1 Pedro 1:3 - Manobo Western Bukidnon

³ Utew zekelà is kebpeselemati tew te Megbevayà he iyan Amey te Nengazen tew he si Jesu Kristu. Su tenged te zekelà is hizu zin kenitew, mibeg̵ayan kiw zin te veg̵u en he untung. Ne g̵untaan ebpekeperateng kiw he egkevanhew kiw keuzemà su mibanhew zin si Jesu Kristu.

1 Pedro 1:3 Кръстосани препратки

Juan 1:13

Is paag̵i te kegkehimu zan he anak te Megbevayà, kenà iyan kes paag̵i te kegkevuwad dini te kelibutan su wazè dan dutun ianak pinaag̵i te kegkevuwad te kelibutanen he amey, kekenà, iyan amey zan is Megbevayà.

Ruma 12:12

Kinahanglan he layun kiw edlipey su zuen utew meupiya he egkezawat tew keuzemà. Ed-entusen tew is menge kemereg̵enan ne layun kiw ed-ampù diyà te Megbevayà.

Ruma 15:13

Is Megbevayà he iyan puunà te langun he meupiya he ebpeebuten tew, berakat he veg̵ayi kew zin te utew zekelà he kelipey wey melinawen he kebpekesavuk tenged te kedtuu niw kandin su wey pinaag̵i te g̵ehem te Wag̵as he Mulin-ulin meheg̵et is kebpeebuta niw te langun he meupiya he egkezawat niw keuzemà.

Ruma 4:25

Iyan si Jesus kes midsug̵ù te Megbevayà wey mebpehimatey te silut tenged te menge kedsupak tew. Ne zutun mibanhew sikandin te Megbevayà wey mehimu he metazeng is ked-isipa kenitew te Megbevayà he iring te wazè kiw keenu mekeulaula te mezaat.

Ruma 5:10

Su zutun te timpu zengan he kemulu ki kuntada te Megbevayà, tenged te kebpehimatey te Anak din, nehimu ki he emig̵u zin. Ne emun iyan haazà, guntaan te emig̵u ki zin en, wey ki pe be kenà mehimu he melibri keuzemà te silut tenged te nevanhew en sikandin.

Ruma 8:11

Is Megbevayà, ne iyan mibanhew ki Jesu Kristu. Ne emun dini ed-ubpà te kenita is Wag̵as he Mulin-ulin he midsug̵ù din, ne ebenhawen ki zin daan pinaag̵i te Mulin-ulin he zini ed-ubpà te kenita.

Ruma 8:24

Daan en he nelibri ki te silut, iyan, edteg̵azan te pa is kedtumana te Megbevayà kayi. Ne emun egkag̵i ki he zuen edteg̵azan ta, ibpesavut ta he wazè pa meulaula heini is edteg̵azan. Su wazà etew he edteg̵azan din is daan he nehitavù.

1 Kurintu 13:13

Na, duen tetelu he ebpeveelan kenita he kenà egkeawà. Kinahanglan he edtuuwan ta is Megbevayà, kinahanglan daan he layun ta ebperetenga is kegketuman te impenaad kenita te Megbevayà, ne kinahanglan daan he ebmahalen ta is menge zuma ta. Ne is lavew he meupiya kayi te tetelu, ne iyan is kebmahala ta te menge zuma ta.

1 Kurintu 15:20

Iyan, tutuu is egkeg̵iyen ku he nevanhew iyan si Kristu. Ne tenged kayi egketuenan tew he tutuu iyan he egkengevanhew zaan keuzemà is menge minatey su nehuna man mevanhew si Kristu.

2 Kurintu 1:3

Edelig̵en tew is Megbevayà he iyan Amey te Nengazen tew he si Jesu Kristu; iyan sikandin hihizuwen he Amey tew wey puunà te minsan hengkey he tavang kenitew.

Gelasya 6:16

Is minsan hentei he ed-ikul kayi te ibayà he impenurù ku pinaag̵i kayi te surat, berakat he mehizuwi te Megbevayà wey veg̵ayi te melinawen he kebpekesavuk, ne kenà iyan dà sikandin, kekenà, elin daan is langun he menge tutuu he tumutuu te Megbevayà.

