1 Tiselunika 4:13 - Manobo Western Bukidnon

¹³ Menge suled, egkesuatan dey he metueni niw is egkeulaula te menge tumutuu he minatey en su wey kew kenà meseeng iring te kegkeseeng te zuma he menge etew he kenè dan egkeperateng he egkevanhew sikandan.

1 Tiselunika 4:13 Кръстосани препратки

Mateo 27:52

Ne zuen menge surung he penlevengà he zutun nengepuwasan, ne nengevanhew is mezakel he menge tumutuu te Megbevayà,

Juan 11:24

Ne migkag̵i si Marta te, “Uya, netuenan ku he egkevanhew sikandin keuzemà ke ebpemenhawen is menge minatey zutun te ketepusan he andew.”

Nengeulaula 13:36

Ne netuenan ta, menge suled,” ke si Pablo, “he neug̵et en si David. Midtuman din is mibpeveelan kandin te Megbevayà ne hein neumuran sikandin ne minatey. Inleveng uvey te menge lukes din ne neredak is lawa zin.

Nengeulaula 7:60

Ne zutun nekeluhud ne mid-uman megkag̵i te, “He Nengazen, kenè nu isipa he idsilut kandan heini is salè dan.” Ne te nekag̵i zin haazà, naawà is gehinawa zin.

Ruma 1:13

Egkesuatan ku, menge suled, he metueni niw he kenà egkeawà dini te isip ku is kegkesuat ku te edhendiyan, iyan, kenè e pa g̵untaan ebpekehendiyan su zuen edsanggen kedì. Egkesuat a he edhendiyan su pinaag̵i te kebpenurù ku, kela ke zuen menge etew ziyan he ebpeketuu ki Jesus, iring te pinaag̵i te kebpenurù ku, duen menge kenà Hudiyu zaan diyà te zuma he menge inged he nemeketuu kandin.

1 Kurintu 10:1

Egkesuatan ku, menge suled, he metueni niw ke hengkey is neulaula zengan te menge kepuun dey te menge Hudiyu he nemenduma ki Moises. Su mibpeyungan sikandan te g̵apun he iyan tuus he mibulus diyà te kandan is Megbevayà, ne midrapas dan is dag̵at he migngezanan te Merig̵à, ne wazà nelened kandan.

1 Kurintu 12:1

Menge suled, egkesuatan ku he mepurung niw mesavut ke hengkey sikan is menge ketau he imbeg̵ey keniyu te Wag̵as he Mulin-ulin.

1 Kurintu 15:6

Ne zutun mibpaahà daan sikandin te subra he lelima he g̵atus he nengetig̵um he menge sumusundan din. Ne kemulu pa uuyag guntaan is kezekelan kayi ne is duma nemematey en.

2 Kurintu 1:8

Su egkesuatan dey, menge suled, he metueni niw is dekelà he samuk dey hein diyè key te prubinsya he Asya. Utew merasey is penggezam kenami he kenè dey pezem egkeantus umba kunaan dey ke ibpatey zey.

Ipisu 2:12

Netuenan niw he zengan wazè niw upakat ki Kristu ne wazè kew iragkes te menge etew he pinilì te Megbevayà. Wazè kew zaan mekeambit duen te menge meupiya he impenaad te Megbevayà kandan. Wazà egkepaabut niw he tavang te Megbevayà ne kenà duen dà taman su wazè niw metueni ke hentei is tutuu he Megbevayà dini te kelibutan.

Ipisu 2:3

Ne sikitew zaan, elin kiw zengan ebpen-ulaula te mezaat sumalà is mezaat he kebayà te lawa tew, wey is mezaat he isip tew. Ne tenged kayi neragkes kiw pa zutun te silut iring te zuma he menusiyà he kenà sakup te Megbevayà.

1 Tiselunika 4:14

Midtuu kiw he mibpatey si Jesus ne nevanhew ne edlikù keuzemà. Iring din daan kes menge tumutuu he minatey en su ebenhawen ne ibpezuma sikandan te Megbevayà ki Jesus keuzemà te kedlikù din.

1 Tiselunika 4:15

Lalag en te Nengazen heini is egkeg̵iyen dey keniyu ne iyan is: sikitew is uuyag pa keuzemà te timpu te kedlikù te Nengazen, kenè kiw egkehuna te menge tumutuu he minatey en.

1 Tiselunika 5:10

Ne minsan ke uuyag kiw pa wey ke minatey kiw en be zutun te kedlikù ni Kristu, duen tew en gihapun untung he wazà pidtemanan duma kandin su iyan heini ketezengan ke maan is mibpehimatey sikandin.

1 Tiselunika 5:6

Umba kinahanglan he kenà iring te kedlipezeng is ulaula tew su iring kayi is ulaula te zuma he etew he wazà meketuu. Kinahanglan he ed-andam kiw ne ed-eg̵enen tew is menge mezaat he suat tew.

2 Pedro 3:4

“Hendei vuwa si Kristu su impenaad din dengan he edlikù dini te kelibutan, iyan, kenè key ebpeketuu te iring dutun su puun pa te timpu zengan te kebpatey te menge tipehuna he kepuun tew taman en guntaan, wazà mahalin is minsan hengkey; iyan ded gihapun genat dà te kedtukuza te kelibutan taman en guntaan.”

2 Pedro 3:8

Minahal ku he menge suled, tentenuzi niw he ziyà te Megbevayà, neked-iring is sengeandew zà wey is nengkelibu he tuig su ziyà te kandin meg̵aan dà utew haazà is dezuwa.