iyan ka sikan is netagnà he hadì dey te menge kevuwazan ni Israyil.”

Juan 19:7

Ne migkag̵i ziyà te kandin haazà is menge Hudiyu te, “Sumalà te kesug̵uan dey, kinahanglan he edhimetayan heini he etew su midsupak din is kesug̵uan su migkag̵i zin he iyan sikandin sikan is Anak te Megbevayà.”

Juan 20:28

Ne zutun midtavak si Tomas te, “Iyan ka Nengazen ku, iyan ka Megbevayè ku!”

Juan 20:31

Ne iyan insurata ku kayi te menge egkein-inuwan su wey kew meketuu he iyan si Jesus Anak te Megbevayà wey sikan is mibpilì te Megbevayà he ibpahadì, ne emun edtuu kew kandin ebeg̵ayan kew te untung he wazà pidtemanan.)

Juan 3:16

Utew mahal ziyà te g̵ehinawa te Megbevayà is tivuuk he menusiyà, ne tenged kayi minsan sikan is budtung he Anak din wazè din menug̵uni, kekenà, impehendini zin su wey is langun he edtuu kandin, kenà mesiluti is gimukud dan, kekenà, meveg̵ayi sikandan te untung he wazà pidtemanan.

Juan 6:69

Edtuu key kenikew su netuenan dey he iyan ka sikan is mibpilì te Megbevayà he ibpahadì.”

Juan 8:58

Ne midtavak si Jesus te, “Utew venar is egkeg̵iyen ku keniyu he te wazè pa ianak si Abraham daan e en.”

Nengeulaula 15:22

Ne zutun, is menge epustul wey ebmeg̵urangen wey is langun he menge tumutuu he Hudiyu, neisip dan he ebpilì dan te menge zuma zan he ibpezuma zan ki Pablo wey ki Bernabe ziyà te Entiyukya. Ne iyan nepilì dan si Silas wey si Hudas he sevaha he ngazan din si Bersabas. Ne haazà is dezuwa, telehuzen sikandan te menge tumutuu zutun.

Nengeulaula 16:1

Ne midlaus ensi Pablo ziyà te menge inged he Dirbi wey Listera. Ne zuen sumusundan ni Jesus he meg̵inged dutun he egngezanan ki Timoteo. Is iney zin, ne Hudiyu he tumutuu zaan, asal is amey zin ne Gerisyahanen.

Nengeulaula 18:5

Ne hein nekeuma si Silas wey si Timoteo is ebpuun te Mesidunya, wazà duma he vaal ni Pablo, kekenà, iyan dà is kebpesevuta zin te Lalag te Megbevayà su ibpeehè din te menge Hudiyu he tutuu iyan he iyan si Jesus sikan is mibpilì te Megbevayà he ibpahadì.

Nengeulaula 8:36

Ne netegteg̵aad dutun nekeuma zan te wahig, ne migkag̵i haazà is upisyal te, “Wahig en heini; egkehimu ve ke ebewtismuwan a kenikew?”

Nengeulaula 9:20

Ne zutun midseled te simbahan te menge Hudiyu ne impenurù din is keag̵i ni Jesus. Ne ke sikandin te, “Si Jesus, Anak te Megbevayà.”

2 Kurintu 1:1

Siak si Pablo. Migeraran a he epustul ni Jesu Kristu tenged te iyan egkesuatan te Megbevayà. Siak wey si Timoteo he suled tew, ebpesuratan dey sikiyu is langun he menge tumutuu te Megbevayà diyan te inged he Kurintu wey is langun daan he menge etew he neg̵aked te Megbevayà seled te tivuuk he prubinsya he Gerisya.

1 Tiselunika 1:1

Sikami si Pablo, si Silas, wey si Timoteo, ebpesuratan dey sikiyu is menge tumutuu he menge tigTiselunika he g̵aked te Amey tew he Megbevayà wey g̵aked te Nengazen tew he si Jesu Kristu. Berakat he ikeg̵ag̵ew kew te Megbevayà ne veg̵ayi kew zin te melinawen he kebpekesavuk.

2 Tiselunika 1:1

Sikami, si Pablo, si Silas, wey si Timoteo, ebpesuratan dey sikiyu is menge tigTiselunika he g̵aked te Amey tew he Megbevayà wey g̵aked te Nengazen tew he si Jesu Kristu.

