1 Pedro 4:13 - Manobo Western Bukidnon

¹³ Kenè kew meinuinu, kekenà, lipey kew utew su pinaag̵i kayi ebpekeambit kew te menge kemeresayan he naantus ni Kristu ne tenged dutun utew kew zaan egkelipey keuzemà ke ibpezayag din kenitew haazà is bulawan he ed-ulian.

1 Pedro 4:13 Кръстосани препратки

Mateo 16:27

Su Siak is Kakey te Menusiyà, imbanglis kedì he mekelikù a keuzemà he edumahan te menge velinsug̵uen ku wey edsun-uzan ad te mekeg̵eg̵ehem he anlag te Amey ku he Megbevayà. Ne zutun edsuhulan ku is langun he menge etew sumalà is mid-ulaula te uman sevaha.

Mateo 25:21

Ne migkag̵i haazà is egalen din te, ‘Utew meupiya is baal nu! Metinumanen ka he sulug̵uen! Ne g̵eina te egkeserig̵an ka te zeisey he selapì idsarig ku kenikew is dekelà. Seled ka zini wey ka mekeambit te kelipey ku.’

Mateo 25:23

Ne migkag̵i haazà is egalen din te, ‘Utew meupiya is baal nu! Metinumanen ka he sulug̵uen! Geina te egkeserig̵an ka te zeisey he selapì, idsarig ku kenikew is dekelà. Seled ka zini wey ka medlipey te kelipey ku.’

Mateo 25:31

Siak is Kakey te Menusiyà, dutun te kedlikù ku he utew zekelà is gehem te ked-anlag ku wey edumahan ad te langun he menge velinsug̵uen ku, ebpinuu ad is edhadì.

Mateo 25:34

Ne zutun, siak is hadì, ekeg̵iyan ku is menge etew ziyà te zapit te egkekewanan ku te, ‘Sikiyu is midtuvazan te Amey ku he Megbevayà, kayi kew su iyan kew edhedian ku. Su is kedhadì ku keniyu, integ̵ana en dengan puun pa te kedlimbag̵a te kelibutan.

Mateo 5:12

Iyan daan heini kes mid-ulaula te menge etew zengan diyà te menge ebpeneuven te Megbevayà. Medlipey kew utew su utew zekelà is idsuhul keniyu keuzemà diyà te langit.

Marcos 8:38

Is minsan hentei he igkeeled e zin wey igkeeled din is ibpenurù ku kayi te timpu he mezakel is menge etew he lalung wey edsumpalit te Megbevayà, siak is Kakey te Menusiyà, igkeeled ku zaan sikandin keuzemà ke edlikù a he edumahan a te menge velinsug̵uen ku wey edsun-uzan ad te mekeg̵eg̵ehem he anlag te Amey ku he Megbevayà.”

Lucas 17:30

Iring ded dutun keg̵aan is kegketik-ew te kedlikù ku te Kakey te Menusiyà keuzemà.

Nengeulaula 16:25

Ne hein metaneb en is kezukileman, mid-ampù si Pablo wey si Silas wey migkanta zan is edalig te Megbevayà, ne ebpememineg kandan is menge zuma zan he pirisu.

Nengeulaula 5:41

Ne is menge epustul, migenat dan ne utew zan nelipey su mid-isip sikandan te Megbevayà he meinentusen te ked-el-eleza kandan tenged te kedtuu zan ki Jesus.

Ruma 5:3

Ne kenà duen dà taman su ebelesen te kelipey is menge kemereg̵enan he nengeseg̵azan ta su netuenan ta he pinaag̵i kayi edlumbazen ki wey ki mehimu he meinentusen.

Ruma 8:17

Ne g̵eina te anak ki zin, keuzemà egkezawat ta is langun he meupiya he impenaad din kenita, ne kenà duen dà taman, su is minsan hengkey he ibeg̵ey zin ki Kristu, ibeg̵ey zin daan kenita. Iyan, wey ki zà ebpekeambit te utew meupiya he kebpekesavuk ni Kristu ke ed-entusen ta is menge kemereg̵enan tenged te kedtuu ta, iring te si Jesu Kristu, nekeantus daan te kemereg̵enan.

Ruma 8:18

Ne netuenan ku he is kemereg̵enan he egkeseg̵azan ta g̵untaan dini te kelibutan, ne wazà mekesusuluwan te utew kegkelavew he ibeg̵ey kenita keuzemà.

2 Kurintu 1:5

Minsan pa te zekelà is kemeresayan he egkeantus tew tenged te nekidsevaha kiw ki Kristu, dekelà daan is tavang kenitew te Megbevayà tenged daan ki Kristu.

2 Kurintu 1:7

Umba kenà duwazuwa is kedsarig dey keniyu su netuenan dey he emun ed-entusen niw is merasey he iring te naantus dey zaan, ne iring din ded daan, edtevangan kew te Megbevayà iring te edtevangan key zin daan.

