1 Kurintu 6:9 - Manobo Western Bukidnon

⁹ Siguradu netuenan niw he haazà is menge etew he ed-ulaula te mezaat, kenà sikandan keuzemà egkehedian te Megbevayà! Ne tenged kayi, purungi niw heini isipa su wey kenè kew mesayep su is menge etew he meremerik is ulaula zan, is ed-azap te kenà tutuu he megbevayà, is etew he egkevut te kenè din esawa, is maama he egkeerig̵an te maama wey is bahi he egkeerig̵an te vahi,

1 Kurintu 6:9 Кръстосани препратки

Mateo 19:29

Ne is minsan hentei he mid-ewaan din is baley zin, menge suled din, amey zin, iney zin, anak din, wey tanè din su edsunud sikandin kediey, egkezawat din is kenenggatus egketakep haazà is mid-ewaan din ne liyu zutun ibeg̵ey kandin is untung he wazà pidtemanan.

Mateo 25:34

Ne zutun, siak is hadì, ekeg̵iyan ku is menge etew ziyà te zapit te egkekewanan ku te, ‘Sikiyu is midtuvazan te Amey ku he Megbevayà, kayi kew su iyan kew edhedian ku. Su is kedhadì ku keniyu, integ̵ana en dengan puun pa te kedlimbag̵a te kelibutan.

Lucas 21:8

Ne midtavak si Jesus te, “Mebpekevantey kew wey kew kenà mekesundan te teruen he etew su mezakel is ebpemenlepew he egamit te ngazan ku he egkag̵i is kada sevaha zutun he iyan sikandin sikan is mibpilì te Megbevayà he ibpahadì. Ne egkag̵i zaan te, ‘Iyan en heini timpu te kedlimasa te Megbevayà te menusiyà,’ ke sikandan. Iyan, kenè niw tuuwi su tarù.

Nengeulaula 20:32

Ne g̵untaan idsarig ku sikiyu ziyà te Megbevayà he iyan ebpeketavang keniyu. Ebpeketavang daan is impenurù ku keniyu he g̵ag̵ew zin kenitew. Is Megbevayà, iyan ebpekeveg̵ey kenitew te kezesen te kedtuu. Diyà te kandin egkekuwa ta zaan is kenita he vahin te menge tuvad he ibeg̵ey zin diyà te langun he menge tumutuu zin.

Nengeulaula 24:25

Ne zutun te kebpenurua ni Pablo te metazeng he ulaula, wey kebpurungi te ed-ul-ulahan wey is kebpeebuta te andew te kedsilut, nahandek si Felix ne ke sikandin te, “Ereg ki en dè pa. Ibpetawag ku sikew ke zuen ku timpu.”

Ruma 1:18

Is Megbevayà diyà te langit, impeehè din en he utew zin igkepauk is langun he menge mezaat he ulaula te menge etew wey is kenè dan kedtahud kandin. Su pinaag̵i te kelelalung dan egkesanggen is kebpesevuta te tutuu he tuluuwen.

1 Kurintu 15:33

Iyan, kenè niw itug̵ut he meketuu kew te iring kayi su tarù. Tutuu iyan is erubasa he egkag̵i te, “Emun ebpekiduma ka te etew he mezaat is ulaula zin ne egkeiringan nu is ulaula zin wey ked-isip din.”

1 Kurintu 15:50

Iyan ibpesavut ku, menge suled, is: heini is menge lawa tew he zuen kemetayen, ne kenà egkehimu he egkeragkes keuzemà te langun he edhedian te Megbevayà su haazà is lawa he zuen din kemetayen, kenà egkehimu he ebeg̵ayan te untung he wazà pidtemanan.

1 Kurintu 3:16

Sikiyu is menge tumutuu te Megbevayà, utew a egkeinuinu keniyu su henduen be te wazè niw mesavut he iyan kew kes baley he ed-ubpaan te Megbevayà su ziyan te keniyu ed-ubpà is Wag̵as he Mulin-ulin he Megbevayà.

1 Kurintu 5:1

Duen nezineg ku, menge suled, he zuen sevaha keniyu he utew meremerik is ulaula zin. Duen kun maama ziyan he migkumpadi zin is esawa te amey zin. Ne minsan is menge etew he wazà medtuu te Megbevayà, wazà ulaula zan he utew mezaat he iring keniyan!

1 Kurintu 5:10

Ne kenè ku iyan egkeg̵iyen is menge etew he wazà medtuu te Megbevayà he meremerik is ulaula zan, wey menge leg̵ezen, wey menge tulisan, wey menge ed-azap te kenà tutuu he megbevayà, su emun iyan en haazà migkag̵i ku ne utew mereg̵en he edlikayan su wey kiw zà ebpekelikey te iring dutun ke ed-awè kiw kayi te kelibutan. Iyan egkeg̵iyen ku he edlikayan is etew he egkag̵i he tumutuu sikandin, iyan, mezaat is ulaula zin iring te meremerik is baal zin, wey ke leg̵ezen sikandin, ed-azap te kenà tutuu he megbevayà, ed-ulug̵an din te salà is duma he etew, lelenguten be, wey tulisan sikandin. Ne minsan is kegkaan dà duma kandin ne kenè kew medtampu.

