1 Tiselunika 2:16 - Manobo Western Bukidnon

¹⁶ ne iring te egkuntedahan dan is tivuuk he menusiyà, su edsemuken key zan wey zey kenà ikesangyew is Lalag te Megbevayà he igkelibri te silut te menge etew he kenà menge Hudiyu. Ne ebpeniguduwan dan te ebaal is taman te egkehimu zan he salà. Ne g̵untaan in-andam en is silut kandan te Megbevayà.

1 Tiselunika 2:16 Кръстосани препратки

Mateo 12:45

Ne zutun edlikù edhipanew su ebpengakat te pitu he zuma zin he menge mezaat he mulin-ulin he tuwas pa he memezaat kenà sikandin. Ne ed-ahuk dan ne ed-ubpè dan dutun te etew. Ne zutun ed-iseg pa ebmezaat is kebpekesavuk dutun te etew kenà te nehuna he kebpekesavuk din. Iring dutun is egkeulaula te menge etew g̵untaan su ed-iseg ebmezaat is kebpekesavuk dan.”

Mateo 23:32

Himesaza niw en is mezaat he ulaula he wazà mepasad te menge kepuun niw!

Mateo 24:14

Ne idsangyew ziyà te tivuuk he kelibutan heini is Meupiya he Tudtulanen te keag̵i te kedhadì te Megbevayà wey metueni heini te tivuuk he menusiyà. Ne emun egkepasad en haazà ne iyan en ketepusan.

Mateo 24:6

Egkezineg niw ziyà te uvey niw is meg̵urub tenged te g̵ira ne egkezineg niw zaan is tudtul te menge g̵ira ziyà te meziyù he tanà. Iyan, kenè kew mahandek su kinahanglan he egkeulaula is iring kayi te kenè pa edtepusen heini is timpu.

Mateo 3:12

Geina te ibpedsivey zin te edtapid is menge metazeng wey is menge lalung he etew, iring sikandin te ebpalid te parey he id-awè din is ukap. Ne haazà is parey, ederengdengen, iyan, is ukap, edtutungen din diyà te hapuy he kenà egkeevukan,” ke si Juan.

Marcos 16:16

Ne sikan is edtuu kayi wey ebpebewtismu, ebeg̵ayan te untung he wazà pidtemanan. Ne sikan is kenà edtuu ne edhukuman te silut.

Nengeulaula 13:45

Iyan, hein nengeahà te menge Hudiyu is mezakel he menge etew, nengesina zan engki Pablo ne midsumpalit dan is impenurù ni Pablo ne mibpenulè dan sikandin.

Nengeulaula 13:50

Ne is menge punuan dutun te inged he Entiyukya wey is menge vai he ed-azap te Megbevayà, midhimu sikandan te menge Hudiyu he mengepauk dan ki Pablo wey ki Bernabe. Ne midsegseg dan haazà is dezuwa zutun te inged.

Nengeulaula 14:19

Ne nekeuma is menge Hudiyu he tig-Entiyukya ziyà te prubinsya he Pisidya wey elin dutun is menge Hudiyu he tig-Ikunya. Midhimu zan he mengepauk engki Pablo haazà is menge etew. Midtuleng dan si Pablo te vatu ne miguyud dan in-awà dutun te inged su kunaan dan ke minatey en.

Nengeulaula 14:2

Ne sikan is menge Hudiyu he wazà medtuu, midhimu zan he mengepauk te menge tumutuu is kenà menge Hudiyu.

Nengeulaula 14:5

Ne is menge Hudiyu wey menge punuan dan wey is menge zuma zan he kenà menge Hudiyu, neisip dan he ebpesipelahan dan wey edtulengen dan te vatu is menge epustul.

Nengeulaula 17:13

Ne sikan is menge tigTiselunika he menge Hudiyu, hein nezineg dan he impesavut daan ni Pablo is Lalag te Megbevayà dutun te inged he Biriya, midhendutun dan ne midhimu zan he mengepauk engki Pablo is mezakel he menge etew.

Nengeulaula 19:9

Ne is duma, mezesen is gehinawa zan ne wazè dan medtuu. Utew mezaat is menge lalag dan diyà te simbahan he idsumpalit dan te tuluuwen he imbeg̵ey te Nengazen tew. Ne tenged dutun, mid-awà si Pablo zutun ne miduma zin is nengehimu en he sumusundan ni Jesus. Ne kada andew edtig̵umen sikandan ni Pablo ziyà te valey ni Tiranu he nehimu he tulunghaan wey zan meistudyuwi is Lalag te Megbevayà.

Nengeulaula 21:21

Nezineg dan is tudtul he is menge zuma tew he Hudiyu he ziyà te menge inged te kenà menge Hudiyu, impenurù nu kandan he engkezi zan is kedtumana zan te kesug̵uan he imbilinbilin dengan ni Moises. Impenurù nu kun kandan he kenè dan sirkunsidara is menge anak dan he maama ne kenè dan en sunuza is menge vetasan tew te menge Hudiyu.

