1 Kurintu 6:11 - Manobo Western Bukidnon

¹¹ Iring kayi is ulaula zengan te zuma keniyu, iyan, guntaan, nelumpiyuwan kew en te menge ulaula niw he mezaat ne nehimu kew en he menge g̵aked te Megbevaya. Ne pinaag̵i te g̵ehem te ngazan te Nengazen tew he si Jesu Kristu wey pinaag̵i te ked-ulini keniyu te Wag̵as he Mulin-ulin he ebpuun te Megbevayè tew, mid-isip kew en he metazang te Megbevayà.

1 Kurintu 6:11 Кръстосани препратки

Mateo 20:4

Ne migkeg̵iyan din haazà is menge etew te, ‘Terebahu kew ziyà te perasan ku ne edsuhulan ku sikiyu te hustu.’

Lucas 18:14

Ne ke si Jesus dutun te, “Benar is egkeg̵iyen ku he haazà is menunukut te vuhis, hein mid-ulì diyà te valey zin ne wazè en isipa te Megbevayà is salè din su nepesaylu en. Iyan, kenà iring dutun haazà is gelbuwen he Perisiyu su is etew he kunaan din ke utew lavew sikandin diyà te etuvangan te Megbevayà, ne ebminusen sikandin te Megbevayà, iyan, is etew he netuenan din he utew sikandin mekesesalà, ne ibpelavew sikandin te Megbevayà.”

Juan 13:10

Ne migkag̵i si Jesus te, “Sikan is nekepemezig̵ù en, iyan dà kinahanglan he edlùluan is menge paa zin su nelumpiyuwan en is lawa zin. Ne sikiyu zaan, nepurung kew en melumpiyuwi. Asal is sevaha keniyu wazà melumpiyuwi.”

Juan 13:8

Ne migkag̵i si Pedro te, “Kenà egkehimu he iyan ka ebpenlùlù te menge paa ku!” Ne midtavak si Jesus te, “Emun kenè ku sikew egkelùluan, kenè ku sikew sumusundan.”

Juan 5:4

su zuen timpu he zuen kun belinsug̵uen te Megbevayà he ebpenaug dutun te linew ne egurig̵awen din haazà is wahig. Ne zutun, is egkehuna he etew he ebpekeagbur zutun te wahig, egkeulian sikandin te minsan hengkey he zaru zin.

Nengeulaula 13:39

Kenè kiw egkelibri te menge salè tew pinaag̵i te kedtumana tew te kesug̵uan ni Moises, iyan, is minsan hentei he edtuu ki Jesus, egkelibri mulà sikandin.

Nengeulaula 22:16

Ne kenè ka medlanganlangan, kuwa ke en wey ka mebewtismuwi. Pengumew-umew ka te Nengazen wey ka mepesaylu te menge salè nu.’

Nengeulaula 26:18

Ne is ibpesavut nu kandan, egkehimu he iyan igkeawà te kegkelakap dan te kedtuu wey zan daan meewai is merusirem ne medhalin dan diyà te merayag. Ne pinaag̵i kayi egkepeleg̵uyan dan is kebeyveyai kandan ni Setanas ne ebpekepesakup dan te Megbevayà. Ne egkepesaylu is menge salè dan tenged te kedtuu zan kedì ne egkehimu zan daan he menge tumutuu he pinilì te Megbevayà.’

Ruma 3:24

Iyan, tenged dà te g̵ag̵ew kenitew te Megbevayà ed-isipen kiw zin gihapun he metazeng he henduen be te wazè kiw mekeulaula te mezaat su midlibri kiw ni Jesu Kristu.

Ruma 4:5

Ne kenà iring dutun is ked-isipa te Megbevayà kenita he metazeng su g̵ag̵ew zà kenita. Umba mid-isip ki te Megbevayà he metazeng, kenà tenged te midtuman ta is mibpeveelan din kenita, kekenà, tenged dà te midtuuwan ta sikandin is ebpekehimu he mebmetazeng is menge mesinupaken.

