1 Kurintu 8:4 - Manobo Western Bukidnon

⁴ Ne mehitenged te kegkaan te usa he impemuhat duen te menge tarù he ed-ezapen, netuenan tew he kenè man Megbevayà is iring dutun su sebsevaha zà is tutuu he Megbevayà.

1 Kurintu 8:4 Кръстосани препратки

Marcos 12:29

Ne midtavak si Jesus te, “Iyan heini is edhuna: ‘Pemineg kew, sikiyu is menge kevuwazan ni Israyil. Is Megbevayà tew he Nengazen te langun, sebsevaha zà sikandin he Megbevayà.

Nengeulaula 14:15

“Maan is ed-ezapen key keniyu, menge suled? Menge etew key zà daan; menusiyè key zaan iring keniyu! Midhendini key te inged niw wey zey ikepesavut keniyu is Meupiya he Tudtulanen wey niw meengkezi heini is menge ulaula niw he wazè din pulus ne wey niw zaan tuuwi is Megbevayà he wazè din kemetayen. Iyan sikandin nenlimbag te langit wey tanà wey zag̵at wey is minsan hengkey he tag̵ù kayi.

Nengeulaula 15:20

Iyan is: ebpesuratan tew sikandan ne egkeg̵iyen tew kandan he kenè dan megkaan te egkeenen he indawey su impemuhat diyà te menge kenà tutuu he megbevayà; ne kenè dan daan hileveti is kenè dan esawa, wey kenè dan daan megkaan te lengesa wey te edlepaan he kenà ebpekelelengesa. Iyan dà heini menge sug̵ù he imbilinbilin ni Moises he ibpetuman tew kandan.

Nengeulaula 19:26

Siguradu neehè niw wey nezineg niw en is ebeelan kayi te etew he egngezanan ki Pablo. Egkeg̵iyen din he is menge ziwata he ebeelan te etew, kenà hustu he ed-ezapen. Mezakel is menge etew he nemeketuu te egkeg̵iyen din ne kenà dini zà te inged tew he Ipisu, kekenà, te tivuuk he prubinsya tew he Asya.

1 Kurintu 8:1

Ne mehitenged te insè niw ke idtug̵ut be kenitew te menge tumutuu ke egkeenen tew is usa he impemuhat diyà te menge tarù he ed-ezapen, netuenan tew te langun he heini is menge tarù he ed-ezapen ne wazè dan gehem kenitew. Ne minsan ke netuenan ta he wazà gehem dan kenita, egkehimu he ebpegalbu ki tenged kayi te netuenan ta emun wazà heini metueni te menge zuma ta. Umba egkeg̵iyen ku heini su kenè ki ebpeketavang te menge zuma ta pinaag̵i zà te netuenan ta, kekenà, pinaag̵i te g̵ag̵ew ta kandan.

1 Kurintu 8:10

Su penenglitan, ke zuen duma ta he wazà sikandin mekesavut te hustu, ne sikita is nekesavut mulà, neehè ki zin is egkaan dutun te valey he zutun ed-ezapen is tarù he megbevayà, ne egkeuwit sikandin ne edtampu zaan sikandin he egkaan, iyan, egkepenulayan is isip din su kunaan din ke tutuu he ed-ezapen haazà is ed-ezapen dan dutun.

1 Kurintu 8:11

Ne tenged te nesavut ta he kenà tutuu he ed-ezapen haazà is mibpemuhatan, nezeetan heini is duma ta he midlibri te silut pinaag̵i te kebpatey ni Kristu.

Gelasya 4:8

Dengan te wazè niw pa tuuwi is tutuu he Megbevayà, neuripen kew te menge edtuuwan he kenà hustu he megbevayà.

Ipisu 4:6

Sevaha zà daan is Megbevayà he Amey te minsan hentei. Iyan sikandin ebayàbayà te minsan hentei he tumutuu, ne ziyà sikandin te minsan hentei he tumutuu, ne edterebahu pinaag̵i te minsan hentei he tumutuu.

1 Timoteo 1:17

Kes sebsevaha zà he Megbevayà, kenà egkeahà. Iyan sikandin hadì te minsan hengkey ne wazè din kemetayen; berakat he tehuza wey zelig̵a sikandin te wazè din pidtemanan.

1 Timoteo 2:5

Sebsevaha zà is Megbevayà, ne sebsevaha zà daan is datù diyà te teliwazà te Megbevayà wey menge etew, ne iyan datù tew is etew he si Jesu Kristu.

Hudas 1:25

Edelig̵en tew sikandin su iyan dà sikandin Megbevayà; iyan sikandin Menluluwas tew pinaag̵i te Nengazen tew he si Jesu Kristu. Iyan sikandin egkevantug; iyan sikandin hadì; iyan sikandin mekeg̵eg̵ehem; iyan sikandin ebayàbayà dengan te wazè pa limbag̵a is minsan hengkey, wey g̵untaan, wey keuzemà te wazà pidtemanan.