1 Pedro 2:12 - Manobo Western Bukidnon

¹² Kinahanglan he utew metazeng is menge ulaula niw su wey maahà te menge etew he kenà tumutuu. Su minsan ke egkeg̵iyen dan he mezaat is ulaula niw, egketuenan dan gihapun he meupiya is ed-ul-ulahan niw ne ebpekezalig dan te Megbevayà keuzemà te andew te kebulusi zin te menusiyà.

1 Pedro 2:12 Кръстосани препратки

Mateo 10:25

Umba, siak is egalen niw wey ebpenurù keniyu, kinahanglan he egkeiringan a keniyu. Su siak is egalen niw, emun egngezanan a te menge etew ki Endedaman, wey pe be kenà tuwas pa he mezaat is igngazan dan keniyu te menge sakup ku?

Mateo 5:11

Su utew kew zeyzey emun tenged te sumusundan ku sikiyu edsulaan kew wey ebpesipelahan kew te menge etew, ne ebpenudtul zan te tarù he mezaat is menge vaal niw.

Mateo 5:16

Ne iring din ded daan is menge ulaula niw he meupiya; kinahanglan he kenè niw ieles. Ipeehè niw te menge etew is menge ulaula niw he meupiya ne tenged kayi ebpekezalig dan te Amey tew he Megbevayà he ziyà te langit.

Mateo 9:8

Hein naahà heini te menge etew zutun, nengehandek dan ne midalig dan is Megbevayà tenged te mibeg̵ayan din is menusiyà te keg̵ehem he iring kayi.

Lucas 1:68

“Edelig̵en tew is Nengazen he Megbevayà tew te menge kevuwazan ni Israyil su sikitew is ed-azap kandin, mibulusan kiw zin ne midlibri kiw zin te menge kuntada tew.

Lucas 19:44

Ne edèdeetan dan is menge valey niw wey kutè niw ne langun niw te menge etew, ne egkeg̵erà ne wazà edresik keniyu. Ne is menge vatu he imbevaley keniyan, wazà minsan sevaha he ebpekeuntud diyà te sevaha su egkewag̵ey is langun. Ne egkeulaula heini su wazè niw seg̵ipaa he iyan heini sikan is timpu te kegkehizu keniyu te Megbevayà.”

Lucas 6:22

Utew kew zeyzey emun egkuntedahan kew te menge etew ne kenè kew zan edewaten he zuma zan, ne ebpeel-elezan kew zan, ne egkeg̵iyen kew zan he memezaat is ulaula niw tenged te midsundan kew kedì te Kakey te Menusiyà. Iyan heini kes mid-ulaula zengan te menge kepuun dan diyà te menge ebpeneuven te Megbevayà. Medlipey kew utew emun egkehitavù heini ziyan te keniyu su utew zekelà is suhul keniyu te Megbevayà he ebpeebuten niw ziyà te langit.

Juan 13:31

Ne hein migenat en si Hudas, migkag̵i si Jesus te, “Meg̵aan en egkeahà ke sengemenu is kezekelà te g̵ehem ku te Kakey te Menusiyà, ne pinaag̵i kedì egkeahà daan ke sengemenu is kezekelà te g̵ehem te Amey ku he Megbevayà.

Nengeulaula 15:14

Is Megbevayà, migug̵ud en keniyu ni Simon Pedro is mid-ulaula zin hein aney zin en ipetuu is kenà menge Hudiyu su wey zuen menge etew zaan dutun he edsundan kandin.

Nengeulaula 24:13

Ne wazè dan daan igkepaahà he tutuu is insumbunga zan kedì.

Nengeulaula 25:7

Ne hein nekeuma si Pablo midlingutan sikandin te menge Hudiyu he ebpemuun diyà te Hiruselim ne utew mezaat he ulaula is insumbunga zan kandin, iyan, wazè dan igkepaahà he tutuu is sumbung dan mehitenged kandin.