Ipisu 1:17

Is Megbevayà te Nengazen tew he si Jesu Kristu he iyan daan Amey tew he zait he ebentug̵en, edhengyuan ku layun sikandin he pinaag̵i te Wag̵as he Mulin-ulin, ne iveg̵ey zin keniyu is ketau wey ipeg̵awag̵awa zin keniyu is kegketueni niw te menge ulaula zin.

Ipisu 1:3

Dekelà utew is kebpeselemati tew te Megbevayà he Amey te Nengazen tew he si Jesu Kristu su tenged te kebpekidsevaha tew ki Kristu, intuvad din kenitew ziyà te langit is minsan hengkey he meupiya pinaag̵i te ked-ulini kenitew te Wag̵as he Mulin-ulin.

Ipisu 1:7

Su tenged te utew zekelà is gag̵ew zin kenitew, midlibri kiw zin te silut pinaag̵i te kedtig̵is te lengesa zutun te kebpehimatey ni Kristu, ne mibpesaylu zin is menge salè tew.

Ipisu 2:4

Ne minsan pa te iyan en haazà, utew zekelà is hizu te Megbevayà kenitew ne utew kiw mahal ziyà te g̵ehinawa zin.

Ipisu 3:20

Edelig̵en tew is Megbevayà su, pinaag̵i te zekelà he g̵ehem din he impelumun din dini te kenitew, utew zekelà is egkehimu zin su lavew pa is egkehimu zin, kenà te minsan hengkey he egkeisip ta he ebuyuen.

Kulusas 1:23

Iyan, kinahanglan he kenè niw engkezi is kedtuu te tutuu he tuluuwen, kekenà, lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen. Heini is nekag̵i he Meupiya he Tudtulanen, ne insangyew ziyà te menge etew ziyà te minsan hendei. Siak si Pablo, midsug̵ù a wey ku ikesangyew is Meupiya he Tudtulanen.

Kulusas 1:27

su egkesuatan din he sikitew is menge g̵aked din, ne egkesayud kiw ke hengkey is utew lavew he meupiya he edhimuwen din diyà te langun he menge etew. Ibpesayud din en kenitew he edlumunan kiw ni Kristu ne tenged kayi egketuenan tew he edtulusen kiw keuzemà.

1 Tiselunika 1:3

Su emun ed-ampù key te Megbevayà he Amey tew kenè dey egkelipatan is kedtuu niw, wey is kebmahala niw, wey is kebperateng niw te Nengazen tew he si Jesu Kristu. Su egketuusan is kedtuu niw kandin pinaag̵i te ulaula niw, ne pinaag̵i te kedhag̵ù niw egketuusan daan is kebmahala niw kandin diyà te g̵ehinawa niw. Ne egketuusan daan is kebperateng niw kandin pinaag̵i te kebmeinentusen niw.

1 Tiselunika 4:13

Menge suled, egkesuatan dey he metueni niw is egkeulaula te menge tumutuu he minatey en su wey kew kenà meseeng iring te kegkeseeng te zuma he menge etew he kenè dan egkeperateng he egkevanhew sikandan.

2 Tiselunika 2:16

Berakat he lipaya kew wey lig-eni kew te Nengazen tew he si Jesu Kristu wey te Amey tew he Megbevayà su wey meupiya is langun he menge vaal niw wey is langun he menge lalag niw. Mahal kiw layun diyà te g̵ehinawa zin ne pinaag̵i te g̵ag̵ew zin kenitew zuen tew igkelipey he wazè din pidtemanan wey zuen tew zaan utew meupiya he ebperetengen.

1 Timoteo 1:14

Ne kenà dutun dà taman su utew ad ingkeg̵ag̵ew te Megbevayà ne g̵untaan neketuu ad ki Jesu Kristu ne utew en sikandin mahal zini te g̵ehinawa ku.

Tito 2:13

Su zuen edteg̵azan ta he andew he zutun ibpeg̵awag̵awa is lavew he Megbevayà he iyan Menluluwas tew he si Jesu Kristu he utew zekelà is gehem din. Iyan sikandin ebperetengen ta.

Hibriyuhanen 3:6

Ne si Jesus mulà, Anak sikandin te Megbevayà he metinumanen is kebayàbayè din te valey. Ne iyan kiw valey zin emun edhemenan tew is kedsundan tew kandin wey is melipayen he kedteg̵azi tew te langun he impenaad kenitew ni Kristu.

