1 Kurintu 15:3 - Manobo Western Bukidnon

³ Ne lavew kayi te langun he impesavut ku keniyu, haazà is impenurù daan kediey. Ne iyan is: si Kristu, mibpehimatey su wey kiw melibri te silut mehitenged te menge salè tew sumalà is impesavut dengan te insurat he Lalag te Megbevayà.

1 Kurintu 15:3 Кръстосани препратки

Mateo 26:24

Siak is Kakey te Menusiyà, ebpatey a sumalà te netagnà duen te insurat he Lalag te Megbevayà, iyan, kehizu utew zuen te etew he ed-akal kedì. Meupiya pa ziyà te kandin ke wazè en sikandin ianak.”

Mateo 26:28

Su lengesa ku heini he ibpetig̵is wey mepelisi is mezakel he menge etew wey mepesaylu is menge salè dan. Tuus heini te paag̵i te kegkelibri he midtukud te Megbevayà.

Lucas 24:25

Ne zutun migkag̵i si Jesus diyà te kandan te, “Kurang kew pe bes te ked-isip. Maan is utew mereg̵en diyan te keniyu is kebpeketuu niw te langun he netagnà dengan te menge ebpemeneuven te Megbevayà?

Juan 1:29

Hein mid-ilis he andew zutun, naahà ni Juan si Jesus he edhendiyà te kandin, ne ke si Juan diyà te menge etew, “Iyan heini sikan is etew he egngezanan te ibpemuhat he Nati he Kerehidu he ibeg̵ey te Megbevayà su pinaag̵i kandin egkeawà is menge memezaat he ulaula te menusiyà.

Nengeulaula 17:2

Ne zutun midsimba si Pablo zuma te menge Hudiyu su iyan betasan din. Ne kada Sebadu seled te tetelu he simana mibpekidibati sikandin te menge etew, ne impesavut din kandan is tagnà he insurat diyà te libru he Lalag te Megbevayà he is hadì he mibpilì te Megbevayà, imbanglis kandin kes kedresaya wey kes kedhimetayi kandin ne emun egkeiwas haazà ebenhawen sikandin te Megbevayà. Ne ke si Pablo te, “Heini is etew he egngezanan ki Jesus, iyan en sikan is hadì he mibpilì te Megbevayà.”

Nengeulaula 3:18

Impesavut dengan te Megbevayà pinaag̵i te tagnà te ebpemeneuven din he edresayen te menge etew is mibpilì din he ibpahadì. Ne midhimu zin he metuman heini pinaag̵i te mid-ulaula niw.

Nengeulaula 8:32

Iyan ebesahan dutun te upisyal is insurat ni Esaias dengan he edhenduen te, “Iring sikandin te vuutan he kerehidu he migkuwa zan su edhimetayan. Ne wazà migkag̵i zin su iring sikandin te nati he kerehidu he kenà ed-erang ke ed-elutan.

Ruma 3:25

Midsug̵ù sikandin te Megbevayà wey mehimu sikandin he pemuhat he elili kenitew, ne tenged te kegkepelisi kenitew te lengesa zin ebpeseyluwen te Megbevayà is menge salè tew emun edtuuwan tew sikandin. Midhimu heini te Megbevayà su wey tew mesavut he metazeng is hukum din, minsan pa zengan tenged te meinentusen sikandin, wazè din dè pa siluti is menge etew tenged te menge salè dan.

Ruma 4:25

Iyan si Jesus kes midsug̵ù te Megbevayà wey mebpehimatey te silut tenged te menge kedsupak tew. Ne zutun mibanhew sikandin te Megbevayà wey mehimu he metazeng is ked-isipa kenitew te Megbevayà he iring te wazè kiw keenu mekeulaula te mezaat.

1 Kurintu 11:2

Duen ed-ul-ulahan niw he layun ku egkeg̵iya he utew meupiya he iyan is: wazè a keniyu melipati ne is impenurù ku keniyu ne edtumanen niw layun.

