1 Kurintu 3:3 - Manobo Western Bukidnon

³ su kemulu kew pa ebeyveyaan te keniyu zà he suat. Su zuen kun duma keniyu he egkesina ne zuen duma pa he ebpekidtebek, ne tenged kayi henduen be te ebeyveyaan kew pa te suat niw iring te menge etew he wazè pa medtuu ki Jesus.

1 Kurintu 3:3 Кръстосани препратки

Ruma 13:13

Ed-ul-ulahan tew is hustu su iyan heini ulaula he zait te menge etew he neteyawan te Megbevayà. Kenè ki en edtampu te ketig̵uman te ebpemelelangut ne kenè ta egkevuten is kenè ta esawa. Kenè ki ebpekid-eg̵et wey kenè ki egkesina.

1 Kurintu 1:10

Menge suled ku tenged te kedtuu, duen idhangyù ku keniyu pinaag̵i te kebayàbayà kenitew te Nengazen tew he si Jesus; iyan is: kinahanglan he kenè kew mevahinbahin, kekenà, uyun-uyun kew su wey mesevaha is isip niw wey g̵ehinawa niw.

1 Kurintu 1:11

Umba egkeg̵iyen ku heini, menge suled, su zuen menge zuma ni Keluwi he midtudtul kedì he egkengetebektebek kew ziyan.

1 Kurintu 11:18

Nezineg ku he emun edtig̵um kew egkengevahinbahin kew ziyan ne ebpekunkuntedehè kew. Ne malu a kayi ebpeketuu.

1 Kurintu 3:4

Ke zuen duma niw he egkag̵i he sumusundan ku sikandin ne ke zuen pa sevaha he egkag̵i he sumusundan mulà sikandin ni Epulus, utew keladu he kemulu kew pa iring te menge etew he wazà medtuu.

2 Kurintu 12:20

Egkesamuk is gehinawa ku su kela ke zutun te kebpekeuma ku ziyan ne iyan ku egkeahà diyan te keniyu is menge ulaula he kenè ku egkesuatan. Ne emun iyan haazà ne zuen ed-ul-ulahan ku zutun he kenè niw zaan egkesuatan su kinahanglan he edsewayen ku is keniyu he ulaula. Su kela ke zuen ebpekigkuntada ziyan te menge zuma zin, kela ke zuen egkesina, duen petuluy egkepauk, wey leg̵ezen, kela ke zuen diyan ebpenemperasà wey edsulà te zuma zin, kela ke zuen bereituk. Kela ke zuen diyan te keniyu gelbuwen, wey kela ke wazè niw kebpekid-uyun te menge tumutuu.

Gelasya 5:15

Iyan, emun iyan niw zà ed-ul-ulahan is kebpepespesipelehey wey kebpeeg-eg̵età, ne egkepurung egkezeeti is upakat niw te menge tumutuu ki Kristu.

Tito 3:3

Su sikita zaan is tumutuu, engey ki zengan wey mesinupaken ki te Megbevayà su wazè ta meturedu is tutuu he ibayà. Nengeuripen ki te menge mezaat he kebayà te lawa ta wey te menge kelipey he kenà meupiya. Neteg̵eb dengan is isip ta te kelelalung wey kesina. Nepeukan ki te menge etew ne nepeukan ta zaan sikandan.

Santiago 3:16

Ke zuen menge etew he egkesina wey mepelevawen, utew zan egkesemuki ne ed-ul-ulahan dan is minsan hengkey he mezaat.

1 Pedro 4:2

Ne tenged kayi, puun dutun taman te kebpatey zin egkehimu he kenè din en human edtumanen is mezaat he kebayà te lawa zin, kekenà, iyan din edtumanen is egkesuatan te Megbevayà.