Nengeulaula 28:22

Egkesuatan dey te ebpemineg is menge penurù nu wey zey mesusi su netuenan dey he is menge tumutuu kayi te tuluuwen he ibpenurù nu, egkuntedahan te menge etew ziyà te minsan hendei.”

Ruma 12:17

Ke zuen ebpesipala keniyu kenè kew mebales. Peniguduwi niw te ed-ulaula is menge ulaula he kenà egkesewayan te minsan hentei.

Ruma 13:13

Ed-ul-ulahan tew is hustu su iyan heini ulaula he zait te menge etew he neteyawan te Megbevayà. Kenè ki en edtampu te ketig̵uman te ebpemelelangut ne kenè ta egkevuten is kenè ta esawa. Kenè ki ebpekid-eg̵et wey kenè ki egkesina.

Ruma 14:18

Ne ke pinaag̵i kayi edsundanan ta si Kristu, igkesuat ki utew te Megbevayà, ne egkesuatan daan te menge etew is menge ulaula ta.

Ruma 15:9

Ne elin daan ketezengan ke maan is neulaula heini su wey sikiyu is kenà menge Hudiyu, mehizuwi kew zaan te Megbevayà ne tenged kayi ebpekezalig kew zaan kandin. Su zuen insurat he lalag ni Kristu ziyà te Megbevayà he edhenduen te, “Siak wey is menge etew he kenà menge Hudiyu, utew zekelà is kebpeselemati zey kenikew ne egkentahan ku is kedalig kenikew.”

2 Kurintu 1:12

Duen, menge suled, idantal zey ne netuenan dey he tutuu heini, ne iyan is: layun meupiya is ulaula zey ziyà te minsan hentei he etew, lavew en diyan te keniyu. Su layun key edtuman te egkesuatan te Megbevayà ne utew hustu is tuyù dey. Wazè dey g̵emita is ketau zey te etew zà duen, kekenà, iyan igkehimuwa zey te langun is mekeg̵eg̵ehem he tavang te Megbevayà.

2 Kurintu 13:7

Id-ampù dey ziyà te Megbevayà he wazà ulaula niw he mezaat. Ne kenè dey iyan id-empua keniyu su wey metueni te menge etew he edtumanen niw is impenurù dey keniyu su maambe ke kenè niw ed-isipen he epustul key ni Kristu, asal, ed-ul-ulahan niw is hustu.

2 Kurintu 8:21

Su egkesuatan dey he hustu is ebeelan dey sumalà is ked-isipa kenami te Megbevayà ne kenà duen dà taman, kekenà, maahà daan te menge etew he metazeng is menge vaal zey.

Ipisu 2:3

Ne sikitew zaan, elin kiw zengan ebpen-ulaula te mezaat sumalà is mezaat he kebayà te lawa tew, wey is mezaat he isip tew. Ne tenged kayi neragkes kiw pa zutun te silut iring te zuma he menusiyà he kenà sakup te Megbevayà.

Ipisu 4:22

Tenged kayi engkezi niw is menge isip te zaan he kegkeetew niw su nesakup heini te zaan he menge mezaat he ulaula niw. Ebpekezezaat keniyu heini pinaag̵i te ebpemekelimbung he kebayè din.

Pilipus 1:27

Menge suled, ke minsan hengkey is egkehitavù kediey, utew kinahanglan he is menge ulaula niw, ne kenà ebpekesuwey te impenurù ni Kristu pinaag̵i te Meupiya he Tudtulanen. Su emun kenè kew edsuwey kayi, minsan ke kenà a ebpekelikù diyan, egketudtulan a he nesevaha is gehinawa niw wey tuyù niw te kedhag̵ù su wey metuuwi te mezakel he menge etew is Meupiya he Tudtulanen.

