1 Pedro 2:21 - Manobo Western Bukidnon

²¹ Nekeantus si Kristu te merasey wey ki melibri te silut. Ne nehimu sikandin he petug-iringan he kinahanglan he edsunuzen ta. Umba mibpetuu kenitew is Megbevayà su wey tew si Kristu meiringi.

1 Pedro 2:21 Кръстосани препратки

Mateo 10:38

Minsan hentei he kenà edsundan kedì ne kenè din edtiangen is krus din, he ke và dà egkeg̵iya, kenè din edtumanen is menge sug̵ù ku su kela ke iyan ibpatey zin, kenà dait sikandin he egngezanan he sumusundan ku.

Mateo 11:29

Beeli niw is idsug̵ù ku keniyu ne pepenurù kew kedì ne ebpekehimeley kew su kenà a eengeren ne kenà a ebpenlupig te minsan hentei.

Mateo 16:24

Ne zutun migkag̵i si Jesus diyà te menge sumusundan din te, “Ke zuen egkesuat he edsundan kedì, kinahanglan he iawè din diyà te isip din is kandin he egkesuatan he menge ulaula, ne tianga zin is krus din, he ke và dà egkeg̵iya, kinahanglan he edtumanen din is menge sug̵ù ku minsan ke iyan ibpatey zin. Ne human ebpekesunud kedì.

Lucas 24:26

Su kinahanglan he ebpekeag̵i pa te kemeresayan sikan is hadì he mibpilì te Megbevayà ne human ibeg̵ey kandin is kebayàbayà te minsan hengkey.”

Juan 13:15

Umba mid-ulaula ku heini kayi te keniyu su wey niw meiringi. Kinahanglan he mebpevayàbayà is kada sevaha keniyu te zuma zin.

Juan 16:33

Umba migkag̵i ku keniyu heini is langun su wey mebmelinawen layun is gehinawa niw tenged kediey. Dini te kelibutan ebpesipelahan kew te menge etew he kuntada ku, iyan, kenè kew mahandek su nezaag ku en sikan is egalen te menge kuntada ku!”

Nengeulaula 14:22

Ne impesavut dan te menge tumutuu zutun is ibmezesen te kedtuu zan. Migkag̵i zan kandan he kinahanglan he kenè dan engkezi is kedtuu zan ki Jesus. Ke sikandan te, “Sikita is tumutuu, wey ki zà egkehedii te Megbevayà ke egkeantus ta is mezakel he kemereg̵enan.”

Nengeulaula 9:16

Ne ibpesavut ku kandin he mezakel is menge kemereg̵enan he egkeeg̵iyan din tenged te sulug̵uen ku sikandin.”

Ruma 8:29

Su zengan te puunè pa te minsan hengkey, netuenan te Megbevayà ke hentei is egkehimu he menge anak din ne migkag̵i zin he edhimuwen din sikandan he iring te Anak din he si Jesus. Ne zutun, egkehimu si Jesus he kakey tew te utew mezakel he menge hazi zin.

1 Kurintu 11:1

Ne tenged dutun, menge suled, iringi niw is ed-ul-ulahan ku, iring te ed-iringan ku zaan is mid-ulaula zengan ni Kristu.

Ipisu 5:2

Kinahanglan he ipeehè niw layun he mahal ziyà te g̵ehinawa niw is menge zuma niw iring te mahal kiw ziyà te g̵ehinawa ni Kristu. Mibpehimatey sikandin he elili kenitew wey kiw zin melibri. Nehimu heini he pemuhat he utew mehemut, he ke và dà egkeg̵iya, utew egkesuati te Megbevayà.

Pilipus 2:5

Kinahanglan he iring is isip niw te isip ni Jesu Kristu.

1 Tiselunika 3:3

su wey kenà meliveg is minsan hentei keniyu tenged te kebpesipelahi keniyu te menge etew. Netuenan niw en he sikitew is tumutuu, imbanglis kenitew te Megbevayà is kemeresayan.

1 Tiselunika 4:2

Netuenan niw is insug̵ù dey keniyu he ebpuun te Nengazen tew he si Jesus.

2 Timoteo 3:12

Ne is langun he tumutuu ki Jesu Kristu he egkesuatan dan he pinaag̵i kandin metuman dan is egkesuatan te Megbevayà, edresayen sikandan te menge kuntada te Megbevayà.

Hibriyuhanen 2:10

Is Megbevayà he nenlimbag te langun su wey mehimu is langun he igkezelig̵i kandin, ne utew hustu is kedtug̵uta zin he mekeantus si Jesus te merasey su pinaag̵i kayi impeehè din he wazà igkesawey ziyà te ki Jesus, ne egkehimu he mezakel kiw is edhimuwen din he menge anak te Megbevayà su wey kiw metulus iring te kedtulusa kandin. Nehimu si Jesus he ibayà wey kiw melibri te silut.

1 Pedro 1:20

Te wazè pa limbag̵a is kelibutan, daan en si Kristu he intezù te Megbevayà wey mehimu he Menluluwas tew. Ne kayi te timpu g̵untaan, impezayag sikandin wey kiw mevelukasi.

1 Pedro 2:24

Iyan si Kristu midsilutan tenged te menge salè tew zutun te kedrensanga kandin diyà te krus. Umba iyan sikandin midsilutan su wey tew meengkezi is menge mezaat he ulaula ne wey tew iyan meulaula is metazeng. Is menge palì din dutun, ne iyan nekevawì kenitew.

1 Pedro 3:18

Kesevaha zà is kebpehimatey ni Kristu wey mepesaylu is menge salè tew. Mibpehimatey su wey mehimu sikandin is metazeng he elili tew te kenà memetazeng wey kiw mehimu he menge g̵aked te Megbevayà. Nepatey is lawa zin, iyan, nevanhew sikandin

1 Pedro 3:9

Ke zuen ebpesipala keniyu kenè niw velesi te mezaat. Ke zuen edrawak keniyu kenè niw zaan penrewaki, kekenà, belesi niw te meupiya. Su umba midhimu kew te Megbevayà he menge tumutuu su wey kew zin metuvazi te meupiya.

1 Pedro 4:1

Ne netuenan ta he si Kristu, hein dini pa te kelibutan, nekeantus sikandin te merasey. Tenged dutun kinahanglan he andam kew zaan te ked-antus te merasey su is etew he ebpekeantus te merasey, egkeawè en diyà te kandin is suat din te ked-ulaula te mezaat.

1 Pedro 4:13

Kenè kew meinuinu, kekenà, lipey kew utew su pinaag̵i kayi ebpekeambit kew te menge kemeresayan he naantus ni Kristu ne tenged dutun utew kew zaan egkelipey keuzemà ke ibpezayag din kenitew haazà is bulawan he ed-ulian.

1 Juan 3:16

Umba netuenan tew en he utew zekelà is kebmahala kenitew te Megbevayà diyà te g̵ehinawa zin su mibpehimatey si Jesu Kristu he elili kenitew. Ne sikitew zaan, kinahanglan he edtevangan tew is menge zuma tew he tumutuu minsan ke ibpatey ta haazà is kedtavang.

Impezayag 12:11

Heini is menge suled tew, nezaag dan en si Setanas tenged te kedtig̵is te lengesa te migeraran he impemuhat he nati he kerehidu, wey tenged te insangyew zan is tutuu he tuluuwen, wey tenged daan te wazè dan iyan menug̵uni is untung dan, kekenà, mibpehimatey zan tenged te kedtuu zan.