Santiago 1:18

Tenged te iyan egkesuatan din midhimu kiw zin he menge anak din pinaag̵i te kebpesevuta zin kenitew te tutuu he tuluuwen. Egkesuatan din he iyan kiw edhimuwen din he lavew te langun he menge linimbag.

1 Pedro 1:13

Ne g̵eina te iyan haazà, kinahanglan he ed-andam ki wey ki mekepurung mekeisip-isip su wey ta layun mepurungi is kedsunud ta te Nengazen. Kinahanglan he iyan dekelà diyà te g̵ehinawa ta is kebperateng ta te utew meupiya he ibeg̵ey te Megbevayà kenita keuzemà dutun te andew te kebpeg̵awag̵awa ni Jesu Kristu.

1 Pedro 1:21

Pinaag̵i kandin neketuu kiw te Megbevayà. Mibanhew sikandin te Megbevayà ne midhimu zin sikandin he utew lavew. Ne tenged kayi iyan edserig̵an tew g̵untaan is Megbevayà ne ebpekeperateng kiw he edhimuwen kiw zin daan he utew lavew.

1 Pedro 1:23

Su mid-umanan ki limbag̵a te Megbevayà ne veg̵u ki en maan he etew pinaag̵i te wazà pidtemanan he Lalag te Megbevayà he iyan ebpekeveg̵ey te untung.

1 Pedro 2:2

Ed-iring ki zuen te vatà he kemulu pa edsusu he layun egkesuat te g̵atas. Kinahanglan he layun ki ed-inum te g̵atas he iyan is wag̵as he Lalag te Megbevayà su wey layun mebmezesen is kedtuu ta taman te timpu keuzemà he edtulusen ki te Megbevayà.

1 Pedro 3:15

Layun niw isipa he iyan egalen niw si Kristu. Layun niw endama is tavak ke zuen ed-insà keniyu ke maan is ebpekesarig kew te Megbevayà.

1 Pedro 3:21

Ne iyan teg̵ialung kayi te wahig is kebewtismu he ebpekelibri kenitew te silut. Ne haazà is kebewtismu, ne kenà iyan is kedlumpiyuwi te lawa tew ziyà te wahig, kekenà, iyan is kedhengyui tew te Megbevayà he maawè din is menge salè tew. Egkehimu heini tenged te mibanhew zin si Jesu Kristu.

1 Pedro 3:5

Is menge vahi zengan he midsarig te Megbevayà, iyan heini kandan he inmekempet. Mibpesakup sikandan te menge esawa zan

1 Juan 2:29

Netuenan te en he metazeng si Kristu. Netuenan ta zaan he minsan hentei he metazeng is menge ulaula zin, nehimu en sikandin he anak te Megbevayà.

1 Juan 3:3

Is minsan hentei he ebperateng te kedlikù ni Kristu, layun din ebpurungi is menge ulaula zin su wey wazà mezaat iring te wazà daan mezaat he ulaula ni Kristu.

1 Juan 3:9

Is minsan hentei he nehimu en he anak te Megbevayà, kenè en sikandin egkesuat he ed-ulaula te mezaat su midsempù en man te Megbevayà. Geina te iyan Amey zin is Megbevayà kenà egkehimu he layun sikandin ed-ulaula te mezaat.

1 Juan 4:7

Minahal ku he menge suled, kinahanglan he ebpurung kiw egig̵ineg̵awè su ziyà ebpuun te Megbevayà is gag̵ew. Is minsan hentei he zekelà is gag̵ew zin te menge zuma zin, ne iyan nehimu en he anak te Megbevayà wey emig̵u te Megbevayà.

1 Juan 5:1

Anak en te Megbevayà is minsan hentei he edtuu he iyan si Jesus mibpilì te Megbevayà he ibpahadì. Ne emun ebmahalen din diyà te g̵ehinawa zin is Amey tew he Megbevayà ebmahalen din daan is menge zuma zin he anak te Megbevayà.

1 Juan 5:18

Netuenan tew he wazà minsan hentei he nehimu he anak te Megbevayà he layun ed-ulaula te mezaat su edlig-enan sikandin te Anak te Megbevayà ne kenè en sikandin egkehilevetan ni Setanas.

1 Juan 5:4

su sikitew is langun he nehimu en he menge anak te Megbevayà, egkezaag tew en si Setanas he iyan ebayàbayà dini te kelibutan; ne iyan ibpekezaag tew kandin is kedtuu tew ki Jesus.