1 Pedro 5:2 - Manobo Western Bukidnon

² Ne iyan idhangyù ku keniyu is: purungi niw elimahi is menge tumutuu he insarig keniyu te Megbevayà. Iring sikandan te menge kerehidu zin. Iyan kew edumala kandan, kenà iring te ebpeg̵esen kew, kekenà, kinahanglan he ebpuun te meliwanag he g̵ehinawa niw su iyan haazà egkesuatan te Megbevayà. Kinahanglan he kenà iyan dà id-elimahi niw kandan is tenged te edsuhulan kew zan, kekenà, tenged te egkesuat kew he edtavang kandan.

1 Pedro 5:2 Кръстосани препратки

Lucas 12:32

Sikiyu is menge sumusundan ku, kenè kew mahandek. Minsan pa te zeisey kew zà, is Amey niw he Megbevayà, egkesuatan din he medhadì kew iring te edhadì daan sikandin.

Nengeulaula 20:29

Netuenan ku he emun ed-ewaan ku sikiyu, duen edlepew kayi te keniyu he menge menunudlù he is ibpenurù dan, ne ebpekezezaat te upakat ne edèdeetan dan iyan is upakat niw te menge tumutuu.

Nengeulaula 21:13

Iyan, midtavak si Pablo te, “Maan is edhimuwen niw he utew a meseeng pinaag̵i te kedsineg̵ew niw? Su emun intug̵ut en te Nengazen tew he si Jesus he iyan heeyan egkehitavù kedì, andam ad, kenà te kebpepirisu zà, kekenà, minsan te kebpehimatey ziyà te Hiruselim.”

Ruma 1:15

Tenged kayi, utew ku zaan egkesuati he ibpenudtul ku is Meupiya he Tudtulanen diyan te keniyu he ziyan te inged he Ruma.

1 Kurintu 9:7

Penenglitan, is sundaru, egkehimu ve ke kenà sikandin ebeg̵ayan te egkeg̵astu zin? Kenà egkehimu. Kenà daan egkehimu he kenà ebpekekaan is teg̵ipinemula zutun te veg̵as te pinemula zin. Ne iring din ded daan is ed-elima te kerehidu su zuen din egkepupulus tenged dutun.

1 Timoteo 3:3

Kenà sikandin lelenguten; kenà sikandin ebpemeg̵espeg̵es, kekenà, metulanged sikandin. Edlikayan din is samuk ne kenà susuaten te selapì.

1 Timoteo 3:8

Ne iring din ded daan is menge diyekunu, he ke và dà egkeg̵iya, menge edtavang te menge tumutuu; kinahanglan he meupiya is menge ulaula zan. Kinahanglan he telehuzen sikandan; metinumanen sikandan te menge lalag dan. Kenè dan lelenguten, ne kenè dan mebmanggad pinaag̵i te limbung.

Tito 1:11

Kinahanglan he ibpeengkezan nu kandan is kebpenurù dan su ke zuen sevaha he egketazin is isip din pinaag̵i te kedtuuwi zin kayi he penurù egkesemukan is kebpekid-upakat din te menge zuma zin dutun te pemilya zin. Iyan dà ibpenurua zan dutun te kenà hustu he ibpenurù is wey zan mekepenapì.

Tito 1:7

Ne g̵eina te insarig kandin te Megbevayà is kedumala te menge tumutuu, kinahanglan he wazà supak din. Kenà sikandin mebmandarmandar zà; kenà sikandin eengeren. Kinahanglan he kenà sikandin lelenguten, kenà sikandin ebpemeg̵espeg̵es ne kenà iyan dekelà diyà te g̵ehinawa zin is selapì.

Tito 2:14

Mibpehimatey sikandin he elili kenitew wey kiw zin melibri te kebpekeulaula tew te mezaat ne wey kiw zin daan mehimu he menge g̵aked din he etew he nelumpiyuwan he utew en egkengesuat he ed-ulaula te meupiya.

Tito 3:1

Keg̵iyi nu is menge tumutuu ziyan he kinahanglan he mebpesakup dan te velaud te gubirnu wey te menge upisyal ziyan. Medtuman dan te menge sug̵ù dan kandan ne medtavang dan ke zuen meupiya he ed-ul-ulahan te gubirnu.

Pilimun 1:14

Iyan, kenè ku pa heini ebeelan te wazè nu pa itug̵ut kediey. Kenà a ebpeg̵es he ikehizu a kenikew. Su iyan meupiya is ebpuun te meliwanag he g̵ehinawa is kedhimuwa nu kayi.

Hibriyuhanen 12:15

Bantey kew su kela ke zuen duma keniyu he kenà edawat te g̵ag̵ew te Megbevayà. Su is iring kayi he etew, ne ebpekeiring te sagbet he ebpemeg̵as te mepait he ebpekehilu. Ebpekesamuk sikandin te menge tumutuu ne mezakel he etew is ebpekeiring kandin te ed-ulaula te mezaat.

2 Pedro 2:3

Tenged te suat dan te selapì, ebpenepian kew zan pinaag̵i te penurù dan he tarù. Daan en he midteg̵ana is silut kandan; andam en is Megbevayà te kedsilut kandan.