1 Pedro 1:8 - Manobo Western Bukidnon

⁸ Utew mahal sikandin diyan te g̵ehinawa niw minsan wazè niw pa maahà. Ne edsarig kew kandin minsan pa te kenè niw en sikandin egkeahà guntaan. Ne utew man dekelà is kelipey niw he kenà igkeseysey

1 Pedro 1:8 Кръстосани препратки

Mateo 10:37

Ke zuen etew he iyan mahal ziyà te g̵ehinawa zin is amey zin wey iney zin kenà siak, kenà dait sikandin he egngezanan he sumusundan ku. Ne ke iyan mahal ziyà te g̵ehinawa zin is anak din kenà siak, kenà daan sikandin dait he egngezanan he sumusundan ku.

Juan 14:15

Emun mahal a ziyà te g̵ehinawa niw, edtumanen niw is menge sug̵ù ku keniyu,

Juan 14:21

Is etew he edewaten din is menge sug̵ù ku ne edtumanen din, iyan sikandin etew he utew a mahal ziyà te gehinawa zin. Ne mahal zaan sikandin dini te g̵ehinawa zey te Amey ku, ne edhimuwen ku he metueni zin he iyan a zuma zin.”

Juan 14:24

Ke zuen etew he kenà a mahal ziyà te g̵ehinawa zin, kenè din edtumanen is menge sugù ku. Heini is menge lalag ku, kenà dini zà te isip ku ebpuun, kekenà, diyà ebpuun te Amey ku he iyan midsug̵ù kediey.

Juan 16:22

Iring din ded daan, egkeseeng kew g̵untaan, iyan, dutun te kebpeked-uman tew kebpeked-aahà, utew kew zutun egkelipey, ne wazà minsan hentei he egkeawè din is kelipey niw.

Juan 20:29

Ne migkag̵i kandin si Jesus te, “Midtuu ke ve tenged dà te naahà a kenikew? Utew zeyzey sikandan is minsan wazà kedì mekeahà, iyan, edtuuwan e zan.”

Juan 8:42

Ne migkag̵i kandan si Jesus te, “Angin pezem ke amey niw is Megbevayà su mahal a g̵eina ziyan te g̵ehinawa niw su te kedhendini ku, diyà a ebpuun te kandin. Kenà kediey zà he suat is kedhendini ku, kekenà, midsug̵ù e zin.

Nengeulaula 16:34

Impepemenahik din si Pablo wey si Silas diyà te valey zin ne impekaan din. Ne sikandin wey haazà is pemilya zin, utew zan nengelipey su neketuu zan en te Megbevayà.

Ruma 14:17

Su is kedhedii kenita te Megbevayà, ne kenà pinaag̵i te kedtumana ta te menge sug̵ù mehitenged te menge keenen wey inumen he idawey, kekenà, pinaag̵i te kebpeketezenga kenita te Megbevayà he metazeng wey pinaag̵i te melinawen he kebpekidepitè ta te menge zuma ta, wey pinaag̵i zaan te kelipey he ibeg̵ey te Wag̵as he Mulin-ulin.

Ruma 15:13

Is Megbevayà he iyan puunà te langun he meupiya he ebpeebuten tew, berakat he veg̵ayi kew zin te utew zekelà he kelipey wey melinawen he kebpekesavuk tenged te kedtuu niw kandin su wey pinaag̵i te g̵ehem te Wag̵as he Mulin-ulin meheg̵et is kebpeebuta niw te langun he meupiya he egkezawat niw keuzemà.

1 Kurintu 16:22

Ke zuen minsan hentei he wazà diyà te g̵ehinawa zin si Jesus, ne verakat he siluti sikandin te Megbevayà. “Maran ata,” he ke và dà egkeg̵iya, meg̵aan ka, Jesus, medlikù.

2 Kurintu 1:22

ne mibeg̵ayan kiw zin te g̵ehem he tuus he menge g̵aked kiw zin, ne midhimu zin he ulini kiw te Wag̵as he Mulin-ulin he iyan tuus he edtumanen din is minsan hengkey he penaad din kenitew.

2 Kurintu 12:4

Ne zutun te kebpenumbaley zin diyà te langit duen nezineg din he kenà egkekag̵i pinaag̵i te kelibutanen he lalag ne kenà daan idtug̵ut he egkeg̵iyen te etew zà duen.

