1 Kurintu 3:5 - Manobo Western Bukidnon

⁵ Isipa niw man heini. Siak si Pablo, hentei a? Ne hentei zaan si Epulus? Sulug̵uen key zà te Megbevayà. Pinaag̵i kenami midhimu zin he meketuu kew. Edtumanen dey zà is ebpeveelan din kenami. Ne iyan dà ed-ul-ulahan dey.

1 Kurintu 3:5 Кръстосани препратки

Mateo 25:15

Mibahin din kandan sumalà is egkeveleveg te uman sevaha kandan te ebpetig̵ayun. Is sevaha, mibeg̵ayan din te lelima he libu he pisus; ne is sevaha, mibeg̵ayan din te zezuwa he libu; ne is sevaha pa, nengkelibu he pisus is imbeg̵ey zin dutun. Ne zutun migenat haazà is etew he edhipanew.

Lucas 1:2

Insurat dan is neg̵ug̵ud kenami te menge etew he iyan nekeahà kayi te menge vaal wey iyan midsangyew te Lalag te Megbevayà.

Juan 3:27

Ne midtavak si Juan te, “Wazà gehem te minsan hentei ke wazà iveg̵ey kandin te Megbevayà.

Nengeulaula 18:24

Ne zutun, diyà te Ipisu zuen nekeuma he Hudiyu he tig-Elihendriya he egngezanan ki Epulus. Metau he edikursu ne metau zaan he edseysey te insurat he Lalag te Megbevayà.

Nengeulaula 19:1

Dutun te kemulu pa si Epulus diyà te Kurintu, diyà si Pablo mebayà te menge inged he zizaya te Ipisu ne midhendiyè en maan te Ipisu. Ne neuma zin dutun is menge sumusundan daan ni Jesus.

Ruma 15:16

wey a mehimu he sug̵ù ni Jesu Kristu ziyan te keniyu te menge etew he kenà menge Hudiyu. Henduen te memumuhat a su ke pinaag̵i kedì ebpeketuu is menge etew; egkehimu zan he iring te pemuhat ku he pinaag̵i te kedlumpiyuwi kandan te Wag̵as he Mulin-ulin edewaten te Megbevayà.

1 Kurintu 12:28

Ne is tivuuk he menge tumutuu, mibeg̵ayan te Megbevayà is kada sevaha te kenà ebpeked-iiring-iring he ebpeveelan din. Iyan aney he vaal zin is: mibpilì din is menge etew he midhimu zin he menge epustul. Ikezuwa, imbeg̵ey zin diyà te zuma is ketau te kedseysey te impesavut te Megbevayà. Iketelu, ne mibeg̵ayan din is duma he menge etew te ketau te kebpenurù te lalag din, ne mibeg̵ayan din is duma te g̵ehem te kebpekehimu te egkein-inuwan. Ne is duma pa ne mibeg̵ayan din te g̵ehem te kebewii te menge egkengezeruwan. Ne mibeg̵ayan din daan is duma te ketau te kedtevangi zan te menge zuma zan. Ne is duma pa, ne mibeg̵ayan din te ketau te ked-uwita zan te menge tumutuu. Ne is duma pa, mibeg̵ayan din te ketau te kegkag̵i te kineg̵iyan he kenè dan egkesavut.

1 Kurintu 16:12

Ne si Epulus he suled tew zaan tenged te kedtuu, kepipira ku en sikandin keg̵iyi he meupiya ke ebisitahan kew zin duma zuen te menge suled tew he mibisita ziyan. Iyan, egkag̵i sikandin te wazè pa meseled te g̵ehinawa zin is kedhendiyan din. Iyan, edhendiyan sikandin ke wazà ebpekesamuk kandin.

1 Kurintu 3:10

Ne siak, henduen a te pandey te Megbevayà su imbeg̵ey zin kediey is gehem su wey mehimu he iyan a edsavuk diyan te keniyu te vatu he edtukuzan te valey ne selakew en is ebevaley zuen, he ke và dà egkeg̵iya, selakew en is ebpenurù keniyu g̵untaan. Ne kinahanglan he is kada sevaha he ebevaley ne purungi zin is baal zin.

1 Kurintu 3:22

Sikami si Pablo wey si Epulus wey si Pedro zaan, iyan key nehimu te Megbevayà he menge sulug̵uen niw su wey kew mezeyzey. Ne minsan is tivuuk he kelibutan wey is egkeulaula keuzemà, wey is egkeulaula g̵untaan wey minsan is untung niw wey kebpatey niw, imbeg̵ey zaan heini is langun te Megbevayà wey kew mezeyzey.

1 Kurintu 3:7

Ne tenged kayi, haazà is ebpemula wey haazà is ebinyag, kenà iyan sikandan edelig̵en, kekenà, iyan edelig̵en is Megbevayà su ibpetuvù din haazà is impemula.

1 Kurintu 9:17

Emun kediey zà he isip is kedsengyawa ku, ne egkehimu he edsuhulan a, iyan, geina te intelaan kedì te Megbevayà tenged te sulug̵uen e zin dà ne kinahanglan he edtumanen ku tenged dà te insarig din heini kediey.

