1 Pedro 5:10 - Manobo Western Bukidnon

¹⁰ Mevavè dà is ked-antus niw ne edheg̵eten te Megbevayà is kedsarig niw kandin. Ebig̵eran kew zin, edlig-enan kew zin wey ebeg̵ayan kew zin te zesen. Iyan sikandin puunà te minsan hengkey he tavang kenitew. Midhimu kiw zin he tumutuu su wey pinaag̵i te kebpekidsevaha tew ki Kristu mekeambit kiw te wazà pidtemanan he utew kegkelavew zin.

1 Pedro 5:10 Кръстосани препратки

Lucas 22:32

Iyan, in-ampù ku sikew, Simon, diyà te Megbevayà he kenà maawà is kedtuu nu kediey. Ne emun melig-en en is kedtuu nu kediey ne himuwa nu he mebmelig-en daan is kedtuu te menge zuma nu.”

Ruma 15:13

Is Megbevayà he iyan puunà te langun he meupiya he ebpeebuten tew, berakat he veg̵ayi kew zin te utew zekelà he kelipey wey melinawen he kebpekesavuk tenged te kedtuu niw kandin su wey pinaag̵i te g̵ehem te Wag̵as he Mulin-ulin meheg̵et is kebpeebuta niw te langun he meupiya he egkezawat niw keuzemà.

Ruma 15:5

Is Megbevayà, ne iyan edsambag kenitew wey ebeg̵ey kenitew te kebmeinentusen te kemeresayan. Berakat he himuwa zin he mesevaha is gehinawa niw wey isip niw kayi te kedsundani niw ki Jesu Kristu.

Ruma 16:25

Edelig̵en tew is Megbevayà! Pinaag̵i te Meupiya he Tudtulanen he ibpenudtul ku he iyan is mehitenged ki Jesu Kristu, wey pinaag̵i te tuluuwen he neug̵et he timpu is ked-elesa zuen te Megbevayà, egkehimu he edheg̵eten din is kedtuu niw.

Ruma 9:11

Ne si Rebecca, hein meg̵aan en ed-anak, migkeg̵iyan sikandin te Megbevayà, ke sikandin te, “Sulug̵uen is kakey te hazi zin.” Migkag̵i zin heini te wazè pa ianak haazà is sereping, ne wazè pa ulaula zan he mezaat wey meupiya. Ne umba neulaula heini su ibpesavut te Megbevayà he is kebpilia zin te menge etew, ne kenà tenged te menge meupiya he ulaula he nehimu zan, kekenà, tenged dà te iyan egkesuatan din.

Ruma 9:24

Iyan ki impetuu zin, iyan, is menge etew he impetuu zin, ne kenà menge Hudiyu zà, kekenà, elin daan is menge etew he kenà menge Hudiyu.

1 Kurintu 1:10

Menge suled ku tenged te kedtuu, duen idhangyù ku keniyu pinaag̵i te kebayàbayà kenitew te Nengazen tew he si Jesus; iyan is: kinahanglan he kenè kew mevahinbahin, kekenà, uyun-uyun kew su wey mesevaha is isip niw wey g̵ehinawa niw.

1 Kurintu 1:9

Is Megbevayà, egkeserig̵an tew is lalag din, ne iyan sikandin mibpetuu kenitew wey kiw mebpekid-upakat ki Jesu Kristu he iyan Anak din wey iyan Nengazen tew.

2 Kurintu 13:11

Menge suled, iyan dà heini menge lalag ku keniyu; berakat he mebmelipayen kew. Purungi niw is menge ulaula niw; tumana niw is menge sambag ku keniyu. Kinahanglan he mesevaha is gehinawa niw ne mebmelinawen is ked-ubpè niw. Su emun ebeelan niw heini, is Megbevayà he iyan puunà te g̵ag̵ew wey kelinew, layun eduma keniyu.

2 Kurintu 4:17

Ne heini is menge kemeresayan he egkeantus dey g̵untaan, ne meg̵aan dà utew, iyan, tenged te ked-antus dey kayi zuen egkeperateng dey he utew zekelà he kegkelavew he ibeg̵ey kenitew keuzemà. Ne kenà ebpekesusuluwan is kemeresayan he egkeantus dey kayi te utew zekelà he wazè din pidtemanan he kegkelavew.

Pilipus 4:13

Egkehimu ku is minsan hengkey he ibpeulaula kedì tenged te tavang ni Kristu he iyan edlig-en kedì.

Kulusas 2:7

Purung kew pendalid diyà te kandin; purungi niw istudyuwi is menge ulaula zin; purungi niw tuuwi sikan is tutuu he tuluuwen he impenurù keniyu. Ne kinahanglan he layun niw peselemati te Megbevayà is gag̵ew zin keniyu.

