1 Tiselunika 2:5 - Manobo Western Bukidnon

⁵ Netuenan niw he kes menge lalag dey, kenà kedigdig dà. Kenà ibpenapì kes mid-ulaula zey ziyan. Is Megbevayà, iyan ebpeketistig̵us kayi.

1 Tiselunika 2:5 Кръстосани препратки

Mateo 22:16

Ne midsug̵ù dan diyà te ki Jesus is menge sumusundan dan wey menge sakup te upakat he midtukud ni Hirudis. Ne haazà is midsug̵ù dan, migkag̵i ziyà te ki Jesus te, “Menunudlù, netuenan dey he metazeng ka he etew; su ibpenurù nu is tutuu he ebpeveelan kenitew te Megbevayà, ne is lalag te menge etew, kenà ebpekehalin te ibpenurù nu tenged te wazè nu ibpelavi he minsan hentei.

Mateo 23:13

Kehizu niw te menge menunudlù te kesug̵uan wey sikiyu is menge Perisiyu su tarù is kedtuu niw te Megbevayà! Su ke zuen etew he ibeg̵ey zin pezem is gehinawa zin diyà te hadì tew he Megbevayà, kenè niw edtug̵utan, ne kenè niw zaan ibpeveyveyaan is gehinawa niw te Megbevayà.

Nengeulaula 20:33

Is selapì wey minsan manggad te minsan hentei keniyu, kenà iyan tuyù ku.

Ruma 1:9

Tenged te Megbevayà, edhimuwen ku is taman te egkehimu ku wey ku ikesangyew is Meupiya he Tudtulanen mehitenged te Anak din. Ne iyan sikandin nesayud wey ebpeketistig̵us he layun ku sikiyu id-ampù diyà te kandin.

Ruma 16:18

Su is menge etew he ed-ulaula te iring kayi, kenè dan edtumanen is sug̵ù te Nengazen tew he si Kristu, kekenà, iyan dan edtumanen is kandan he menge suat. Pinaag̵i te ketau zan te kegkag̵i wey pinaag̵i te mekempet he egkeg̵iyen dan, egkeekalan dan is isip te menge paglung he etew.

Ruma 9:1

Duen egkeg̵iyen ku keniyu ne kenà tarù heini su sumusundan a ni Kristu. Ne netuenan ku zaan he kenà tarù heini su iyan ed-uwit te isip ku is Wag̵as he Mulin-ulin.

2 Kurintu 12:17

Ne emun iyan heeyan egkeisip niw, ipetueni niw kedì ke hengkey he paag̵i is kegkelimbungi ku keniyu. Duen be nekuwa ku zutun te kedsug̵ua ku te menge zuma ku ziyan te keniyu? Nelimbungan kew zan be?

2 Kurintu 2:17

Iyan, sikami, kenè dey ed-iringan is ulaula te mezakel he ebpenurù su ziyà te kandan henduen be te ibpenapì dan is Lalag te Megbevayà. Ne tenged te midsugù key te Megbevayà, ne tenged daan te edsusiyen key layun te Megbevayà, tutuu is tuyù dey wey egkeg̵iyen dey su nekidsevaha key ki Kristu.

2 Kurintu 4:2

Sikan is menge mahawag he ulaula he meeles he ebeelan te zuma, kenè dey mulà ebeelan. Kenè key edtarùtarù ne kenè dey edhelinen is Lalag te Megbevayà, kekenà, hustu is kedsengyawa zey su wey mesavut te minsan hentei he kenà tarù is ebeelan dey. Iyan edsusi kayi is Megbevayà.

2 Kurintu 7:2

Mahala key keniyu ziyan te g̵ehinawa niw su wazè dey salà te minsan hentei ziyan; wazà minsan hentei ziyan he nezeetan dey is kedtuu zin. Wazà minsan hentei ziyan he midlimbungan dey.

Gelasya 1:20

Tutuu heini is edtudtulen ku keniyu. Netuenan te Megbevayà he kenà tarù.

1 Tiselunika 2:10

Ebpeketistig̵us kew, ne ebpeketistig̵us daan is Megbevayà he hein diyan key te keniyu te nemeketuu wazà igkesewayi te menge ulaula zey, kekenà, metazeng key wey metinumanen key te egkesuatan te Megbevayà.

1 Timoteo 3:3

Kenà sikandin lelenguten; kenà sikandin ebpemeg̵espeg̵es, kekenà, metulanged sikandin. Edlikayan din is samuk ne kenà susuaten te selapì.

1 Timoteo 3:8

Ne iring din ded daan is menge diyekunu, he ke và dà egkeg̵iya, menge edtavang te menge tumutuu; kinahanglan he meupiya is menge ulaula zan. Kinahanglan he telehuzen sikandan; metinumanen sikandan te menge lalag dan. Kenè dan lelenguten, ne kenè dan mebmanggad pinaag̵i te limbung.

Tito 1:7

Ne g̵eina te insarig kandin te Megbevayà is kedumala te menge tumutuu, kinahanglan he wazà supak din. Kenà sikandin mebmandarmandar zà; kenà sikandin eengeren. Kinahanglan he kenà sikandin lelenguten, kenà sikandin ebpemeg̵espeg̵es ne kenà iyan dekelà diyà te g̵ehinawa zin is selapì.

1 Pedro 5:2

Ne iyan idhangyù ku keniyu is: purungi niw elimahi is menge tumutuu he insarig keniyu te Megbevayà. Iring sikandan te menge kerehidu zin. Iyan kew edumala kandan, kenà iring te ebpeg̵esen kew, kekenà, kinahanglan he ebpuun te meliwanag he g̵ehinawa niw su iyan haazà egkesuatan te Megbevayà. Kinahanglan he kenà iyan dà id-elimahi niw kandan is tenged te edsuhulan kew zan, kekenà, tenged te egkesuat kew he edtavang kandan.

2 Pedro 2:18

Uvag mezalem is menge lalag dan, iyan, wazà pulus te egkeg̵iyen dan. Duen menge etew he ed-engkezan dan pezem is menge zaan he zuma zan he ed-ulaula te sayep, iyan, ebpenulayen sikandan dutun te menge menunudlù pinaag̵i te meremerik he kebayà te lawa zan.

2 Pedro 2:3

Tenged te suat dan te selapì, ebpenepian kew zan pinaag̵i te penurù dan he tarù. Daan en he midteg̵ana is silut kandan; andam en is Megbevayà te kedsilut kandan.

Hudas 1:11

Kehizu zan! Mid-iringan dan is mid-ulaula zengan ni Kain. Mid-iringan dan is paag̵i ni Belaam he utew sayep su minsan netuenan dan he mezaat is ed-ul-ulahan dan, ed-ul-ulahan dan gihapun su susuaten sikandan te selapì. Iring te midsukul si Kuri te Mebevayà, midsukul zan daan ne edsilutan sikandan iring te midsilutan daan si Kuri.