1 Kurintu 4:6 - Manobo Western Bukidnon

⁶ Menge suled, kayi te langun he migkag̵i ku, migamit ku he penenglitan si Epulus wey is kediey he keugelingen su wey mekepenurù heini keniyu ke hengkey is hustu he ed-ul-ulahan sumalà is ibpesavut te insurat he Lalag te Megbevayà. Iyan is: kinahanglan he engkezi niw is kebpelevawa te penurù te sevaha kenami su sikami is ebpenurù, wazà lavew kenami su nekedrepeng key.

1 Kurintu 4:6 Кръстосани препратки

Nengeulaula 18:24

Ne zutun, diyà te Ipisu zuen nekeuma he Hudiyu he tig-Elihendriya he egngezanan ki Epulus. Metau he edikursu ne metau zaan he edseysey te insurat he Lalag te Megbevayà.

Nengeulaula 19:1

Dutun te kemulu pa si Epulus diyà te Kurintu, diyà si Pablo mebayà te menge inged he zizaya te Ipisu ne midhendiyè en maan te Ipisu. Ne neuma zin dutun is menge sumusundan daan ni Jesus.

Ruma 12:3

Ne tenged te imbeg̵ey kedì te Megbevayà is keg̵ehem te kedsengyawa te lalag din, egkeg̵iyen ku keniyu te langun he kinahanglan he kenè niw isipa he lavew kew te menge zuma niw, kekenà, kinahanglan he hustu is ked-isipa niw te ketau niw sumalà is kedtuu he imbeg̵ey te Megbevayà diyà te kada sevaha keniyu.

1 Kurintu 1:12

Iyan ibpesavut ku is: selakew kun is edtindeg̵an te uman sevaha te sikiyu su egkag̵i kun is sevaha he iyan a si Pablo is edsundanan din. Ne egkag̵i is sevaha he si Epulus mulà is edsundanan din. Ne egkag̵i is sevaha he iyan kandin he edsundanan si Pedro. Ne egkag̵i is sevaha he si Kristu mulà is kandin.

1 Kurintu 1:19

Ne mehitenged kayi zuen insurat he Lalag te Megbevayà he edhenduen te, “Is ketau te menge uluwanen, edhimuwen ku he wazè din pulus, ne is kedsavut te nemeketunghà, ibpeehè ku he tarù,” ke sikandin.

1 Kurintu 1:31

Ne tenged kayi utew venar is insurat dengan he Lalag te Megbevayà he edhenduen te, “Ke zuen etew he egkesuat he edantal, ne kinahanglan he iyan dà izantal zin is nengehimu te Nengazen.”

1 Kurintu 13:4

Iyan, emun mahal ziyà te g̵ehinawa ta is menge zuma he etew iyan heini egkeulaula ta: ebpekeantus ki te minsan hengkey he pesipala, dekelà is g̵agew ta, wazà kesina he netag̵ù te g̵ehinawa ta, kenà ki ebpegalbu wey ebpelavew,

1 Kurintu 3:19

Su is ketau kayi te kelibutan, ne wazè din pulus diyà te Megbevayà su utew lavew is kandin he ketau. Su zuen insurat he Lalag te Megbevayà he edhenduen te, “Is ketau te metau he etew he igkelupig̵i zin te zuma, egkehimu he iyan ibpekesipè din te selaid te Megbevayà.”

1 Kurintu 3:21

Umba, kinahanglan he wazà medantal te minsan sevaha keniyu he egkag̵i te sakup sikandin te sengeetew. Su sikami is langun he ebpenurù, imbeg̵ey key te Megbevayà keniyu su wey kew mezeyzey.

1 Kurintu 5:2

Ne minsan pa zutun kemulu kew pa ebpegalbu. Kunaan niw vuwa ke utew meupiya is ulaula niw! Deyzey pezem ke egkeseeng kew. Kinahanglan pezem he wazè niw tug̵uti heeyan is maama he mebpekiduma keniyu.

1 Kurintu 5:6

Maan is ebpegalbu kew? Netuenan niw is erubasa he edhenduen te, “Minsan ke zuen deisek dà he tapey ne egketepayan din is sengebisin en he erina he ebeelan he supas.”

1 Kurintu 8:1

Ne mehitenged te insè niw ke idtug̵ut be kenitew te menge tumutuu ke egkeenen tew is usa he impemuhat diyà te menge tarù he ed-ezapen, netuenan tew te langun he heini is menge tarù he ed-ezapen ne wazè dan gehem kenitew. Ne minsan ke netuenan ta he wazà gehem dan kenita, egkehimu he ebpegalbu ki tenged kayi te netuenan ta emun wazà heini metueni te menge zuma ta. Umba egkeg̵iyen ku heini su kenè ki ebpeketavang te menge zuma ta pinaag̵i zà te netuenan ta, kekenà, pinaag̵i te g̵ag̵ew ta kandan.

1 Kurintu 9:23

Umba ebeelan ku heini su wey mesangyew is Meupiya he Tudtulanen ne wey a zaan mekeambit te menge tuvad he impenaad kenitew pinaag̵i te Meupiya he Tudtulanen.

