1 Kurintu 4:12 - Manobo Western Bukidnon

¹² Kinahanglan he edhag̵ù key su wey zey mekuwa is menge kinahanglan dey. Ne ke edrewakan key te menge etew kenè key edtavak, kekenà, id-ampù dey sikandan he tuvazi sikandan te Megbevayà. Ne emun ebpesipelahan key ne ed-entusen dey.

1 Kurintu 4:12 Кръстосани препратки

Mateo 5:11

Su utew kew zeyzey emun tenged te sumusundan ku sikiyu edsulaan kew wey ebpesipelahan kew te menge etew, ne ebpenudtul zan te tarù he mezaat is menge vaal niw.

Mateo 5:44

Ne iyan mulà kediey he penurù is: ebpurungan ta is menge kuntada ta wey ebpenubtuvazan ta te meupiya is ebpesipala kenita.

Lucas 23:34

Ne zutun te kemulu zan pa idransang si Jesus, ne mid-ampù sikandin diyà te Megbevayà, ke sikandin te, “Amey ku, peseyluwa nu sikandan su wazè dan metueni ke hengkey heini is ed-ul-ulahan dan.” Ne zutun, haazà is midransang kandin, midripa zan ke hentei is ebpekeangken te menge ugelingen ni Jesus.

Lucas 6:28

Penubtuvazi niw te meupiya is ebpenrawak keniyu. Iampù te Megbevayà is ebpesipala keniyu.

Juan 15:20

Tentenuzi niw is migkag̵i ku keniyu he is sulug̵uen, kenà lavew te egalen din. Su ke mibpesipelahan e zan is egalen niw, iyan kew pe be kenè dan pesipelahi. Ke edtumanen te menge etew is kedì he penurù, edtumanen dan daan is keniyu.

Nengeulaula 18:3

ne mid-amur sikandin kandan su neked-iring is terebahu zan he iyan is kebpemaal te idlelawig he terapal.

Nengeulaula 20:34

Netuenan niw he mibpenigudu a medterebahu wey ku mekuwa is menge kinahanglan dey te menge zuma ku.

Nengeulaula 7:60

Ne zutun nekeluhud ne mid-uman megkag̵i te, “He Nengazen, kenè nu isipa he idsilut kandan heini is salè dan.” Ne te nekag̵i zin haazà, naawà is gehinawa zin.

Ruma 12:14

Is ebpesipala kenita, id-ampù ta ziyà te Megbevayà he tuvazi zin. Ne kenè ta iyan id-ampù he siluti zin.

Ruma 12:20

Iyan ed-ul-ulahan ta is sambag te insurat he Lalag te Megbevayà he edhenduen te, “Emun egkevitil is kuntada nu, ipekaan nu. Emun egkemezahan, ipeinum. Su emun iyan heini ed-ul-ulahan nu, utew sikandin egkeeled tenged te pesipala zin kenikew.”

Ruma 8:35

Ne emun iyan haazà ne wazà minsan hengkey he ebpekepesuwey kenita ziyà te ki Kristu. Minsan ke egkerasey ki te kemereg̵enan wey samuk wey pesipala; minsan ke egkereg̵enan ki te vitil ne wazè ta ugelingen; minsan ke egkekeizan ki ne edhimetayan ki; ne kenà egkeawà is kebmahal ta ziyà te g̵ehinawa ni Kristu.

1 Kurintu 9:6

Ne egkehimu ve he iyan key zà ki Bernabe wazè din ketenged te kebuyù te igkeuyag dey ziyà te ebpekezawat te menge penurù dey?

2 Kurintu 11:8

Dutun te kebpenurua ku keniyu ne iyan midsuhul kedì is menge tumutuu ziyà te zuma pa he menge inged. Henduen be te midtekawan ku sikandan wey ku sikiyu iyan metevangi.

Ipisu 4:28

Is tekawen, engkezi zin is kebpenakew ne medterebahu su wey hustu he paag̵i is kegkuwaa zin te igkeuyag din ne wey metevangi zin is egkengeayuayu.

1 Tiselunika 2:9

Menge suled, kenè niw vuwa egkelipatan is kedhag̵ù dey ziyan te kebaal. Su hein impesavut dey keniyu is Meupiya he Tudtulanen he ebpuun te Megbevayà, mibpenigudu key zaan medhag̵ù te maandew se mezukilem wey key mekekuwa te keuyag̵an dey wey key kenà mekesamuk keniyu.

2 Tiselunika 3:8

Wazè key mekevuyù te egkeenen dey ziyà te minsan hentei, kekenà, mibeyazan dey. Maandew wey mezukilem midhag̵ù key mebaal su wey kew kenà medlised tenged kenami.

1 Timoteo 4:10

Tenged kayi ebpenigudu ki edhag̵ù wey metuuwi heini te langun he menge etew su nekesarig ki en te wazè din kemetayen he Megbevayà ne iyan sikandin Menluluwas te langun he menge etew, lavew en is menge tumutuu kandin.

1 Pedro 2:23

Hein edsumpeliten sikandin duen te kedrensanga kandin wazà sikandin medtavak te mezaat; wazà sikandin mebpenrawak. Is kebelesi zutun te edrasey kandin, insarig din diyà te Megbevayà he iyan kes metazeng is kedhukum din.

1 Pedro 3:14

Iyan, minsan ke ebpekeantus kew te kebpesipala tenged te metazeng is ed-ul-ulahan niw, medlipey kew. Kenè kew mahandek te etew zà duen ne kenè kew meseeng.

1 Pedro 3:9

Ke zuen ebpesipala keniyu kenè niw velesi te mezaat. Ke zuen edrawak keniyu kenè niw zaan penrewaki, kekenà, belesi niw te meupiya. Su umba midhimu kew te Megbevayà he menge tumutuu su wey kew zin metuvazi te meupiya.

1 Pedro 4:19

Ne tenged dutun, menge suled, ke ebpekeantus kew en te merasey su iyan intuvad keniyu te Megbevayà, isarig niw is gehinawa niw ziyà te kandin he iyan metinumanen he nenlimbag wey hemeni niw is memeupiya he ulaula.

Hudas 1:9

Ne minsan si Miguel, sikan is lavew he velinsug̵uen te Megbevayà, kenà sikandin ed-ulaula te iring dutun su hein minatey zengan si Moises, mibpelewanà si Miguel wey si Setanas ke hentei is ebpekeangken te lawa ni Moises. Ne wazà mekeg̵ehem si Miguel he edsulà ki Setanas. Iyan dà lalag din kandin is: “Iyan edsawey kenikew is Megbevayà.”