2 Kurintu 4:10

Iring ki Jesus dengan, egkuntedahan key layun te menge etew, ne egkesuatan key zan te edhimatey. Umba egkeulaula heini is langun su wey metueni pinaag̵i kenami he uuyag en maan si Jesus su layun key zin edtevangan.

2 Kurintu 4:17

Ne heini is menge kemeresayan he egkeantus dey g̵untaan, ne meg̵aan dà utew, iyan, tenged te ked-antus dey kayi zuen egkeperateng dey he utew zekelà he kegkelavew he ibeg̵ey kenitew keuzemà. Ne kenà ebpekesusuluwan is kemeresayan he egkeantus dey kayi te utew zekelà he wazè din pidtemanan he kegkelavew.

Pilipus 3:10

Iyan dà guntaan ibmeupiya te g̵ehinawa ku is kegketueni ku te menge ulaula ni Kristu wey is kebulusi kedì te g̵ehem he iyan sikan is gehem he ingkevanhew zin. Egkesuatan ku he mekeambit a zaan duen te kemeresayan he mid-antus din he iyan is ked-engkezi ku te kediey he egkesuatan iring te kandin he kebelevag̵a te untung din.

Kulusas 1:24

Maambe ke ebpekeantus a g̵untaan te merasey su iyan igkezeyzey niw. Igkelipey ku heini su iring te kegkerasey ni Kristu edhimesazan ku en is langun he mereg̵en he ibpaantus din kediey su wey mezeyzey is lawa ni Kristu, he ke và dà egkeg̵iya, is menge tumutuu kandin.

2 Timoteo 2:12

Ke ed-antus ki te kemeresayan ebpekehadì ki keuzemà duma kandin. Iyan, ke egkag̵i ki he kenè ki g̵aked din egkag̵i zaan sikandin keuzemà he kenè ki iyan gaked din.

1 Pedro 1:13

Ne g̵eina te iyan haazà, kinahanglan he ed-andam ki wey ki mekepurung mekeisip-isip su wey ta layun mepurungi is kedsunud ta te Nengazen. Kinahanglan he iyan dekelà diyà te g̵ehinawa ta is kebperateng ta te utew meupiya he ibeg̵ey te Megbevayà kenita keuzemà dutun te andew te kebpeg̵awag̵awa ni Jesu Kristu.

1 Pedro 2:21

Nekeantus si Kristu te merasey wey ki melibri te silut. Ne nehimu sikandin he petug-iringan he kinahanglan he edsunuzen ta. Umba mibpetuu kenitew is Megbevayà su wey tew si Kristu meiringi.

1 Pedro 5:1

Sikiyu is ebmeg̵urangen te menge tumutuu, duen idhangyù ku keniyu su ebmeg̵urangen a zaan. Nekevantey a te kedresaya zengan ki Kristu ne iring keniyu, ebpekeseled a zaan te vulawan he ed-ulian he ibpeg̵awag̵awa keuzemà.

1 Pedro 5:10

Mevavè dà is ked-antus niw ne edheg̵eten te Megbevayà is kedsarig niw kandin. Ebig̵eran kew zin, edlig-enan kew zin wey ebeg̵ayan kew zin te zesen. Iyan sikandin puunà te minsan hengkey he tavang kenitew. Midhimu kiw zin he tumutuu su wey pinaag̵i te kebpekidsevaha tew ki Kristu mekeambit kiw te wazà pidtemanan he utew kegkelavew zin.

Hudas 1:24

Utew zekelà is kebpeselemati tew te Megbevayà. Iyan metau he edtavang kenitew su wey kenè kiw mekesuwey ziyà te kandin. Iyan metau he id-etuvang kiw keuzemà kandin diyà te vulawan he ed-ulian he wazà igkesewayi kenitew he utew zekelà dutun is kelipey tew.

Impezayag 1:7

Ebpekeuma si Jesu Kristu he ziyà egkeahà te menge g̵apun. Egkeahà sikandin te tivuuk he menusiyà ragkes is menge etew he mibpilak kandin dengan. Ne is langun he kelasi te menusiyà dini te kelibutan, ebpekesineg̵ew zan tenged kandin su egkehandek dan te silut. Metuman heini is langun.

Impezayag 1:9

Iyan a si Juan is sevaha he suled niw tenged te kedtuu ku ki Jesus. Iring keniyu nekeantus a zaan te menge kemeresayan su sakup a zaan te g̵inhedian din. Tenged te ingkepauk te gubirnu is kebpenudtul ku te Lalag te Megbevayà wey is kebpenurù ku te impesavut ni Jesus, impesivey a ne ziyà a ibpeubpà te sengepupulu he egngezanan te Patmus.