Ruma 5:1

Guntaan, tenged te midtuu ki en ki Jesus, mid-isip ki en te Megbevayà he metazeng he iring te wazè ki keenu mekesalà, ne tenged kayi pinaag̵i te mid-ulaula te Nengazen tew he si Jesu Kristu melinew en is kedepitè tew te Megbevayà.

Ruma 5:9

Ne emun pinaag̵i te kedtig̵is te lengesa ni Kristu mid-isip kiw en te Megbevayà he metazeng, wey kiw pe be kenà melibri tenged ki Kristu te silut keuzemà te Megbevayà.

Ruma 8:30

Ne zutun, sikitew is langun he mibpilì din wey mehimu he menge anak din, impetuu kiw zin daan. Ne kenà duen dà taman, su mid-isip kiw zin daan he metazeng he iring te wazè kiw mekesalà. Ne impenaad din daan he zuen timpu keuzemà he edtulusen kiw zin.

Ruma 8:33

Ne wazà ebpekesumbung kenita te mibpilì te Megbevayà su is Megbevayà, mid-isip ki zin en he metazeng.

1 Kurintu 1:30

Ne minsan pa zutun, midhimu te Megbevayà he mesevaha si Jesu Kristu wey sikitew ne midhimu zin daan he zuen ketau tew he ebpuun te ki Kristu. Ne pinaag̵i ki Kristu mid-isip kiw en he metazeng te Megbevayà ne nehimu kiw en daan he menge g̵aked te Megbevayà, ne nevelukasan kiw zin te kegkeuripen tew te mezaat he ulaula.

1 Kurintu 12:2

Netuenan niw he zengan te wazè kew pa meketuu ki Jesus ne zuen ebpengelintau keniyu he mekeazap kew te menge ledawan, ne pinaag̵i kayi te menge wazè dan gehinawa he ledawan ne layun egketazin dengan is menge isip niw.

Gelasya 2:16

Ne minsan pa zutun, netuenan ta he kenè ki egkeisip he metazeng te Megbevayà pinaag̵i te kedtumana ta te kesug̵uan he imbilinbilin ni Moises, kekenà, pinaag̵i zà te kedsarig ta ki Jesu Kristu. Sikita is Hudiyu, nekesarig ki zaan ki Jesu Kristu su wey pinaag̵i te kedtuu ki Jesu Kristu meisip ki zaan te Megbevayà he metazeng. Netuenan ta he kenà heini egkehimu pinaag̵i te kedtumana te kesug̵uan. Su wazà minsan hentei he ed-isipen he metazeng te Megbevayà tenged te kedtumana zin te kesug̵uan.

Gelasya 3:11

Ne emun iyan haazà, ne egkesavut ta he wazà minsan hentei he metazeng is ked-isipa kandin te Megbevayà pinaag̵i te kedtumana te kesug̵uan su zuen insurat he Lalag te Megbevayà he edhenduen te, “Is minsan hentei he metazeng is ked-isipa kandin te Megbevayà pinaag̵i te kedtuu zin te Lalag te Megbevayà, iyan sikandin ebeg̵ayan te untung he wazè din pidtemanan,” ke sikandin.

Gelasya 3:24

Nehimu zaan is kesug̵uan he iring te ed-uyamu he iyan ebayàbayà kenitew te iring te menge vatà taman dà te kebpekeuma ni Kristu su wey, ke ebpekeuma si Kristu, meisip kiw te Megbevayà he metazeng pinaag̵i te kedtuu tew kandin.

Gelasya 3:8

Daan he migkag̵i is Megbevayà diyà te insurat he lalag din he minsan is menge etew he kenà menge Hudiyu, ne ed-isipen din sikandan he metazeng emun edtuuwan dan sikandin. Impesavut din he zaan ki Abraham is Meupiya he Tudtulanen, ke sikandin te, “Tenged te midtuu ka te migkag̵i ku, midtuvazan ku sikew. Ne pinaag̵i zaan kayi te kedtuu nu edtuvazan ku is tivuuk he menusiyà dini te kelibutan.”

Ipisu 5:26

ne wey kiw mezawat te Megbevayà. Midhimu zin heini pinaag̵i te kedlumpiyuwi zin kenitew pinaag̵i te kebewtismu wey pinaag̵i te lalag din.