2 Kurintu 11:23

Netuenan ku he henduen a te ebuneg̵en kayi te menge lalag ku, iyan, kenà egkesabpeng is bèbè ku kayi te egkeg̵iyen ku. Egkeg̵iyen dan he menge sulug̵uen sikandan ni Kristu. Siak, lavew e pa he metinumanen he sulug̵uen ni Kristu. Utew memereg̵en is ebpeveelan din kediey. Lelayun ad egkepirisu ne sikandan, kenà layun. Lelayun ad ebug̵ela te menge etew he kuntada te Megbevayà, kenà te sikandan. Mezakel en is nengeeg̵iyan ku he edhimetayan a pezem, kenà te sikandan.

2 Kurintu 3:3

Su iring is kedtuu niw te surat he ibpesavut dutun he hustu is ulaula zey. Ne iyan mibaal kayi te surat si Kristu su midsug̵ù key zin diyan wey kew meketuu. Ne zeyzey heini is surat su wazà isurat pinaag̵i te kintà ne wazà daan isurat diyà te menge edsuratan he vatu iring te kesug̵uan he imbilinbilin ni Moises, kekenà, pinaag̵i te Wag̵as he Mulin-ulin insurat te Megbevayà diyà te g̵ehinawa niw te menge etew.

2 Kurintu 3:6

Su iyan sikandin ebeg̵ey kenami te ketau wey zey ikepenurù is beg̵u he paag̵i he midtukud din te kebpekidsevaha zin te menusiyà. Ne wazà heini is beg̵u he paag̵i iveg̵ey pinaag̵i te insurat he kesug̵uan, kekenà, imbeg̵ey zin heini kenitew pinaag̵i te Wag̵as he Mulin-ulin. Su emun iyan ta edserig̵an is kedtumana ta te kesug̵uan, ne kemetayen he wazà pidtemanan is ebperetengen ta. Iyan, ke ibeg̵ey kenitew is Wag̵as he Mulin-ulin ne untung he wazà pidtemanan is ebperetengen ta.

2 Kurintu 4:1

Nehizuwan key te Megbevayà ne midtezù key zin wey zey metuman is ebpeveelan din kenami mehitenged te kedsengyawa te veg̵u he paag̵i ne tenged dutun kenà egkeawà is gustu zey te kedtumana kayi.

2 Kurintu 4:5

Kenà iyan dey ibpenurù su wey key mevantug te menge etew, kekenà, iyan dey ibpenurù su wey mevantug si Jesu Kristu he iyan Nengazen te langun. Sikami, edtevangan dey en sikiyu su wey zey metuman is sug̵ù ni Jesus.

2 Kurintu 4:7

Ne sikami, iring key zà te kuzen he ziniyun he neteg̵uan te utew mahal. Ne pinaag̵i kayi egkesavut te menge etew he is utew zekelà he gehem he egemiten dey te utew meg̵uyà is lawa, ne in-ulin kenami te Megbevayà ne kenà dini ebpuun te kenami.

2 Kurintu 5:18

Iyan midhimu kayi is Megbevayà su pinaag̵i ki Kristu midhimu kiw zin he menge emig̵u zin. Ne mibpeveelan din daan kenami is kedhimuwa te zuma he etew he meemig̵u zin.

2 Kurintu 6:1

Ne g̵eina te nehimu key en he menge timbang te Megbevayà, edhengyuan dey sikiyu he himuwa niw he mebpulus is gag̵ew zin keniyu.

2 Kurintu 6:4

Ne umba ebpurungan dey is ulaula zey su wey zey ikepaahà he menge sulug̵uen key te Megbevayà te minsan hengkey he paag̵i. Ne tenged kayi ed-antus key te minsan hengkey he kemereg̵enan, kemeresayan, wey menge samuk.

Ipisu 3:7

Nehimu a he sulug̵uen te Megbevayà te kedsengyawa te Meupiya he Tudtulanen. Tenged dà te g̵ag̵ew zin kediey wey pinaag̵i te g̵ehem din imbeg̵ey zin kediey heini is ketengdanan.

Kulusas 1:23

Iyan, kinahanglan he kenè niw engkezi is kedtuu te tutuu he tuluuwen, kekenà, lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen. Heini is nekag̵i he Meupiya he Tudtulanen, ne insangyew ziyà te menge etew ziyà te minsan hendei. Siak si Pablo, midsug̵ù a wey ku ikesangyew is Meupiya he Tudtulanen.

Kulusas 1:25

Nehimu a he sulug̵uen wey a meketavang te menge tumutuu. Ne umba mibpilì a te Megbevayà su wey ku sikiyu metevangi is menge etew he kenà Hudiyu ne wey ku ikepurung ikepenudtul is Lalag te Megbevayà.

1 Timoteo 1:12

Ebpeselematan ku is Nengazen tew he si Jesu Kristu su mibeg̵ayan e zin te zesen wey ku metuman heini is ebpeveelan din kedì. Mid-isip e zin he metinumanen ne tenged kayi intezù e zin he sulug̵uen din.

1 Pedro 4:10

Is minsan hengkey he ketau he imbeg̵ey te Megbevayà diyà te kada sevaha keniyu, kinahanglan he g̵emita zin wey metevangi is menge zuma zin he tumutuu su wey hustu is kegemita niw te minsan hengkey he intavang keniyu te Megbevayà.