Nengeulaula 23:12

Ne hein nepawà midtig̵um is menge Hudiyu su zuen pezem ed-ul-ulahan dan ki Pablo. Ke sikandan te, “Kenè kiw egkaan wey ed-inum taman te kenè tew pa egkepatey si Pablo.”

Nengeulaula 24:9

Ne zutun is menge Hudiyu he zuma ni Tertulu midtistig̵usan dan is langun he migkag̵i zin.

Nengeulaula 25:2

Ne zutun, is menge punuan he memumuhat wey is menge egalen te menge Hudiyu, midtudtul zan ki Pistu is insumbunga zan ki Pablo. Inhangyù dan ki Pistu

Nengeulaula 25:7

Ne hein nekeuma si Pablo midlingutan sikandin te menge Hudiyu he ebpemuun diyà te Hiruselim ne utew mezaat he ulaula is insumbunga zan kandin, iyan, wazè dan igkepaahà he tutuu is sumbung dan mehitenged kandin.

Nengeulaula 4:12

Iyan dà si Jesus ebpekelibri te silut kenitew,” ke si Pedro, “su zini te tivuuk he kelibutan wazè en duma pa he ngazan he etew he ebpemeleveg he imbeg̵ey te Megbevayà.”

Nengeulaula 9:23

Ne wazà dutun utew meug̵et, mid-uyun is menge Hudiyu he edhimetayan dan si Seulu,

1 Kurintu 10:33

Siak, ebpen-ahaan ku layun is paag̵i su wey meketavang te minsan hentei is menge ulaula ku. Kenè ku iyan ebpen-ahaan is kediey he igkezeyzey, kekenà, iyan is igkezeyzey te langun he menge zuma he etew. Umba ebeelan ku heini su wey meketuu sikandan ne melibri sikandan te silut.

Gelasya 5:11

Menge suled, duen egkag̵i he wazè ku pa engkezi is penurù he kinahanglan he ebpesirkunsidar ki, iyan, emun tutuu heini, maan is kenà a ed-engkezan te ebpesipala te menge zuma ku he Hudiyu? Su emun ibpenurù ku he kinahanglan is kebpesirkunsidar, ne kenè dan egkepauk kediey minsan ke elin ku pa ibpenurù is kebpehimatey ni Jesus he elili kenitew.

Ipisu 3:13

Ne tenged kayi te langun, kinahanglan, menge suled, he kenà igkeawà te kedsarig niw heini is kemereg̵enan he egkeantus ku tenged keniyu, kekenà, lipey kew su iyan ibmeupiya niw.

Ipisu 3:8

Siak, lavew kediey is minsan hentei he menge tumutuu te Megbevayà. Ne minsan pa te iyan heini, midtuvazan a te Megbevayà pinaag̵i te kedsug̵ua zin kediey te kebpenudtul ziyan te keniyu te kenà menge Hudiyu te Meupiya he Tudtulanen mehitenged te utew lavew he zekelà he kenà egketegkad he meupiya he igketuvad kenitew ni Kristu.

1 Tiselunika 1:10

Su edteg̵azan niw kun is kedlikù te Anak din he ebpuun te langit. Iyan si Jesus he Anak te Megbevayà he mibanhew zin. Iyan si Jesus he midlibri kenitew te silut wey kiw mekeliyu te ebpekeuma he kedlimasa te Megbevayà te menusiyà.

2 Tiselunika 2:10

Edterteruan din te minsan hengkey he kelelalung he paag̵i sikan is menge etew he kenà ebpekelikey te silut. Umba kenè dan ebpekelikey te silut su wazè dan medawat te tutuu he tuluuwen he iyan ebpekeveg̵ey kandan te untung he wazà pidtemanan.

1 Timoteo 2:4

su iyan din egkesuatan is wey melibri te silut is tivuuk he menusiyà ne wey zan daan metueni is tutuu he tuluuwen.

Hibriyuhanen 6:8

Iyan, ke zuen tanà he iyan dà ebpeketuvù duen is menge zug̵iyen he sagbet wey menge hilemunen, ne wazè din pulus, ne ed-engkezan, ne ebinsulan te teg̵itanà. Ne iring din ded daan is etew he iring kayi te tanà su edsilutan te Megbevayà.

Impezayag 22:11

Ne zutun he timpu,” ke sikandin, “sikan is mezaat pa is ulaula zin, ipepenigudu en sikandin ibpevaal te mezaat. Ne sikan is meremerik pa is ulaula zin dutun, ipepenigudu en sikandin ibpevaal te meremerik. Ne sikan is metazeng is ulaula zin dutun, ipepenigudu en ibpevaal te metazeng, ne haazà is etew he midhimu te Megbevayà he sakup din, ipepenigudu zutun sikandin te kebpesakup din te Megbevayà.