Ipisu 5:8

Su zengan utew merusirem is ibayè niw, iyan, guntaan neteyawan is ibayè niw su nehimu kew en he menge sakup te Nengazen. Ne tenged kayi, kinahanglan he zait is ulaula niw te ked-ikula niw te merayag he ibayà.

2 Tiselunika 2:13

Menge suled he minahal te Nengazen, kenà egkehimu he kenà dekelà layun is kebpeselemati zey te Megbevayà tenged keniyu. Su zengan hein midlimbag din is langun, mibpilì kew zin wey kew zin melibri te silut pinaag̵i te g̵ehem te Wag̵as he Mulin-ulin he iyan ingkehimu niw he menge g̵aked din, wey pinaag̵i te kedtuu niw te tutuu he tuluuwen.

Hibriyuhanen 10:22

Ne tenged kayi, ed-etuvang ki en te Megbevayà, ne kenà tarù is ked-ezapa ta kandin. Edheg̵eten ta is kedtuu ta ne kenè ki eduwazuwa. Su netuenan ta he nepelisan ki en te lengesa ni Jesus ne netuenan ta zaan he in-awà kayi is menge salè ta. Nengebewtismuwan kiw en he tuus te kedlumpiyuwi kenitew te Megbevayà.

Hibriyuhanen 10:29

Ne emun iyan haazà, wey pe be kenà utew meveg̵at is idsilut dutun te etew g̵untaan he edsumpeliten din is hizu kandin te Anak te Megbevayà. Utew meveg̵at is idsilut kandin su igkepesavut din pinaag̵i zutun te mid-ulaula zin he wazà pulus dutun te lengesa ni Jesus he ibpalis pezem kandin he iyan tuus te veg̵u en he paag̵i te kebpekidsevaha te Megbevayà te menusiyà. Meveg̵at is silut kandin su edsumpeliten din is belig̵eg̵awen he Wag̵as he Mulin-ulin.

Hibriyuhanen 2:11

Si Jesus, mibpalis din en is menge salè tew. Ne g̵untaan sikitew is nepelisan te salà wey sikandin is mibpalis te salà, sebsevaha zà is Amey tew he iyan is Megbevayà. Ne tenged kayi kenè kiw igkeeled ni Jesus, kekenà, egngezanan kiw zin te menge hazi zin.

1 Pedro 1:2

Nengaaram kew te Megbevayà he Amey tew sumalà is kebayè din dengan he iyan is: edhimuwen kew zin he metazeng pinaag̵i te Wag̵as he Mulin-ulin wey kew mehimu he menge sakup ni Jesu Kristu ne wey kew zaan mepesaylu tenged te kebpelisi keniyu te lengesa ni Jesus. Berakat he ikeg̵ag̵ew kew zin wey mebmelinawen kew utew.

1 Pedro 1:22

Ne g̵eina te nemeketuu kew en te tutuu he tuluuwen nengelumpiyuwan kew en te mezaat he ulaula ne kenà tarù is kebmahala niw te menge zuma niw he tumutuu. Minsan pa zutun, heg̵eta niw pa is kebmahala niw ziyan te g̵ehinawa niw te kada sevaha te menge zuma niw.

1 Pedro 3:21

Ne iyan teg̵ialung kayi te wahig is kebewtismu he ebpekelibri kenitew te silut. Ne haazà is kebewtismu, ne kenà iyan is kedlumpiyuwi te lawa tew ziyà te wahig, kekenà, iyan is kedhengyui tew te Megbevayà he maawè din is menge salè tew. Egkehimu heini tenged te mibanhew zin si Jesu Kristu.

1 Juan 2:12

Ebpesuratan ku sikiyu, menge anak ku, su nengepesaylu en is menge salè niw tenged ki Kristu.

Impezayag 7:14

Ne midtavak a te, “Iyan ka nesayud.” Ne ke sikandin te, “Heini is menge etew, ebpemekeuma sikandan he ebpuun dutun te zekelà he kemeresayan diyà te lumpad te kelibutan. Mibpemìpian dan is menge bisti zan diyà te lengesa te nati he kerehidu wey zan mehimu he meputì, he ke và dà egkeg̵iya, nepalis en is menge salè dan.