2 Kurintu 10:12

Telawen key iyan te ked-iring te menge ulaula te menge zuma he etew ziyan he menge mepedelig̵en. Kunaan dan ke iyan sikandan metau egkag̵i ke hengkey is meupiya he ulaula. Utew zan tulebung! Su emun ed-iringan te menge etew is kandan he ulaula egkeg̵iyen dan he utew meupiya. Iyan, ke kenà sikandan ed-iringan te menge etew egkeg̵iyen dan he sayep haazà is kenà ed-iring.

2 Kurintu 10:15

Kenè dey idantal is menge vaal te zuma he etew ziyà te menge inged he zutun wazè key sug̵ua te Megbevayà. Iyan, geina te neragkes kew kayi te mibpeveelan kenami te Megbevayà, egkesuatan dey he emun ed-iseg en is kedtuu niw ne edtevangan key keniyu zutun te menge vaal zey ziyan te inged niw.

2 Kurintu 10:7

Purungi niw isipa is nesavut niw en su zuen menge zuma niw he kunaan dan ke iyan dan dà menge hustu he sulug̵uen ni Kristu. Kinahanglan he mesavut dan he sikami, hustu key zaan he menge sulug̵uen ni Kristu.

2 Kurintu 11:4

Umba egkeipeng a su ke zuen ebpekeuma ziyan he selakew is ibpesavut dan mehitenged ki Jesus, ne selakew is mulin-ulin he ibpenurù dan, ne kenè dan iyan ibpesavut is tutuu he tuluuwen he impesavut dey, kekenà, selakew is ibpenurù dan, ne ed-entusen niw mulà is kandan he kebpenurù ne kenà duen dà taman su utew niw egkesuati te ebpemineg.

2 Kurintu 12:19

Kunaan niw vuwa ke pinaag̵i kayi te egkeg̵iyen ku ibpesavut ku keniyu he wazè dey menge sayep, iyan, kenà iyan heeyan tuyù ku. Su ebpeketistig̵us is Megbevayà he heini is migkag̵i ku keniyu, ne iyan hustu he egkeg̵iyen tenged te kebpekidsevaha ku ki Kristu. Ne, minahal ku he menge suled, insurat ku heini is langun, su wey meheg̵et is kedtuu niw.

2 Kurintu 12:20

Egkesamuk is gehinawa ku su kela ke zutun te kebpekeuma ku ziyan ne iyan ku egkeahà diyan te keniyu is menge ulaula he kenè ku egkesuatan. Ne emun iyan haazà ne zuen ed-ul-ulahan ku zutun he kenè niw zaan egkesuatan su kinahanglan he edsewayen ku is keniyu he ulaula. Su kela ke zuen ebpekigkuntada ziyan te menge zuma zin, kela ke zuen egkesina, duen petuluy egkepauk, wey leg̵ezen, kela ke zuen diyan ebpenemperasà wey edsulà te zuma zin, kela ke zuen bereituk. Kela ke zuen diyan te keniyu gelbuwen, wey kela ke wazè niw kebpekid-uyun te menge tumutuu.

2 Kurintu 12:6

Ne penenglitan ke egkesuatan ku he edantal a, kenà egkehimu he egkeg̵iyen niw he wazà pulus te zantal ku su tutuu is idantal ku, iyan, kenà a edantal su kenè ku egkesuatan he isipa a te menge etew he utew lavew. Meupiya ke zutun dà ebpuun is ked-isipa zan kedì te menge ulaula ku he neehè dan wey menge penurù ku he nezineg dan.

2 Kurintu 4:15

Ne umba ed-entusen dey is langun he mereg̵en su wey kew iyan mezeyzey, su emun egketukid en is mezakel he etew te g̵ag̵ew te Megbevayà, ne zutun ed-iseg he ebmezakel is ebpekepeselamat te Megbevayà ne egkevantug is Megbevayà.

Kulusas 2:18

Duen daan menge etew he egkag̵i he lavew sikandan tenged te zuen kun menge egkein-inuwan he impaahà kandan wey tenged te kenè dan mepelevawen. Ne ibpenurù dan he kinahanglan he ebpekeazap ki te menge velinsug̵uen te Megbevayà ziyà te langit. Kenè niw, menge suled, itetenged is kedsudì dan keniyu su is iring dutun he etew, ne ebpezalig dà, iyan, wazà hustu he ketezengan te kebpezalig dan su iyan ebayàbayà te isip dan is kelibutanen he kebayè dan.

1 Tiselunika 1:5

su impesavut dey keniyu is Meupiya he Tudtulanen, kenà pinaag̵i te lalag dey zà, kekenà, pinaag̵i te g̵ehem te Wag̵as he Mulin-ulin. Midheg̵et te Megbevayà dutun is kedsevuta zey kayi. Ne netuenan niw zaan ke hengkey is menge ulaula zey he meupiya wey kew mezeyzey hein diyan key te keniyu.

2 Timoteo 2:10

Ne tenged kayi ed-entusen ku is minsan hengkey he merasey wey ku metevangi is menge etew he pinilì te Megbevayà. Egkesuatan ku he melibri sikandan te silut pinaag̵i te kebpekidsevaha zan ki Jesu Kristu ne mekezawat dan te ketulusan he wazà pidtemanan.