1 Pedro 4:16 - Manobo Western Bukidnon

¹⁶ Iyan, ke iyan niw ibpekeantus te merasey is tenged te neketuu kew ki Kristu, kenè niw haazà ikeeled, kekenà, utew zekelà is kebpeselemati niw te Megbevayà su neg̵aked kew ni Kristu.

1 Pedro 4:16 Кръстосани препратки

Nengeulaula 11:26

Ne hein neturedu zin, miduma zin diyà te Entiyukya. Ne seled te sengetuig, diyè dan is dezuwa med-amur te menge tumutuu ziyà te Entiyukya ne mezakel is mibpemenurù dan. Ne ziyà te Entiyukya, sikan is menge sumusundan, aney en gerari he menge Kristiyanus.

Nengeulaula 26:28

Ne zutun midtavak si Egripa te, “Kela ke kunaan nu ke egkeg̵aanggaan a kenikew egkehimu he tumutuu ki Kristu!”

Nengeulaula 28:22

Egkesuatan dey te ebpemineg is menge penurù nu wey zey mesusi su netuenan dey he is menge tumutuu kayi te tuluuwen he ibpenurù nu, egkuntedahan te menge etew ziyà te minsan hendei.”

Nengeulaula 5:41

Ne is menge epustul, migenat dan ne utew zan nelipey su mid-isip sikandan te Megbevayà he meinentusen te ked-el-eleza kandan tenged te kedtuu zan ki Jesus.

Pilipus 1:20

Ne utew ku egkesuati, wey idsarig ku ziyà te Megbevayà he layun ku metuman is ebpeveelan din kedì su wey a kenà meeled te minsan keenu he timpu lavew en guntaan. Egkesuatan ku he mezalig si Kristu tenged kedì pinaag̵i te kebpaawaa kedì kayi te pirisuwan ne emun kenà, ne mezalig si Kristu pinaag̵i te kebpatey ku.

Pilipus 1:29

Su is mibpeveelan keniyu te Megbevayà, ne kenà iyan dà is kedtuuwi niw ki Kristu, kekenà, elin daan is ked-entusa niw te kemeresayan tenged te kedtuu niw kandin.

2 Timoteo 1:12

ne tenged kayi egkeantus ku g̵untaan heini is kemeresayan. Ne minsan pa zutun, netuenan ku ke hentei sikandin is midserig̵an ku, ne netuenan ku zaan he taman te andew keuzemà he edsusiyen din is nengeulaula te menusiyà, metau sikandin he ebantey te langun he insarig din kediey.

Santiago 2:7

Hentei is edsumpalit te mahal he ngazan ni Jesus he iyan teg̵ig̵aked kenitew? Iyan is menge sepian.

1 Pedro 2:12

Kinahanglan he utew metazeng is menge ulaula niw su wey maahà te menge etew he kenà tumutuu. Su minsan ke egkeg̵iyen dan he mezaat is ulaula niw, egketuenan dan gihapun he meupiya is ed-ul-ulahan niw ne ebpekezalig dan te Megbevayà keuzemà te andew te kebulusi zin te menusiyà.

1 Pedro 4:11

Sikita is edwali, kinahanglan he is kedwali ta, ne utew hustu he iring te iyan en edwali is Megbevayà. Sikita is edtavang, ne kinahanglan he kenè ta edlipatan he is idtavang ta, ne ziyà ebpuun te Megbevayà su wey pinaag̵i te g̵ehem ni Jesu Kristu iyan mevantug is Megbevayà te minsan keenu su iyan dait he edelig̵en wey zait he ebayàbayà te wazà pidtemanan.

1 Pedro 4:14

Utew kew zeyzey ke edsudien kew tenged te menge sumusundan kew ni Kristu su tuus heini he mid-ulinan kew te mekeg̵eg̵ehem he Mulin-ulin he iyan is Megbevayà.

1 Pedro 4:19

Ne tenged dutun, menge suled, ke ebpekeantus kew en te merasey su iyan intuvad keniyu te Megbevayà, isarig niw is gehinawa niw ziyà te kandin he iyan metinumanen he nenlimbag wey hemeni niw is memeupiya he ulaula.