2 Kurintu 1:12 - Manobo Western Bukidnon

¹² Duen, menge suled, idantal zey ne netuenan dey he tutuu heini, ne iyan is: layun meupiya is ulaula zey ziyà te minsan hentei he etew, lavew en diyan te keniyu. Su layun key edtuman te egkesuatan te Megbevayà ne utew hustu is tuyù dey. Wazè dey g̵emita is ketau zey te etew zà duen, kekenà, iyan igkehimuwa zey te langun is mekeg̵eg̵ehem he tavang te Megbevayà.

2 Kurintu 1:12 Кръстосани препратки

Nengeulaula 23:1

Ne si Pablo, midtengtengan din haazà is nengetig̵um he menge ebmeg̵urangen ne ke sikandin te, “Menge suled, wazà buring te zengeg ku ziyà te etuvangan te Megbevayà taman en guntaan!”

Nengeulaula 24:16

Ne edhemenan ku is menge meupiya he menge vaal su wey wazà igkesewayi kedì te minsan hentei he etew lavew en is Megbevayà.

Ruma 9:1

Duen egkeg̵iyen ku keniyu ne kenà tarù heini su sumusundan a ni Kristu. Ne netuenan ku zaan he kenà tarù heini su iyan ed-uwit te isip ku is Wag̵as he Mulin-ulin.

1 Kurintu 1:17

Su si Kristu, wazè e zin sug̵ua wey a mekebewtismu, kekenà, iyan insug̵ua zin kedì su wey ku ikesangyew is Meupiya he Tudtulanen. Ne impesavut din kedì he kinahanglan he kenè ku egemiten is kelibutanen he ketau te kegkag̵i su kela ke egkevenaran is menge etew tenged te ketau ku ne egketembunan is gehem ni Kristu te kedlibriya kandan pinaag̵i te kebpatey zin duen te krus.

1 Kurintu 12:8

Ne ziyà te zuma ibeg̵ey pinaag̵i te Wag̵as he Mulin-ulin is ketau te kedseysey te tutuu he tuluuwen; ne ziyà te zuma pa ibeg̵ey pinaag̵i te g̵ehem te Wag̵as he Mulin-ulin is ketau te kedseysey te memezalem he ibpepenurù te Megbevayà.

1 Kurintu 15:10

Iyan, utew zekelà is hizu kediey te Megbevayà. Umba nehimu a he epustul su zuen pulus te kegkehizuwi zin kediey. Tenged kayi, dekelà is nehimu ku kenà te nehimu te langun he menge zuma ku he epustul, asal, kenà a iyan is nekehimu kayi, kekenà, nehimu heini is langun pinaag̵i te tavang te Megbevayà.

1 Kurintu 2:13

Ne tenged kayi iyan ibpenurù dey is impesavut kenami te Wag̵as he Mulin-ulin, ne kenà iyan is impesavut kenami te memetau he etew zà duen. Is ebpuun diyà te Wag̵as he Mulin-ulin, ne iyan ibpesavut dey ziyà te menge etew he mid-ulinan daan te Wag̵as he Mulin-ulin.

1 Kurintu 4:4

Minsan te wazà egketuenan ku he sayep ku, egkehimu pa he zuen pa kurang te ebeelan ku su iyan metau is Megbevayà. Iyan sikandin edsusi te menge vaal ku.

1 Kurintu 5:8

Ne tenged kayi, duen en daan kenitew he kedsilibra te Pista te Kedlevayi ne kinahanglan he kenè tew en maan egemiten is daan he supas he zuen din tapey he iyan is mezaat wey meremerik he ulaula, kekenà, iyan tew en egemiten is supas he wazè din tapey, he ke và dà egkeg̵iya, is kedtumana te tutuu he tuluuwen wey is kedtudtula te tutuu.

2 Kurintu 1:17

Ne g̵eina te wazè ku heini metuman kunaan niw vuwa ke layun edhalinhalin is isip ku. Kunaan niw vuwa zaan ke iring is menge isip ku te isip te etew he iyan ebayàbayà kandin is kandin dà he mezaat he suat. Kunaan niw ke zutun te kegkag̵i ku he ebpehendiyan a ne iyan bes neseled dini te g̵ehinawa ku is kenà a ebpehendiyan.

2 Kurintu 11:3

Egkeipeng a keniyu su kela ke meengkezi niw is kebpurungi niw kedtumana te menge sug̵ù ni Kristu su kela ke mesahug is kedtuu niw te selakew he edtuuwen. Kela ke meiringi niw si Ibà dengan su mid-akalan sikandin te teruen he uled he iyan si Setanas.

