1 Timoteo 1:13 - Manobo Western Bukidnon

¹³ Dengan, mezaat is menge lalag ku mehitenged kandin; midrasey ku is menge sumusundan din ne midsumpalit ku sikandin. Ne minsan pa zutun, nehizuwan e zin su nehimu ku is menge mezaat he vaal ku tenged te wazè ku pa metueni is tutuu he tuluuwen wey wazè ku pa sikandin tuuwi.

1 Timoteo 1:13 Кръстосани препратки

Lucas 12:47

Ne sikan is sulug̵uen he netuenan din en is ibpeveelan kandin te egalen din, iyan, wazà med-andam ne wazà medtuman te ibpeveelan kandin te egalen din, ne kenà sikandin ed-uraman te ebug̵el zutun te egalen din.

Lucas 23:34

Ne zutun te kemulu zan pa idransang si Jesus, ne mid-ampù sikandin diyà te Megbevayà, ke sikandin te, “Amey ku, peseyluwa nu sikandan su wazè dan metueni ke hengkey heini is ed-ul-ulahan dan.” Ne zutun, haazà is midransang kandin, midripa zan ke hentei is ebpekeangken te menge ugelingen ni Jesus.

Nengeulaula 22:4

Ne tenged dutun, mibpesipelahan ku is menge tumutuu ki Jesus ne mibpenhimetayan ku. Mibpendakep ku is menge maama wey menge vahi ne mibpirisu ku.

Nengeulaula 3:17

Ne g̵untaan menge suled, netuenan ku he sikiyu wey is menge punuan tew, mibeelan niw is mezaat diyà te ki Jesus tenged te wazè niw mesavut ke hentei sikandin.

Nengeulaula 8:3

Ne si Seulu, egkesuatan din he mezezeeti zin is upakat te menge tumutuu ne mezaat is ed-ul-ulahan din kandan. Midsusi zin is kada valey ne midakep din is menge tumutuu ne mibpen-uwit din is menge maama wey menge vahi ne mibpirisu zin.

Nengeulaula 9:1

Igkikinehendekè pa zutun si Seulu te menge sumusundan te Nengazen he si Jesus su ebpenhimetayan din sikandan.

Nengeulaula 9:13

Ne midtavak si Eneniyas te, “Nengazen, netuenan ku pinaag̵i te mezakel he etew is utew memezaat he mid-ulaula zin diyà te menge sumusundan nu ziyà te Hiruselim.

Nengeulaula 9:5

Ne migkag̵i si Seulu te, “Hentei ka?” Ne midtavak te, “Iyan a si Jesus kes ebpesipelahan nu.

1 Kurintu 15:9

Nelevawan a te langun he menge zuma ku he menge epustul su te wazè e pa meketuu midlupiglupig ku te pesipala is menge tumutuu ki Jesus, ne tenged kayi kenà a pezem dait he egeraran he epustul.

1 Kurintu 7:25

Ne sikiyu zaan is wazè pa esawa, wazè ku sug̵ù keniyu he ebpuun te Nengazen, iyan, siak is nehimu he egkeserig̵an tenged te zekelà he hizu kediey te Megbevayà, duen sambag ku keniyu.

Gelasya 1:13

Nezineg niw is daan he menge ulaula ku zengan te kemulu ku pa kebenteyani te tuluuwen te menge zuma ku he Hudiyu. Is langun he menge tumutuu ki Jesus, mibpesipelahan ku su ebpeg̵esen ku pezem sikandan he meengkezi zan is kedtuu zan.

Pilipus 3:6

Ne tuus te utew meheg̵et dini te g̵ehinawa ku is kedtumana ku te menge tulumanen dey te menge Hudiyu, su mibpemesipelahan ku is menge tumutuu ki Jesus. Ne sumalà te kedtumana ku te kesug̵uan he imbilinbilin ni Moises wazè ku netuenan he supak ku te Megbevayà.

1 Timoteo 1:16

Ne minsan pa zutun, nehizuwan a g̵ihapun te Megbevayà su wey pinaag̵i te kebpelevaya zin kedì te utew lalung, ikepezayag ni Jesu Kristu he utew mepelevayen sikandin. Impezayag din heini su wey mesavut heini te langun he menge etew he edtuu kandin keuzemà ne ebeg̵ayan din te untung he wazà pidtemanan.

Hibriyuhanen 4:16

Ne tenged kandin, wazà igkelenew te isip tew te ked-uvey zutun te etuvangan te mekeg̵eg̵ehem he Megbevayà pinaag̵i te ked-ampù su utew velig̵eg̵awen is Megbevayà. Ingkehizu kiw zin ne edtevangan kiw zin dutun te timpu te menge kemereg̵enan.

1 Pedro 2:10

Su zengan kenè kiw menge sakup te Megbevayà ne g̵untaan menge sakup kiw zin en. Dengan wazè tew hanew zutun te hizu te Megbevayà, iyan, guntaan impezayag din en kenitew.