1 Kurintu 9:16 - Manobo Western Bukidnon

¹⁶ Ne kenà egkehimu he idantal ku is kedsengyawa ku te Meupiya he Tudtulanen su intelaan kedì te Nengazen heini, ne kenà egkehimu he kenè ku edtumanen. Meveg̵at is silut din kedì ke kenè ku idsangyew is Meupiya he Tudtulanen.

1 Kurintu 9:16 Кръстосани препратки

Mateo 25:16

Ne sikan is sulug̵uen he mibeg̵ayan te lelima he libu he pisus, impetig̵ayun din haazà is kandin, ne netig̵ayun te lelima pa he libu.

Lucas 9:62

Ne midtavak si Jesus te, “Emun ed-eradu ka he layun ka edlilingey ne kenà heeyan meupiya. Iring din ded daan is etew he edsundan kedì wey zuen din igkelilingey ne kenà sikandin dait he edhedian te Megbevayà.”

Nengeulaula 4:20

Kenà egehimu he kenè dey idsangyew is nezineg dey wey is neehè dey,” ke si Pedro.

Nengeulaula 9:15

Ne migkeg̵iyan si Eneniyas te Nengazen te, “Beyai nu su nepilì ku sikandin wey zin ikesangyew is ngazan ku ziyà te menge etew he kenà Hudiyu wey minsan diyà te menge hadì wey ziyà daan te menge zuma nu he kevuwazan ni Israyil.

Nengeulaula 9:6

Enew ka ne laus ka ziyà te inged ne zuen dutun etew he ebpenurù kenikew te ebpeveelan ku kenikew.”

Ruma 1:14

Su iring te zekelà is utang ku te tivuuk he menusiyà ne iyan kebeyazi ku kayi te utang is: ebpenudtulen ku kandan is keag̵i ni Kristu. Kinahanglan he edweliyan ku is nemeketunghà wey is wazà memeketunghà. Kinahanglan he edweliyan ku is menge metau wey is menge paglung.

Ruma 15:17

Ne tenged te kedtevangi kediey ni Jesu Kristu kenà a egkeeled te kebpenudtul kayi te langun he nehimu ku te sulug̵uen te Megbevayà.

Ruma 4:2

Netuenan ta he kenà iyan ketezengan ke maan is mid-isip te Megbevayà sikandin he metazeng su wazè din mesupak is egkesuatan te Megbevayà. Su ke wazà supak din, tutuu iyan he zuen din igkezantal. Iyan, netuenan ta he nekesupak gihapun si Abraham ne tenged dutun wazè din iyan igkezantal ziyà te etuvangan te Megbevayà.

1 Kurintu 4:15

Su minsan pa te utew mezakel is menge etew he ed-ag̵ak keniyu te menge tumutuu ki Kristu, sebsevaha ku zà is iring te amey niw tenged te kedtuu niw. Su hein impesavut ku keniyu is Meupiya he Tudtulanen, nehimu a he amey niw zutun te kedtuu niw ki Jesu Kristu.

1 Kurintu 9:12

Su ke egkehimu ke zuen ebpeebuten he igkeuyag te menge zuma he ebpenurù diyan, iyan key pe be kenà mebpaabut daan te lavew pa he zekelà. Ne minsan pa te iyan heini ketezengan, wazè key mebuyù diyan te keniyu su kela ke zuen egkag̵i he ibpenapì dey zà is baal zey ziyan. Ed-entusen dey is minsan hengkey su kenè dey egkesuatan he mesanggen is kedsengyawa te Meupiya he Tudtulanen mehitenged ki Kristu.

1 Kurintu 9:14

Ne iring din ded daan is intelaan dengan te Nengazen tew su migkag̵i zin he kinahanglan he edsuhulan is ebpenurù te Meupiya he Tudtulanen te menge ebpepenurù kandin.

2 Kurintu 2:12

Menge suled, hein midhendiyà a te inged he Truwas te kedsangyew te Meupiya he Tudtulanen, neehè ku he midhimu en te Nengazen is paag̵i wey ku ikepelaus is ebpeveelan din kedì.

Kulusas 4:17

Keg̵iya niw ki Erkipu he purungi zin beeli is ebpeveelan kandin te Nengazen su sulug̵uen sikandin te Megbevayà.