2 Kurintu 2:17

Iyan, sikami, kenè dey ed-iringan is ulaula te mezakel he ebpenurù su ziyà te kandan henduen be te ibpenapì dan is Lalag te Megbevayà. Ne tenged te midsugù key te Megbevayà, ne tenged daan te edsusiyen key layun te Megbevayà, tutuu is tuyù dey wey egkeg̵iyen dey su nekidsevaha key ki Kristu.

2 Kurintu 4:2

Sikan is menge mahawag he ulaula he meeles he ebeelan te zuma, kenè dey mulà ebeelan. Kenè key edtarùtarù ne kenè dey edhelinen is Lalag te Megbevayà, kekenà, hustu is kedsengyawa zey su wey mesavut te minsan hentei he kenà tarù is ebeelan dey. Iyan edsusi kayi is Megbevayà.

2 Kurintu 8:8

Kenà heini kesug̵uan ku keniyu, kekenà, ibpesayud ku keniyu is dekelà he g̵ustu te zuma he menge tumutuu te kedtavang te menge zuma zan. Umba ibpesayud ku heini su wey niw meiringi. Ne pinaag̵i kayi egketuenan ku ke tutuu ve is keniyu he g̵ag̵ew.

Gelasya 6:4

Deyzey ke ebpurungan edsusiya te uman sevaha is menge ulaula zin. Ne emun meupiya, egkehimu he ibmeupiya te g̵ehinawa zin. Iyan, kenè din isukud is menge ulaula te zuma zin te kandin he ulaula.

Ipisu 6:14

Ne tenged kayi, andam kew en. Layun tutuu is egkeg̵iyen niw wey ed-isipen niw ne iyan heini bakes niw. Ul-ulaha niw layun is metazeng he ulaula ne iyan heini limbutung niw.

Pilipus 1:10

su wey niw layun metueni ke hengkey is hustu ne wey niw layun heini meulaula. Ne zutun wazà keuzemà igkesawey ziyan te keniyu su egkehimu kew he wag̵as dutun te kedlikù ni Kristu.

1 Tiselunika 2:10

Ebpeketistig̵us kew, ne ebpeketistig̵us daan is Megbevayà he hein diyan key te keniyu te nemeketuu wazà igkesewayi te menge ulaula zey, kekenà, metazeng key wey metinumanen key te egkesuatan te Megbevayà.

1 Timoteo 1:5

Ne kinahanglan he iyan ketezengan ke maan is idsug̵ù nu kandan heini su wey zan mahala is menge zuma zan diyà te g̵ehinawa zan. Ne kenà egkehimu he hustu is kebmahala ta te menge zuma ta emun wazè ki melumpiyuwi te Megbevayà duen te menge salè ta. Kinahanglan he iyan dà ed-ul-ulahan ta is netuenan ta he hustu ne kinahanglan daan he tutuu is kedtuu ta te tutuu he tuluuwen ne zutun human hustu is kebmahala ta te menge zuma ta.

Tito 2:7

Sikew zaan, kinahanglan he layun meupiya is kenikew he ulaula su wey iyan ka meiringi te menge zuma nu. Ne emun ebpenurù ka, kinahanglan he hustu is tuyù nu wey sungkad te Lalag te Megbevayà is paag̵i nu te kebpenurù.

Hibriyuhanen 13:18

Menge suled, iampù key layun keniyu. Netuenan dey he wazà igkesawey te menge ulaula zey su iyan dà egkesuatan dey he meveeli zey is layun meupiya.

Santiago 4:6

iyan, mezesen pa utew is tavang kenita te Megbevayà.” Ne tenged dutun duen insurat he lalag din he edhenduen te, “Egkuntedahan te Megbevayà is mepelevawen, iyan, edtevangan din mulà is ebpesakup kandin.”

1 Pedro 3:16

Mebmetinehuzen kew is edtavak wey menayù is kegkag̵i niw. Kinahanglan he wazà salà he netag̵ù diyà te g̵ehinawa niw te menge sumusundan ni Kristu su emun wazà ulaula niw he mezaat egkeeled is edsudì keniyu tenged te egkeg̵iyen dan.

1 Pedro 3:21

Ne iyan teg̵ialung kayi te wahig is kebewtismu he ebpekelibri kenitew te silut. Ne haazà is kebewtismu, ne kenà iyan is kedlumpiyuwi te lawa tew ziyà te wahig, kekenà, iyan is kedhengyui tew te Megbevayà he maawè din is menge salè tew. Egkehimu heini tenged te mibanhew zin si Jesu Kristu.