1 Pedro 2:17 - Manobo Western Bukidnon

¹⁷ Edtehuzen tew is langun he menge etew; ebmahalen tew is langun he menge suled tew te kedtuu. Igkehandek ta is ked-ulaula te kenà egkesuatan te Megbevayà; edtehuzen ta is keg̵ehem te lavew he hadì.

1 Pedro 2:17 Кръстосани препратки

Mateo 22:21

Ne ke sikandan te, “Dagwey wey ngazan te hadì diyà te Ruma.” Ne migkag̵i si Jesus te, “Ne emun kandin, ne iyan egkesuatan din, iveg̵ey niw ziya te kandin, ne iveg̵ey niw zaan diyà te Megbevayà is kandin he azen,” ke sikandin.

Juan 13:35

Emun ed-ul-ulahan niw heini, egkeahà te langun he menge etew he menge sumusundan ku sikiyu.”

Ruma 12:10

Sikitew is midsusuled pinaag̵i ki Kristu, ibpeehè tew he mahal zini te g̵ehinawa tew is kada sevaha kenitew, ne ibmeupiya te g̵ehinawa tew is kedtahud tew te menge zuma tew.

Ruma 13:7

Ne tenged kayi kinahanglan he ebeyazan ta is buhis wey is duma pa he ebpeveyazan kenita te gubirnu. Ne edtehuzen ta zaan is menge etew te gubirnu, ne ibpeehè ta is dekelà he kedtehuza ta te pid-etawan dan.

2 Kurintu 7:1

Ne g̵eina te iyan heini impenaad kenita te Megbevayà, ne edlumpiyuwen ta is menge ulaula ta su wey wazà minsan hengkey he meremerik he ulaula te lawa ta wey meremerik he isip ta. Ne ebpurungan ta is ulaula ta su wey meheg̵eti is kebmetazeng ta pinaag̵i te layun ta kedtehuza kandin.

Ipisu 5:21

Mebpetetehuzè kew te kada sevaha tenged te kedtahud niw ki Kristu.

Pilipus 2:3

Kinahanglan he kenà kew mebpekidlawan ne kenè kew mebpelavew, kekenà, isipa te minsan hentei keniyu he minus is pid-etawan din kenà te zuma zin.

1 Timoteo 6:1

Is menge sulug̵uen he tumutuu, kinahanglan he isipa zan is menge egalen dan he zait he edtehuzen dan te minsan keenu he timpu. Su pinaag̵i kayi wazà ebpekezezaat te zengeg te Megbevayà wey wazà ebpekesudì te kebpenurù dey.

Hibriyuhanen 13:1

Kinahanglan he peniguduwi niw is kebmahala niw ziyà te g̵ehinawa niw te menge zuma niw he tumutuu.

1 Pedro 1:22

Ne g̵eina te nemeketuu kew en te tutuu he tuluuwen nengelumpiyuwan kew en te mezaat he ulaula ne kenà tarù is kebmahala niw te menge zuma niw he tumutuu. Minsan pa zutun, heg̵eta niw pa is kebmahala niw ziyan te g̵ehinawa niw te kada sevaha te menge zuma niw.

1 Pedro 2:13

Kinahanglan he edtumanen niw is midtukud he velaud diyan te inged niw su iyan heini egkesuatan te Nengazen. Ebpesakup ki te lavew he hadì su iyan sikandin ebayàbayà te langun.

1 Pedro 5:5

Sikiyu menge menguhed, edhengyuan ku sikiyu he pevayàbayè kew te menge ebmeg̵urangen. Kinahanglan he kenè kew mepelevawen, kekenà, mebpetebtevangè kew su zuen insurat he Lalag te Megbevayà he edhenduen te, “Kuntada te Megbevayà is mepelevawen, iyan, igkehizu zin is kenà ebpelavew.”