1 Tiselunika 2:12

Midsembag̵an dey sikiyu; iyan key midlangan te g̵ehinawa niw ne midhengyuan dey sikiyu he med-ulaula kew te sungkad te egkesuatan te Megbevayà. Iyan sikandin midhimu keniyu he tumutuu wey kew zin mehedii wey kew tulusa.

2 Tiselunika 2:14

Midhimu kew zin he menge tumutuu kandin pinaag̵i te kebpesevuta zey keniyu te Meupiya he Tudtulanen su wey kew mekeambit te utew kegkelavew te Nengazen tew he si Jesu Kristu.

2 Tiselunika 3:3

Iyan, metinumanen mulà is Nengazen te lalag din, ne iyan sikandin ebantey wey edlig-en keniyu wey kew kenà mekeizi ni Setanas.

1 Timoteo 6:12

Penigudu ka he meupiya is kedlumbè nu, he ke và egkeg̵iya, is kedtumana nu te langun he ebpeveelan kenikew tenged te neketuu ka. Hemeni nu is untung he wazè din pidtemanan su umba midhimu ka te Megbevayà he tumutuu kandin su wey nu heini maangken. Nekepenudtul ka ziyà te mezakel he menge etew he neketuu ka te tutuu he tuluuwen.

2 Timoteo 1:9

Is Megbevayà, ne iyan midlibri kenita te silut ne midhimu ki zin he g̵aked din. Umba mid-ulaula zin heini, kenà tenged te meupiya is menge ulaula ta, kekenà, tenged dà te iyan tuyù din wey tenged te utew zekelà is gag̵ew zin kenita. Dengan te wazè pa limbag̵a is minsan hengkey mid-isip din he ibpeehè din is gag̵ew zin kenita pinaag̵i te kebeg̵aya zin kenita ki Jesu Kristu.

2 Timoteo 2:10

Ne tenged kayi ed-entusen ku is minsan hengkey he merasey wey ku metevangi is menge etew he pinilì te Megbevayà. Egkesuatan ku he melibri sikandan te silut pinaag̵i te kebpekidsevaha zan ki Jesu Kristu ne mekezawat dan te ketulusan he wazà pidtemanan.

Hibriyuhanen 9:15

Ne tenged kayi zaan nehimu en si Kristu he zatù tew su wey zin metukud is beg̵u en he paag̵i te kebpekidsevaha tew te Megbevayà. Ne pinaag̵i kayi, is langun he midhimu te Megbevayà he meketuu, egkezawat dan is langun he meupiya he wazè din pidtemanan he impenaad te Megbevayà. Umba egkehimu heini su pinaag̵i te kebpatey ni Kristu nengepalis is langun he menge mezaat he ulaula he nehimu te menge etew zutun te timpu he nengesakup sikandan te nehuna he paag̵i.

1 Pedro 1:15

Ne g̵untaan kinahanglan he wazà igkesewayi te menge ulaula tew iring te wazà igkesewayi te menge ulaula te Megbevayà he iyan nengelintau wey kiw meketuu.

1 Pedro 4:10

Is minsan hengkey he ketau he imbeg̵ey te Megbevayà diyà te kada sevaha keniyu, kinahanglan he g̵emita zin wey metevangi is menge zuma zin he tumutuu su wey hustu is kegemita niw te minsan hengkey he intavang keniyu te Megbevayà.

1 Pedro 4:11

Sikita is edwali, kinahanglan he is kedwali ta, ne utew hustu he iring te iyan en edwali is Megbevayà. Sikita is edtavang, ne kinahanglan he kenè ta edlipatan he is idtavang ta, ne ziyà ebpuun te Megbevayà su wey pinaag̵i te g̵ehem ni Jesu Kristu iyan mevantug is Megbevayà te minsan keenu su iyan dait he edelig̵en wey zait he ebayàbayà te wazà pidtemanan.

2 Pedro 1:3

Pinaag̵i te g̵ehem te Megbevayà edtevangan kiw zin te mezakel he paag̵i wey kiw meketuman te menge sug̵ù din kayi te ked-ubpè tew zini te kelibutan. Umba egkehimu heini su impekilala en kenitew si Jesu Kristu he iyan mibpetuu kenitew wey kiw mekeambit te ketazeng din wey te utew zin kegkelavew.

1 Juan 2:25

Su iyan impenaad kenitew ni Kristu is untung he wazà pidtemanan.

Hudas 1:24

Utew zekelà is kebpeselemati tew te Megbevayà. Iyan metau he edtavang kenitew su wey kenè kiw mekesuwey ziyà te kandin. Iyan metau he id-etuvang kiw keuzemà kandin diyà te vulawan he ed-ulian he wazà igkesewayi kenitew he utew zekelà dutun is kelipey tew.