1 Timoteo 2:8 - Manobo Western Bukidnon

⁸ Ne tenged kayi, is menge maama ziyà te langun he menge inged he meheg̵et is ked-engkezi zan te mezaat he ulaula, egkesuatan ku he med-ampù dan diyà te Megbevayà. Kinahanglan he wazà pauk dan te menge zuma zan wey wazè dan keduwazuwa.

1 Timoteo 2:8 Кръстосани препратки

Mateo 21:21

Ne midtavak si Jesus te, “Tipig̵i niw heini ziyà te isip niw he ke edsarig kew te Megbevayà te kenà duwazuwa, egkehimu niw heini is midhimu ku kayi te kayu he igira. Ne kenà kayi zà taman su minsan pa ke ekeg̵iyan niw heeyan is buntud te, ‘Med-awè ka keniyan ne agbur ka ziyà te zag̵at,’ ne ebpemineg̵en kew zin.

Mateo 5:44

Ne iyan mulà kediey he penurù is: ebpurungan ta is menge kuntada ta wey ebpenubtuvazan ta te meupiya is ebpesipala kenita.

Mateo 6:12

peseyluwa key te menge salè dey iring te nekepesaylu key te nekesalà kenami.

Lucas 23:34

Ne zutun te kemulu zan pa idransang si Jesus, ne mid-ampù sikandin diyà te Megbevayà, ke sikandin te, “Amey ku, peseyluwa nu sikandan su wazè dan metueni ke hengkey heini is ed-ul-ulahan dan.” Ne zutun, haazà is midransang kandin, midripa zan ke hentei is ebpekeangken te menge ugelingen ni Jesus.

Lucas 24:50

Ne te nekepasad si Jesus dutun is egkag̵i ne mid-uwit din sikandan diyà te g̵awas te inged he Hiruselim, ne hein diyè dan en te uvey te inged he egngezanan te Bitanya, ne imbayew zin is menge velad din su ebpenubtuvazan din sikandan.

Juan 4:21

Ne migkag̵i si Jesus te, “Benar, Bayi, is egkeg̵iyen ku kenikew he egkeuma is timpu he kenè en maan dini zà te vuntud wey minsan diyà te Hiruselim ed-ezapa is Amey tew he Megbevayà.

Nengeulaula 10:2

Heini si Cornelio, ne metinumanen te sug̵ù te Megbevayà. Sikandin wey is tivuuk he pemilya zin, minsan kenè dan menge Hudiyu, ed-azap dan te Megbevayà. Dekelà is tavang din te menge egkengeayuayu he menge Hudiyu wey layun sikandin ed-ampù diyà te Megbevayà.

Nengeulaula 10:31

Ke sikandin te, ‘Cornelio, midineg en te Megbevayà is ked-ampù nu, ne wazè din daan melipati is tavang nu te menge etew.

Nengeulaula 10:4

Ne si Cornelio, netengtengan din haazà is belinsug̵uen ne utew sikandin nahandek. Ne ke sikandin te, “Hengkey?” Ne migkag̵i haazà is belinsug̵uen te, “Midineg en te Megbevayà is ked-ampù nu ne neehè din is ketulanged nu ne kenè ke zin egkelipatan.

Nengeulaula 21:5

Iyan, hein neume en is kegenat dey, mid-awè key zutun te inged. Ne nemenduma kenami is langun he menge tumutuu, maama se vahi wey menge anak dan. Ne midluhud key zutun te veyvey te zag̵at is ed-ampù.

Nengeulaula 7:60

Ne zutun nekeluhud ne mid-uman megkag̵i te, “He Nengazen, kenè nu isipa he idsilut kandan heini is salè dan.” Ne te nekag̵i zin haazà, naawà is gehinawa zin.

1 Kurintu 7:7

Su egkesuatan ku pezem he ed-iringan a keniyu is wazè din esawa, iyan, netuenan ku he wazà himuwa te Megbevayà he meked-iiring kiw su imbeg̵ey zin diyà te sevaha is kebpekeantus te kenà kebpengesawa, ne selakew is imbeg̵ey zin diyà te sevaha.

2 Kurintu 2:14

Ne minsan pa zutun utew zekelà is kebpeselemati ku te Megbevayà su tenged te kebpekidsevaha tew ki Kristu, iring kiw te menge vihag ni Kristu he ibpeehè din diyà te minsan hentei. Ne pinaag̵i kenitew ibpesavut din diyà te menge etew ke hentei sikandin diyà te minsan hendei.

Pilipus 1:12

Menge suled, egkesuatan ku he mesavut niw he is langun he mereg̵en he nehitavù kediey, ne kenà mezaat, kekenà, meupiya, su neketavang kedì te kedsengyawa te Meupiya he Tudtulanen.

1 Tiselunika 1:8

Ebpuun diyan nekeeneb is Lalag te Nengazen, kenà diyan dà te prubinsya he Mesidunya wey ziyà te prubinsya he Gerisya, kekenà, is menge etew ziyà te minsan hendei, nezineg dan is tudtul mehitenged te kedtuu niw te Megbevayà. Wazè en kinahanglan he ibpenudtul zey pa ziyà te menge etew is kedtuu niw.

1 Timoteo 5:14

Ne tenged kayi egkesuatan ku he mebpeuman mebpeesawa is menge menguhed he valu he vahi su wey mekeanak sikandan ne med-elima te pemilya zan. Ne zutun wazà igkesewayi kandan te menge kuntada tew.

Tito 3:8

Utew tutuu heini is impesavut ku kenikew. Egkesuatan ku he ipurung nu ipenurù heini ziyan su utew hustu wey zekelà is pulus kayi ziyà te minsan hentei. Ne emun nesavut en heini te menge tumutuu te Megbevayà iyan dekelà diyà te g̵ehinawa zan is ked-ul-ulaha zan te meupiya.

Hibriyuhanen 10:22

Ne tenged kayi, ed-etuvang ki en te Megbevayà, ne kenà tarù is ked-ezapa ta kandin. Edheg̵eten ta is kedtuu ta ne kenè ki eduwazuwa. Su netuenan ta he nepelisan ki en te lengesa ni Jesus ne netuenan ta zaan he in-awà kayi is menge salè ta. Nengebewtismuwan kiw en he tuus te kedlumpiyuwi kenitew te Megbevayà.

Santiago 4:8

Aput kew ziyà te Megbevayà ne ed-uvayan kew zin. Sikiyu is mekesesalà, engkezi niw is menge ulaula niw he mezaat. Sikiyu is uvag dà is kedtuu zan, pelumpiyuwi niw te Megbevayà is isip niw wey g̵ehinawa niw.

1 Pedro 3:7

Sikita zaan is maama, kinahanglan he ebpurungan ta wey edtehuzen ta is esawa ta. Su minsan pa te meluya is lawa zan kenà is kenita, iring sikandan kenita su imbeg̵ey zaan kandan te Megbevayà is untung he wazà pidtemanan. Ne tenged kayi kinahanglan he edtehuzen ta sikandan su wey pemineg̵a te Megbevayà is kebpengampù ta.