1 Timoteo 3:16

Ne netuenan tew te langun he lavew pa te langun is imbugnà he tuluuwen he midtuuwan tew. Mibpeetew si Kristu; midtistig̵usan te Wag̵as he Mulin-ulin he metazeng sikandin; naahà sikandin te menge velinsug̵uen te Megbevayà; insangyew sikandin diyà te menge etew he kenà menge Hudiyu; duen menge tumutuu kandin dini te tivuuk he kelibutan; midtulus sikandin pehendiyà te langit.

Hibriyuhanen 1:11

Ne minsan pa te egkehanew keuzemà is langit wey tanà, kenè ka mulà egkehanew. Iring dan te manggad he egkezeetan.

Hibriyuhanen 13:8

Su si Jesu Kristu, ne kenà egkehalin. Iyan ded sikandin gihapun dengan, wey g̵untaan, wey keuzemà te wazè din pidtemanan.

1 Pedro 5:12

Mid-ug̵upan a ni Silvanu te edsurat kayi. Suled tew sikandin he utew egkeserig̵i. Iyan insurati ku keniyu kayi su wey ku meheg̵et is kedtuu niw. Ibpesavut ku keniyu he impenurù ku en keniyu he tutuu is gag̵ew te Megbevayà keniyu. Ne kenè niw heini lipati.

2 Pedro 1:17

Duma key zin dengan hein impaahà te Amey tew he Megbevayà is mekeg̵eg̵ehem he anlag din wey is utew zin kegkelavew. Nezineg dey is lalag te mekeg̵eg̵ehem he Megbevayà he migkag̵i te, “Iyan heini sikan is Anak ku he utew ku minahal; ingkesuat ku utew sikandin,” ke sikandin.

1 Juan 1:3

Edtudtulen ku en keniyu haazà is neehè dey wey nezineg dey ziyà te kandin su wey kew mebpekid-upakat kenami su nekid-upakat key zaan te Amey tew he Megbevayà wey te Anak din he si Jesu Kristu.

1 Juan 5:20

Netuenan tew zaan he midhendini en te kelibutan is Anak te Megbevayà ne imbeg̵ey zin kenitew is kedsavut wey kiw mehimu he menge emig̵u te tutuu he Megbevayà. Nekidsevaha kiw te tutuu he Megbevayà su nekidsevaha kiw te Anak din he si Jesu Kristu. Iyan sikandin tutuu he Megbevayà, iyan sikandin puunà te untung he wazà pidtemanan.

2 Juan 1:9

Ke zuen etew he ed-engkezan din is tutuu he tuluuwen he impenurù ni Kristu su iyan edhemenan din is tarù he tuluuwen he in-uman din dutun, wazà sikandin mebpekidsevaha te Megbevayà. Is minsan hentei mulà he edhemenan din is tutuu he tuluuwen, iyan sikandin mibpekidsevaha te Amey tew he Megbevayà wey is Anak din.

Impezayag 1:11

ne ke sikandin te, “Is egkeehè nu, isurat nu ne ibpeuwit nu ziyà te pitu he menge gurupu te menge tumutuu he ziyà te menge inged he Ipisu, Ismirna, Pirgemu, Tiyetira, Sardis, Piledilpya, wey ziyà daan te inged he Leudisiya.”

Impezayag 1:17

Ne hein neehè ku sikandin, nekelangkeb a ziyà te etuvangan din ne henduen a te minatey. Ne indampè din kediey is kewanan he palad din ne ke sikandin te, “Kenè ka mahandek su iyan a sikan is puunà wey kes egkepengkusan te langun.

Impezayag 1:8

Is Nengazen tew he Megbevayà he mekeg̵eg̵ehem he zaan en te wazè pa limbag̵a is minsan hengkey, iyan ded sikandin guntaan wey minsan keuzemà te wazà pidtemanan. Ke sikandin te, “Iyan a sikan is alpa wey umiga, he ke và dà egkeg̵iya, kes puunà wey egkepengkusan te minsan hengkey.”

Impezayag 2:18

Ne ke sikandin maan te, “Pesurati nu is belinsug̵uen he impevantey te Megbevayà diyà te menge tumutuu he ziyà te inged he Tiyetira. Ke sikew te, ‘Siak is egkag̵i, ne Anak a te Megbevayà; is menge mata ku, ne henduen be te egkeregreg, ne is menge paa ku, ne henduen be te g̵alang he midlimbasan.