1 Kurintu 6:13 - Manobo Western Bukidnon

¹³ Ne ke zuen daan egkag̵i he umba mibeelan te Megbevayà is getek ta su wey mahantey te egkeenen, ne utew zaan benar heeyan, iyan, duen timpu keuzemà he wazè en pulus te g̵etek ta ne wazà daan dutun pulus te egkeenen su id-awà keuzemà te Megbevayà is kegemita kayi. Ne iring din ded daan is lawa ta, su kenà egkehimu he egemiten ta is lawa ta wey mahantey is suat ta zuen te etew he kenè ta esawa. Su wazà limbag̵a te Nengazen is lawa tew su wey tew meulaula is meremerik, kekenà, iyan inlimbag̵a zin su wey pinaag̵i kayi mezalig sikandin. Ne iring din ded daan pinaag̵i te Nengazen tew he si Jesus edtulusen keuzemà is lawa tew.

1 Kurintu 6:13 Кръстосани препратки

Mateo 15:17

Kenè niw ves egkeisip he is id-ahuk ta ziyà te vèbè ta, ne ebpehendiyà te g̵etek ta ne zutun egawas puun te lawa ta? Ne kenà iyan haazà igkeepes te Megbevayà.

Mateo 15:20

Iyan heini menge ulaula he igkeepes te Megbevayà, iyan, kenè din igkeepes is kegkaan ta he wazè ki mekepenlùlù te velad ta sumalà is betasan te menge Perisiyu.”

Marcos 7:19

su is egkeenen din, ne ziyè dà ebpekevayà te g̵etek din ne zutun ed-awà diyà te kandin; kenà diyà ebpekevayà te g̵ehinawa zin.” (Ne pinaag̵i kayi te menge lalag ni Jesus, egketuenan ta he is minsan hengkey he egkekaan, idtug̵ut kenitew he egkeenen tew.)

Juan 6:27

Kenè niw pen-ahaa is egkeenen he meg̵aan dà egkehanew, kekenà, hag̵ù kew wey niw mekuwa is egkeenen he ebpekeveg̵ey te untung he wazà pidtemanan. Siak is Kakey te Menusiyà, iyan heini egkeenen he igkeveg̵ey ku keniyu su impeehè en te Amey ku he Megbevayà he ingkesuat din is menge vaal ku.”

Juan 6:49

Is egkeenen he mana, migkaan te menge kepuun niw zengan, hein diyè dan pa te tanà he kenà ed-ubpaan, iyan, nemematey zan gihapun,

Ruma 12:1

Na, menge suled, tenged te utew zekelà he hizu kenitew te Megbevayà, edhengyuan ku sikiyu he ipeveyveyai niw kandin is lawa niw wey g̵ehinawa niw. Iyan heini ibpemuhat he kenà edhimetayan, ne kinahanglan he wazà igkesawey zuen su wey mesuati te Megbevayà. Ne iyan heini hustu he ked-ezapa niw kandin.

Ruma 14:17

Su is kedhedii kenita te Megbevayà, ne kenà pinaag̵i te kedtumana ta te menge sug̵ù mehitenged te menge keenen wey inumen he idawey, kekenà, pinaag̵i te kebpeketezenga kenita te Megbevayà he metazeng wey pinaag̵i te melinawen he kebpekidepitè ta te menge zuma ta, wey pinaag̵i zaan te kelipey he ibeg̵ey te Wag̵as he Mulin-ulin.

Ruma 6:12

Ne tenged kayi, menge suled, kenè te en idtug̵ut he iyan ebayàbayà te menge lawa ta he melemu ebpatey, is mezaat he kebayè dan. Su emun idtug̵ut ta heini, egkepezumdumahan ta is menge mezaat he suat te lawa ta.

Ruma 7:4

Ne iring din ded daan, menge suled, heini is nehitavù kenitew su zutun te kebpatey ni Kristu he elili kenitew, ne mibpatey ki zaan, ne tenged kayi kenè en egkehimu he ibpetuman kenita te minatey en is menge sug̵ù he imbilinbilin ni Moises. Ne umba nehimu heini su wey kiw mesakup ni Kristu he nevanhew en ne wey tew metuman is egkesuatan te Megbevayà.

1 Kurintu 3:16

Sikiyu is menge tumutuu te Megbevayà, utew a egkeinuinu keniyu su henduen be te wazè niw mesavut he iyan kew kes baley he ed-ubpaan te Megbevayà su ziyan te keniyu ed-ubpà is Wag̵as he Mulin-ulin he Megbevayà.

1 Kurintu 6:15

Netuenan niw ve he heini is menge lawa tew te menge tumutuu, ne parti te lawa ni Kristu. Ne tenged kayi kenà egkehimu he egemiten ta is parti te lawa ni Kristu te kedhuliza te vahi he meremerik is ulaula zin.

1 Kurintu 6:19

Siguradu netuenan niw he is lawa niw, ne iyan ed-ubpaan te Wag̵as he Mulin-ulin he imbeg̵ey keniyu te Megbevayà. Kenè ki en maan teg̵ig̵aked te lawa ta, kekenà,

2 Kurintu 11:2

Su insavuk te Megbevayà kayi te kediey is dekelà he suat he kenè kew medsuwey te Nengazen. Iring kew te rag̵a he nekeg̵unan, iyan, iyan si Kristu ingkag̵un ku keniyu. Ne egkesuatan ku he wazà duma he ebpekeesawa keniyu.

2 Kurintu 5:15

Minatey sikandin he elili te tivuuk he menusiyà su wey sikandan is menge etew he uuyag pa, kenè dan en maan med-ulaula te kandan he egkesuatan, kekenà, med-tuman dan en te egkesuatan ni Kristu he iyan midhimetayan wey nevanhew su wey melibri sikandan te silut.

Gelasya 5:24

Ne is minsan hentei he migaked en ni Jesu Kristu, ne iring te inransang din en te krus is mekesesalà he lawa zin, he ke và dà egkeg̵iya, mid-engkezan din en is menge mezaat he kebayè din wey egkesuatan din.

Ipisu 5:23

Su is maama, duen din keg̵ehem te kebayàbayà te esawa zin, iring te si Kristu, duen keg̵ehem din te kebayàbayà kenitew te langun he menge tumutuu he iyan lawa zin. Midlibri kiw zin te silut is lawa zin.