1 Kurintu 14:6 - Manobo Western Bukidnon

⁶ Ne penenglitan, menge suled, ke ebpekeuma a ziyan ne iyan dà egkeg̵iyen ku keniyu is pinaag̵i zà te kineg̵iyan he kenè niw egketuenan, hengkey is pulus din? Deyzey ke idseysey ku keniyu is impesavut kedì te Megbevayà ne emun kenà haazà, ne kinahanglan he zuen ibpenurù ku keniyu he tuluuwen wey ke penurù be he impesavut kedì, ne human duen pulus te egkeg̵iyen ku.

1 Kurintu 14:6 Кръстосани препратки

Mateo 11:25

Ne zutun mid-ampù si Jesus he egkag̵i te, “Amey ku he Nengazen te langit wey tanà, dekelà is kebpeselemati ku kenikew su is in-eles nu wey kenà mesavut te menge uluwanen wey uvag en memetau, impesavut nu en diyà te menge etew he wazè dan menge hanew.

Mateo 16:17

Ne migkag̵i si Jesus te, “Simon, anak ni Juan, midtuvazan ka te Megbevayà su wazè nu metueni heini pinaag̵i te etew, kekenà, impinted kenikew te Amey ku he ziyà te langit.

Mateo 16:26

Minsan ke maangken pa te etew is tivuuk he kelibutan, wazà pulus diyà te kandin ke kenà sikandin egkeveg̵ayan te untung he wazà pidtemanan, su wazà minsan hengkey he azen he igkeliwè din wey zin maangken is untung he wazà pidtemanan.

Nengeulaula 2:42

Ne te kada andew ebpemineg dan te ibpenurù kandan te menge epustul. Mibpekid-upakat dan te langun he menge tumutuu ne mibeelan dan te tedeman is kebpatey ni Jesus pinaag̵i te kegkaan te supas ne layun dan ed-ampù.

Ruma 15:14

Menge suled, netuenan ku en he layun meupiya is menge ulaula niw, ne netuenan ku zaan he nepurung niw en mesavut is Lalag te Megbevayà, ne egkehimu en he ebpekepenurù kew te zuma.

Ruma 16:17

Menge suled, edhengyuen ku keniyu he mebantey kew, ne likayi niw is menge etew he edsamuk te kebpekidsevaha niw wey kedtuu niw te menge tumutuu su edsupaken dan is tutuu he tuluuwen he impenurù keniyu.

Ruma 6:17

Dengan iring te nengeuripen kew te mezaat he kebayà, iyan, guntaan utew zekelà is kebpeselemati ku te Megbevayà su mibpurungan niw te edtuman is tutuu he tuluuwen he impenurù keniyu.

1 Kurintu 10:33

Siak, ebpen-ahaan ku layun is paag̵i su wey meketavang te minsan hentei is menge ulaula ku. Kenè ku iyan ebpen-ahaan is kediey he igkezeyzey, kekenà, iyan is igkezeyzey te langun he menge zuma he etew. Umba ebeelan ku heini su wey meketuu sikandan ne melibri sikandan te silut.

1 Kurintu 14:1

Umba, menge suled, kinahanglan he iyan niw ipehuna ziyà te g̵ehinawa niw is kebmahala niw te menge zuma niw. Ne meupiya zaan ke ebuyuen niw is menge ketau he ibeg̵ey te Wag̵as he Mulin-ulin, lavew en is kedseysaya te impesavut te Megbevayà.

1 Kurintu 14:7

Su penenglitan, is menge belvelayen he edag̵ing, ke zuen ebpemulala wey ke ebpengutiyapì be, iyan, kenè din egketuenan is ked-epad, ne kenà egkesavut te menge zuma ke hengkey is in-epad din.

2 Kurintu 11:6

su minsan ke kenà a metau he egkag̵i netuenan ku mulà ke hengkey is tutuu he tuluuwen. Ne iyan heini impesavut dey keniyu zengan te minsan keenu he timpu wey te minsan hengkey he paag̵i.

2 Kurintu 12:1

Minsan pa te wazà pulus te kedantal ku, edantal e zed gihapun. Ne g̵untaan egkeg̵iyen ku keniyu is impezayag wey is impaahà kedì te Nengazen.

2 Kurintu 12:7

Mibeg̵ayan a te Megbevayà te utew merasey he zaru su wey ku kenà ikezantal is utew meupiya he nengeehè ku ziyà te langit. Ne heini is daru, ne egemiten ni Setanas he idrasey kedì, ne pinaag̵i kayi kenà a ebpekepelavew.

