1 Tiselunika 2:8 - Manobo Western Bukidnon

⁸ Utew kew mahal kayi te g̵ehinawa zey, umba kenà iyan dey zà egkesuatan is kedweliyi zey keniyu te Meupiya he Tudtulanen he ebpuun te Megbevayà, kekenà, ebpekid-uunungen key en daan keniyu su utew zey sikiyu minahal.

1 Tiselunika 2:8 Кръстосани препратки

Lucas 7:2

Ne zuen dutun etew he kenà Hudiyu he kepitan te nenggatus he sundaru he zuen din sulug̵uen he maama he utew zin minahal. Ne heini is sulug̵uen ne egketigbak is egkezeruwan su edluwàluwè en te g̵ehinawa.

Ruma 1:1

Iyan a si Pablo is teg̵isurat kayi. Uripen a ni Jesu Kristu ne midhimu e zin daan he epustul. Impenaad dengan te Megbevayà pinaag̵i te impesurat din te menge ebpeneuven din he zuen timpu he zuen Meupiya he Tudtulanen he ibpesavut kenitew. Umba mibpilì a he epustul su wey a mekepenudtul kayi te Meupiya he Tudtulanen.

Ruma 10:1

Menge suled, utew ad egkesuat ke egkengelibri te silut te Megbevayà is menge zuma ku he Hudiyu ne iyan heini id-ampù ku layun te Megbevayà.

Ruma 15:29

Ne netuenan ku he ke ebpekeuma a ziyan, utew zekelà is kedtuvazi kenitew ni Kristu pinaag̵i kayi te kebpehendiyan ku.

2 Kurintu 12:15

Egkelipey a utew ke igkeveg̵ey ku is menge azen ku wey is desen ku wey ku sikiyu metevangi. Iyan, minsan pa te mahal kew zini te g̵ehinawa ku henduen be te kenà a mulà mahal ziyan te g̵ehinawa niw.

2 Kurintu 6:1

Ne g̵eina te nehimu key en he menge timbang te Megbevayà, edhengyuan dey sikiyu he himuwa niw he mebpulus is gag̵ew zin keniyu.

Gelasya 4:19

Henduen be te menge anak ku en sikiyu su minahal ku sikiyu. Iring te edlised is bahi ke ed-anak, egkereg̵enan a zaan te ked-isipa ku keniyu su egkesuatan ku he meg̵aan niw itug̵ut he iyan ebayàbayà keniyu si Kristu.

Pilipus 1:8

Ebpeketistig̵us is Megbevayà he utew zekelà is kebulunga ku keniyu su is kezekelà te g̵ehinawa ku keniyu, ne iring te kezekelà te g̵ehinawa ni Jesu Kristu keniyu.

Pilipus 2:17

Is kedtuu niw te Megbevayà, ne iring te pemuhat he edewaten din. Ne emun egkesuatan din pa he id-uman is kebpatey ku kayi te pemuhat, igkelipey ku pa. Ne igkelipey ku zaan is kedtuu niw iring te nelipey kew.

Pilipus 2:20

Iyan dà sikandin duma ku kayi he utew zekelà is gehinawa zin keniyu.

Pilipus 4:1

Umba menge minahal ku he menge suled, heg̵eta niw is kedtumana niw te menge sug̵ù te Nengazen. Utew a mibulung keniyu. Igkelipey ku sikiyu wey ibmeupiya kew te g̵ehinawa ku.

Kulusas 1:28

Sikami, idsangyew zey si Kristu; edleg̵uyan dey is minsan hentei, wey ebpenurù key kandan ebpurung sumalà is egkehimu zey he ketau su wey meketuu is langun ki Kristu, ne wey sikandan keuzemà ikepeetuvang diyà te Megbevayà he wazà kurang te kedtuu zan.

Kulusas 1:7

Impenurù keniyu heini ni Ipapras he minahal he zuma zey he sulug̵uen ni Kristu. Metinumanen sikandin te menge sug̵ù ni Kristu pinaag̵i te kedtavang din kenami.

Kulusas 4:12

Ebpengemusta zaan keniyu si Ipapras. Duma niw zaan he tigKulusas he sulug̵uen ni Jesu Kristu. Layun kew zin id-ampù. Ed-ampù sikandin diyà te Megbevayà he mebmelig-en wey meheg̵et is kedtuu niw ne wey meheg̵et daan is kedtumana niw te egkesuatan te Megbevayà.

Pilimun 1:1

Minahal he emig̵u zey wey timbang dey he si Pilimun. Siak si Pablo is nepirisu tenged te kedtuu ku ki Jesu Kristu wey si Timoteo he suled tew, ebpesuratan dey sikew, wey si Epiya he etevey tew tenged te kedtuu, wey si Erkipu he zuma tew he sundaru ni Kristu wey elin daan ebpesuratan dey is menge tumutuu he ziyan edsimba te valey nu.

Hibriyuhanen 13:17

Tumana niw is sug̵ù te menge egalen niw te menge tumutuu ne ipeehè niw is kedtehuza niw kandan su iyan sikandan ed-elima keniyu te edtuu, ne zuen timpu keuzemà he edsusiyen te Megbevayà ke metinumanen dan be is ed-elima keniyu. Emun ebpemineg̵en niw is sug̵ù dan, utew ibmeupiya te g̵ehinawa zan is baal zan. Ne emun kenè kew ebpemineg, utew mereg̵en is baal zan ne egkehimu zaan heini he idlised niw.

1 Juan 3:16

Umba netuenan tew en he utew zekelà is kebmahala kenitew te Megbevayà diyà te g̵ehinawa zin su mibpehimatey si Jesu Kristu he elili kenitew. Ne sikitew zaan, kinahanglan he edtevangan tew is menge zuma tew he tumutuu minsan ke ibpatey ta haazà is kedtavang.