1 Kurintu 11:23

Umba egkeg̵iyen ku heini su is impenurù kediey te Nengazen, ne iyan daan impenurù ku diyan te keniyu. Iyan is: dutun te kezukileman te ked-ekali te Nengazen tew he si Jesus, hein edlavung dan, ne migkuwa ni Jesus is supas,

2 Kurintu 5:21

Wazà minsan hengkey he mezaat he ulaula ni Kristu, iyan, midhimu te Megbevayà he iyan sikandin midsilutan tenged te salè tew su wey pinaag̵i te kebpekidsevaha tew kandin, egkehimu he ed-isipen kiw he metazeng te Megbevayà.

Gelasya 1:12

su wazà keg̵iya kediey te minsan hentei he etew ne wazà daan ipenurù kediey te etew, kekenà, impinted kediey ni Jesu Kristu.

Gelasya 1:4

Si Kristu, imbelavag din is untung din su wey mepalis is menge salè tew su wey kiw melibri, ne kenè tew meiringi is menge etew he ed-ulaula te mezaat te g̵untaan he timpu kayi te kelibutan. Umba mibeelan heini ni Kristu su edtumanen din is egkesuatan te Amey tew he Megbevayà.

Gelasya 3:13

Minsan pa te nesupak te en is kesug̵uan, nelibri ki ni Jesus te silut su midrewakan en si Jesus he elili kenitew zutun te kedrensanga kandin te krus, su zuen insurat he Lalag te Megbevayà he edhenduen te, “Ke zuen etew he edhimetayan ne idtaud te impasek he kayu ne tuus heini te rawak kandin te Megbevayà.”

Ipisu 1:7

Su tenged te utew zekelà is gag̵ew zin kenitew, midlibri kiw zin te silut pinaag̵i te kedtig̵is te lengesa zutun te kebpehimatey ni Kristu, ne mibpesaylu zin is menge salè tew.

Ipisu 5:2

Kinahanglan he ipeehè niw layun he mahal ziyà te g̵ehinawa niw is menge zuma niw iring te mahal kiw ziyà te g̵ehinawa ni Kristu. Mibpehimatey sikandin he elili kenitew wey kiw zin melibri. Nehimu heini he pemuhat he utew mehemut, he ke và dà egkeg̵iya, utew egkesuati te Megbevayà.

Hibriyuhanen 5:1

Su ke zuen etew he ebpilien he lavew he memumuhat, idsarig kandin is ked-etuvang te Megbevayà ne iyan sikandin datù te menge etew. Ne idsarig daan kandin is menge ibeg̵ey ziyà te Megbevayà wey is kebpemuhat wey mepelisi is menge etew te menge mezaat he ulaula.

Hibriyuhanen 5:3

Ne tenged te zuen daan kandin he menge sayep, kinahanglan he zuen ibpemuhat din tenged te kandin he menge mezaat he ulaula iring te zuen daan ibpemuhat din tenged te menge mezaat he ulaula te menge zuma zin he etew.

1 Pedro 1:11

Mid-istudyuwan dan ke keenu wey ke egkemenumenu is kegketuman kayi, su in-ulin heini kandan te Wag̵as he Mulin-ulin he ebpuun diyà te ki Kristu. Impesavut din kandan he zuen menge kemeresayan he egkeantus ni Kristu zini te kelibutan ne emun egketapus haazà edhimuwen sikandin he utew lavew.

1 Pedro 2:24

Iyan si Kristu midsilutan tenged te menge salè tew zutun te kedrensanga kandin diyà te krus. Umba iyan sikandin midsilutan su wey tew meengkezi is menge mezaat he ulaula ne wey tew iyan meulaula is metazeng. Is menge palì din dutun, ne iyan nekevawì kenitew.

1 Pedro 3:18

Kesevaha zà is kebpehimatey ni Kristu wey mepesaylu is menge salè tew. Mibpehimatey su wey mehimu sikandin is metazeng he elili tew te kenà memetazeng wey kiw mehimu he menge g̵aked te Megbevayà. Nepatey is lawa zin, iyan, nevanhew sikandin

1 Juan 2:2

Iyan sikandin impemuhat tenged kenitew wey mepalis is menge salè tew, ne kenè kenitew zà he salà is egkepalis, kekenà, is menge salà daan te tivuuk he menusiyà.