Pilipus 4:8

Ketepusan heini, menge suled, he menge lalag ku keniyu. Iyan niw itag̵ù diyà te isip niw is meupiya, is dait he igkezelig̵i, is tutuu he tuluuwen, is metazeng wey hustu wey mekempet he ulaula, wey is minsan hengkey he igkehimu te minsan hentei he egketahud.

1 Tiselunika 4:12

Ne emun ebeelan niw heini edtehuzen kew te menge etew he kenè pa tumutuu, ne zutun kenè en daan kinahanglan he ebpekevuyù kew te igkeuyag niw ziyà te minsan hentei.

1 Timoteo 2:2

Iampù dan daan is menge hadì wey is minsan hentei he zuen din keg̵ehem su wey mebmelinew is ked-ubpè tew wey wazà samuk te kebpurungi tew kedtumana te egkesuatan te Megbevayà wey te hustu he ulaula.

1 Timoteo 4:12

Minsan pa te menguhed ke pa, kinahanglan he mezait ka he edtehuzen te minsan hentei; kinahanglan he iyan ka ed-iringan te menge tumutuu ki Kristu, ne tenged kayi kinahanglan he tegteg̵ami nu is kegkag̵ikag̵i nu, is ulaula nu, is kebmahala nu te langun, is kedsarig nu te Megbevayà, wey is kedlikayi nu te meremerik he ulaula.

1 Timoteo 5:10

Ne kinahanglan daan he nevantug sikandin tenged te menge vaal zin he meupiya iring te ked-elimahi te menge vatà, ked-elimahi te menge meg̵eliyug; nekelùlù sikandin te paa te menge tumutuu, midtavang sikandin te nengeseeng wey mibeelan din is minsan hengkey he menge meupiya.

Hibriyuhanen 13:18

Menge suled, iampù key layun keniyu. Netuenan dey he wazà igkesawey te menge ulaula zey su iyan dà egkesuatan dey he meveeli zey is layun meupiya.

Hibriyuhanen 13:5

Bantey kew su kela ke utew subra is suat niw te selapì. Kinahanglan he imeupiye en te g̵ehinawa niw is naazen niw, su migkag̵i is Megbevayà te, “Kenè ku sikiyu ed-ewaan ne kenè ku sikiyu ed-engkezan.”

Santiago 3:13

Is minsan hentei keniyu he metau wey zekelà is selevutan, ipeehè din pinaag̵i te meupiya he ulaula zin. Kinahanglan he kenà sikandin mepelevawen dutun te kebpaahaa zin te ketau zin pinaag̵i te menge meupiya he ed-ul-ulahan din.

1 Pedro 2:15

Umba edhengyuen ku heini su egkesuatan te Megbevayà he is menge mepedeligen he wazà mekesavut te hustu, meehè dan is menge metazeng he ulaula tew. Ne pinaag̵i kayi ebpekeengked dan is edsudì kenitew.

1 Pedro 3:16

Mebmetinehuzen kew is edtavak wey menayù is kegkag̵i niw. Kinahanglan he wazà salà he netag̵ù diyà te g̵ehinawa niw te menge sumusundan ni Kristu su emun wazà ulaula niw he mezaat egkeeled is edsudì keniyu tenged te egkeg̵iyen dan.

1 Pedro 4:11

Sikita is edwali, kinahanglan he is kedwali ta, ne utew hustu he iring te iyan en edwali is Megbevayà. Sikita is edtavang, ne kinahanglan he kenè ta edlipatan he is idtavang ta, ne ziyà ebpuun te Megbevayà su wey pinaag̵i te g̵ehem ni Jesu Kristu iyan mevantug is Megbevayà te minsan keenu su iyan dait he edelig̵en wey zait he ebayàbayà te wazà pidtemanan.

2 Pedro 3:11

Ne g̵eina te zuen andew keuzemà he zutun egkehanew is langun te iring kayi, kinahanglan he ebpurungan tew is kedsunud tew te Megbevayà para wazà igkesewayi kenitew.