Ipisu 1:17

Is Megbevayà te Nengazen tew he si Jesu Kristu he iyan daan Amey tew he zait he ebentug̵en, edhengyuan ku layun sikandin he pinaag̵i te Wag̵as he Mulin-ulin, ne iveg̵ey zin keniyu is ketau wey ipeg̵awag̵awa zin keniyu is kegketueni niw te menge ulaula zin.

Ipisu 3:4

Ne emun ebesahan niw heini, egketuenan niw is nesavut ku mehitenged te in-eles dengan mehitenged ki Kristu.

Pilipus 3:15

Ne is langun te sikitew he meg̵urang en te kedtuu, kinahanglan he iring kayi zaan is isip tew wey g̵ehinawa tew. Iyan, emun kenè kew egkengeuyun ibpetuenan keniyu te Megbevayà is benar.

2 Timoteo 2:14

Keg̵iyi nu is menge tumutuu he kenè dan melipati heini is langun. Iyan nu itelaan kandan he ibpetistig̵us is Megbevayà he likayi zan is kebpekidlawan he winalì mehitenged te kehulug̵an te menge lalag su wazè din pulus ne ebpekezezaat te kedtuu te ebpekezineg duen.

2 Timoteo 3:10

Ne sikew mulà, Timoteo, nepurung nu en metueni is langun he impenurù ku, is menge vetasan ku wey is egkesuatan ku he meulaula ku. Netuenan nu zaan is kedtuu ku te Megbevayà, is kebmepelevayen ku, is kebmahala ku te minsan hentei, wey is ked-antus ku te kemereg̵enan.

2 Timoteo 3:16

Impinted te Megbevayà is kedsurata te langun he insurat he menge lalag din, ne zekelà is tavang kenita kayi te lalag emun ebpenurù ki, emun edawey ki, wey ke edsambag ki te menge tumutuu wey emun ibpenurù ta is metazeng he ulaula.

2 Timoteo 4:2

Ne tenged kayi iyan idtelaan ku kenikew is: ipesavut nu is Lalag te Megbevayà. Kinahanglan he layun ka andam te kebpesevuta te lalag din te minsan keenu he timpu ke zuen egkesuat he ebpemineg wey ke wazà. Dewaya nu is menge etew, sembag̵i nu he med-iniyug dan te mezaat he ulaula. Hengyui nu sikandan. Kinahanglan he layun ka mepelevayen is ebpenurù kandan.

Tito 3:8

Utew tutuu heini is impesavut ku kenikew. Egkesuatan ku he ipurung nu ipenurù heini ziyan su utew hustu wey zekelà is pulus kayi ziyà te minsan hentei. Ne emun nesavut en heini te menge tumutuu te Megbevayà iyan dekelà diyà te g̵ehinawa zan is ked-ul-ulaha zan te meupiya.

Hibriyuhanen 13:9

Umba, kenè niw tuuwi is menge selakew he tuluuwen he kenà iyan kes tutuu he impenurù keniyu. Iyan hustu he ibmelig-en te kedtuu tew is kedtevangi kenitew te Megbevayà, ne kenà iyan is kedlikayi te menge egkeenen he indawey te kesug̵uan su wazà heini ikezeyzey te menge etew he ebantey kayi.

2 Pedro 1:5

Ne g̵eina te iyan heini intavang din kenitew kinahanglan he edhimuwen ta is taman te egkehimu ta su wey meheg̵eti is kedtuu ta kandin te menge meupiya he ulaula. Ne is menge meupiya he ulaula, kinahanglan he edheg̵etan ta te kegkesevuta te hustu.

2 Pedro 3:18

Kinahanglan he pinaag̵i te kegkeg̵eg̵awi keniyu te Nengazen tew wey Menluluwas tew he si Jesu Kristu, med-iseg is kedsevuta niw te ibpesavut din. Berakat he iyan sikandin edelig̵en guntaan wey te wazà pidtemanan.

2 Juan 1:9

Ke zuen etew he ed-engkezan din is tutuu he tuluuwen he impenurù ni Kristu su iyan edhemenan din is tarù he tuluuwen he in-uman din dutun, wazà sikandin mebpekidsevaha te Megbevayà. Is minsan hentei mulà he edhemenan din is tutuu he tuluuwen, iyan sikandin mibpekidsevaha te Amey tew he Megbevayà wey is Anak din.