1 Kurintu 15:27 - Manobo Western Bukidnon

²⁷ Su zuen insurat he Lalag te Megbevayà he edhenduen te, “Is Megbevayà, ebpehedian din ki Kristu is minsan hengkey.” Ne egketuenan ta he haazà is egkeg̵iyen he “minsan hengkey,” ne wazà iragkes is Megbevayà dutun te minsan hengkey he edhedian ni Kristu.

1 Kurintu 15:27 Кръстосани препратки

Mateo 11:27

Ne mid-uman megkag̵i si Jesus diyà te menge etew te, “Is minsan hengkey, insarig kediey te Amey ku he Megbevayà. Wazà nesayud kedì te Anak te Megbevayà, kekenà, iyan dà is Amey ku he Megbevayà. Ne wazà daan nesayud te Amey ku he Megbevayà, kekenà, iyan e zà is Anak din wey sikan is menge etew he mibpengelinteuwan ku he mesayud dan kandin.

Mateo 28:18

Ne mid-uvayan sikandan ni Jesus, ne ke sikandin te, “Imbeg̵ey kedì is ke g̵ehem te kebayàbayà diyà te langit wey zini te tanà.

Juan 13:3

Ne si Jesus, netuenan din he insarig kandin te Amey zin is kebayàbayà te langun. Netuenan din daan he ziyà sikandin ebpuun te Megbevayà ne ziyà daan sikandin ed-ulì.

Juan 3:35

Utew mahal ziyà te g̵ehinawa te Amey tew he Megbevayà is Anak din, ne insarig din kandin is kebayàbayà te langun.

Ipisu 1:20

he migamit te Megbevayà dutun te kebenhawa zin ki Kristu wey is kebpepinuuwa zin kandin diyà te egkekewanan din diyà te langit.

Ipisu 1:22

Ne is Megbevayà, midhimu zin he sakup ni Kristu is minsan hengkey he linimbag. Umba midhimu zin si Kristu he egalen te minsan hengkey su wey kiw metevangi is langun he menge tumutuu.

Hibriyuhanen 1:13

Wazà belinsug̵uen te Megbevayà he migkeg̵iyan din te, “Dini ke zè pa pinuu te egkekewanan ku taman te kenè ku pa ibpeluhud diyà te kenikew is menge kuntada nu.”

Hibriyuhanen 10:12

Iyan, si Kristu mulà, kesevaha zà sikandin mebpemuhat, ne naawà dutun is menge salè tew ne kenè en heini kinahanglan he ed-umanan pa maan te minsan keenu. Ne tuus te netapus din en heini is terebahu zin su mibpinuu sikandin diyà te lavew he pinuuwà te egkekewanan te Megbevayà su edhadì.

Hibriyuhanen 2:8

Ne migkag̵i nu zaan he kinahanglan he keuzemà edhimuwen nu he mekevayàbayà sikandin te minsan hengkey.” Iyan haazà insurat dengan. Ne g̵eina te migkag̵i zutun he edhimuwen te Megbevayà is menusiyà he ebayàbayà te minsan hengkey, egkesavut ta zutun he zuen timpu keuzemà he wazà minsan hengkey he linimbag he kenà egkeveyveyaan te menusiyà. Ne g̵untaan netuenan ta he kenè pa ebpekevayàbayà is menusiyà te iring dutun.

1 Pedro 3:22

Diyà si Jesus med-ulì te langit ne g̵untaan diyà sikandin ebpimpinuu te zapit te egkekewanan te Megbevayà tuus te utew lavew sikandin. Iyan sikandin ebayàbayà te langun he menge velinsug̵uen te Megbevayà wey te menge kedesenan wey te minsan hentei ziyà te langit he zuen din gehem.

Impezayag 1:18

Iyan a kes Megbevayà he wazè din kemetayen. Mibpehimatey a ne g̵untaan kenà ad maan ebpatey te minsan keenu. Iyan a ebayàbayà te menge minatey, ne zuen ku zaan keg̵ehem diyà te Iveyaan.