2 Kurintu 1:10 - Manobo Western Bukidnon

¹⁰ Ne midtevangan key te Megbevayà ne midlig-enan key zin, umba nelibri key ne wazè key mehimetayi. Ne netuenan dey he ebpenigudu sikandin he edtavang kenami. Dekelà is kedsarig dey he kenè key zin ed-engkezan te edtavang.

2 Kurintu 1:10 Кръстосани препратки

Nengeulaula 26:21

Ne tenged kayi te impenurù ku midakep a te menge Hudiyu ziyà te simbahan he Valey te Megbevayà ne edhimetayan e zan pezem.

Ruma 15:31

Iampù niw he kenà a mekeizi te menge etew he kenà tumutuu ziyà te inged he Hiruselim. Iampù niw zaan he ikelipey te menge tumutuu ziyà te Hiruselim heini is selapì he idhated ku kandan.

2 Kurintu 1:9

Henduen be te iyan en haazà ketepusan te untung dey, iyan, umba nehitavù heini zini te kenami su wey key kenà mekesarig te kenami zà he ketau, kekenà, wey key mekesarig te Megbevayà he iyan ebpemanhew te menge minatey.

2 Kurintu 6:9

Duen egkag̵i he utew minus is pid-etawan dey, iyan, nasì dekelà is bentug̵an dey. Layun key ed-ed-edisi te kemetayen, iyan, idtug̵ut pa te Megbevayà he kenè key pa mebpatey. Edsilutan key te Megbevayà wey key mepenurù, iyan, kenè key zin edhimetayan.

1 Timoteo 4:10

Tenged kayi ebpenigudu ki edhag̵ù wey metuuwi heini te langun he menge etew su nekesarig ki en te wazè din kemetayen he Megbevayà ne iyan sikandin Menluluwas te langun he menge etew, lavew en is menge tumutuu kandin.

2 Timoteo 4:17

Minsan pa zutun midtevangan a te Nengazen ne midlig-enan e zin ne tenged dutun nepurungan ku te edsangyew is Meupiya he Tudtulanen diyà te langun he menge etew zutun he kenà menge Hudiyu. Ne tenged dutun nelibri a ne wazà a mehimetayi.

2 Pedro 2:9

Iyan, is menge etew mulà he ed-azap te Nengazen, metau sikandin he edtavang kandan wey kenè dan mekesalà ke ebpenulayen sikandan. Metau zaan sikandin he ebakus te menge nemematey he lalung su wey itag̵ad sikandan taman te andew te kedsiluti zin kandan.