2 Kurintu 4:18

Su iyan netag̵ù mepurung dini te g̵ehinawa zey, kenà is menge vutang he egkeehè ta zini te kelibutan, kekenà, iyan is menge vutang he kenè te pa egkeahà he ziyà te langit. Su is menge vutang he egkeehè ta zini te kelibutan, ne meg̵aan dà egkehanew, iyan, sikan is kenè pa egkeahà he ibeg̵ey te Megbevayà, ne kenà mulà egkehanew te wazà pidtemanan.

2 Kurintu 5:7

Su ibpeikul ta is ibayè ta zini te kelibutan pinaag̵i te kedsarig dà te Megbevayà su kenè te pa egkeahà is edungguan ta ziyà te langit.

2 Kurintu 9:15

Ne tenged kayi ebpeselematan ta is Megbevayà tenged te kebeg̵aya zin kenita te Anak din he wazà minsan hengkey he ebpekerepeng te kemahal zin.

Gelasya 5:22

Egketuusan ta zaan is menge ulaula he egkehimu pinaag̵i te g̵ehem te Wag̵as he Mulin-ulin. Su emun ed-uwiten ki te Wag̵as he Mulin-ulin, mahal zini te g̵ehinawa ta is menge zuma ta, layun ki egkelipey, melinawen layun is gehinawa ta, mepelevayen ki, belig̵eg̵awen ki, metulanged ki, metinumanen ki,

Gelasya 5:6

Su emun tumutuu ki en ki Jesu Kristu, neked-iiring kiw en diyà te Megbevayà is nengesirkunsidar wey is wazà mesirkunsidar. Iyan dà duen din pulus diyà te Megbevayà is kedtuu ta kandin he egketuusan heini pinaag̵i te g̵ag̵ew ta te zuma ta.

Ipisu 3:19

Berakat he mesavut niw is gag̵ew zin keniyu, minsan pa te kenà heini egkepurung egkesavut te minsan hentei. Egkesuatan ku heini su wey metuman diyan te keniyu is wazè din kurang he kegkeulini keniyu te Megbevayà.

Ipisu 6:24

Berakat he ikeg̵ag̵ew te Megbevayà is minsan hentei he kenà egkeawà diyà te g̵ehinawa zin is kebmahala zin te Nengazen tew he si Jesu Kristu.

Pilipus 1:25

Ne tenged te iyan heini netag̵ù dini te g̵ehinawa ku, netuenan ku he kenè pa egketapus is untung ku kayi te kelibutan ne ebpekiduma e pa keniyu wey ku mepurungi te edheg̵et is kelipey niw tenged te kedtuu niw.

Pilipus 3:3

Iyan kiw kes tutuu he menge sakup te Megbevayà, ne kenà iyan sikandan, su pinaag̵i te Wag̵as he Mulin-ulin ed-azap kiw te Megbevayà ne edlipey kiw tenged te upakat tew ki Jesu Kristu. Ne kenè tew iyan edserig̵an is kelibutanen he ulaula iring te kebpesirkunsidar.

Pilipus 4:4

Egkeg̵iyan ku sikiyu he sigudu kew lipey tenged te kebpekidsevaha niw te Nengazen, su meupiya ke zekelà layun is kelipey niw.

Hibriyuhanen 11:1

Emun duen kedtuu ta te Megbevayà, egketuenan ta he egkezawat ta is meupiya he ebperetengen ta. Pinaag̵i te kedtuu ta, egketag̵ù dini te g̵ehinawa ta is kedewata ta keuzemà te menge vutang he wazè te pa maahà.

Hibriyuhanen 11:27

Ne tenged te kedtuu zin mid-awà sikandin dutun te Ihiptu su wazè din ikehandek is kepauk te hadì te Ihiptu. Ne minsan pa te utew mereg̵en is egkengeseg̵azan din wazà sikandin medlikù su henduen be te egkeehè din he eduma kandin is Megbevayà he kenà egkeahà.

1 Pedro 1:6

Ne tenged dutun ebpekelipey kew en minsan pa te egkeseeng kew zè pa g̵untaan tenged te mezakel he menge kemeresayan he egkeantus niw.

1 Pedro 2:7

Ne heini is hadì he iring te vatu, mahal utew sikandin dini te kenita te nekesarig en kandin, iyan, is langun he kenà edtuu, netuman pinaag̵i kandan is insurat he tagnà he edhenduen te, “Sikan is batu he himan te valey, mid-engkezan te menge pandey. Ne heini, nehimu en guntaan he vatu he iyan dà ebpekepurung te valey.”

1 Pedro 5:4

Ne emun edlikù si Jesus, sikan is lavew he ed-elima te menge kerehidu te Megbevayà, duen idsuhul zin keniyu he iyan is kebpekeambit niw te utew zin kegkelavew he kenà egkehanew.