1 Kurintu 6:10

is tekawen, is leg̵ezen, is lelenguten, is ebpen-ulug te salà diyà te zuma zin, wey is limbungan, wey is minsan hentei etawa he ed-ulaula te iring kayi, ne kenà sikandin egkehedian keuzemà te Megbevayà, kekenà, edsilutan sikandin.

1 Kurintu 6:18

Likayi niw is kegkevuta te kenè niw esawa su utew heeyan mezaat he salà. Is duma he menge salà ne mezaat daan, iyan, kenà pinaag̵i te lawa. Haazà is meremerik he ulaula, ne utew ebpekezezaat kenitew su pinaag̵i te lawa ta.

1 Kurintu 6:19

Siguradu netuenan niw he is lawa niw, ne iyan ed-ubpaan te Wag̵as he Mulin-ulin he imbeg̵ey keniyu te Megbevayà. Kenè ki en maan teg̵ig̵aked te lawa ta, kekenà,

1 Kurintu 9:24

Netuenan niw he ke zuen lumbaan ne mezakel is ebpekibanggà, iyan, sevaha zà is ebpekezaag ne iyan edsuhulan. Ne sikiyu is tumutuu ki Jesus, iringi niw is edlumbà su wey kew mesuhuli keuzemà te Megbevayà.

2 Kurintu 12:21

Egkesemukan a su kela ke zutun te kebpekeuma ku ziyan ne igkeeled ku sikiyu ziyà te Megbevayà ne kela ke utew a egkeseeng tenged te mezakel he netuenan ku zengan he nekevaal te mezaat ne wazè dan pa engkezi is menge mahawag he ulaula zan iring te kedhilavet te kenè dan esawa wey is kedtumana zan te mezaat he kebayè dan.

Gelasya 6:7

Kenè kew pelimbung te ulaula niw su kenè ta egkeelesan is Megbevayà te minsan hengkey he ulaula. Is ibpemula te etew, iyan daan egkerag̵un din. Ne iring din ded daan is menge ulaula te etew, su ed-ahaan heini te Megbevayà ne edsuhulan din is etew keuzemà sumalà is neulaula te uman sevaha.

Kulusas 3:5

Umba, menge suled, kenè niw en itug̵ut he tumana niw is mezaat he kebayè niw; kenè niw ul-ulaha is mahawag wey meremerik he ulaula ne kenè niw mehimuwa he zuen suat niw te kenè niw esawa; engkezi niw is mezaat he ulaula wey is keleleg̵ed su emun leg̵ezen ki te menge azen, henduen be te egkeilisan dini te g̵ehinawa ta is tutuu he Megbevayà te menge azen.

Hibriyuhanen 12:14

Himuwa niw is taman te egkehimu niw su wey melinew is kebpekidepitè niw te minsan hentei ne wey niw metuman is metazeng he ulaula su emun kenè ki metazeng kenè ta is Megbevayà egkeahà keuzemà.

Hibriyuhanen 12:16

Bantey kew su wey wazà minsan sevaha keniyu he meremerik is ulaula zin wey ke ed-iniyug̵an din be is Megbevayà su iring kayi si Esau zengan. Is ketenged din te kegkekakey he anak, inliwè din te keenen he sengepegkaan dà.

Hibriyuhanen 13:4

Kinahanglan he tehuza niw te langun is ked-es-esawa niw. Kinahanglan he wazà minsan hentei he edselselaan din is esawa zin. Edsilutan te Megbevayà is etew he meremerik is ulaula zin wey is etew he edselselaan din is esawa zin.

Santiago 1:16

Menge minahal ku he suled, kenè niw tuuwi is kenà tutuu. Kenà ebpenuley is Megbevayà.

1 Juan 3:7

Menge anak ku, kinahanglan he kenè niw pemineg̵a is minsan hentei he teruen he ebpenurù pezem keniyu. Iyan tutuu is: ke zuen etew he ed-ulaula te hustu ne iyan sikandin metazeng he etew iring te metazeng si Kristu.

Impezayag 21:8

Iyan, sikan is egkehandek he edsundan kedì wey is menge kenà metinumanen, is menge etew he memahawag is ulaula, is menge memumunù, wey is menge meremerik is betasan, is menge keteuwan he etew, wey menge ed-azap te kenà tutuu he Megbevayà wey is langun he teruen he menge etew, iyan egketemanan dan is id-agbur sikandan diyà te ranew he nepenù te egkeregreg he esupri he iyan ikezuwa he kemetayen,” ke sikandin.

Impezayag 22:15

Iyan, diyè dà te meziyù is mekeeled-eled is baal zin, wey is menge keteuwan, is memeremerik is ulaula, is menge memumunù, is ebpemenimba te menge ledawan wey is langun he menge etew he ebpenurù te tarù wey is etew he limbung is ulaula zin.