1 Kurintu 14:3 - Manobo Western Bukidnon

³ Iyan, ke zuen etew he edseysayen din is impesavut kandin te Megbevayà, menge zuma zin mulà is egkelelag̵an din ne ebpeketavang heini su egkeheg̵et is kedtuu zan, ne egkesembag̵an sikandan, wey egkelig-enan is kebpekeantus dan te mereg̵en.

1 Kurintu 14:3 Кръстосани препратки

Lucas 3:18

Ne sevaha he andew zutun hein neketapus is langun he menge etew he ebpemebewtismu, mibpebewtismu zaan si Jesus diyà te ki Juan. Ne zutun mid-ampù si Jesus ne te kemulu pa sikandin ed-ampù nepuwasan is langit ne midlugtanà diyà te kandin is Wag̵as he Mulin-ulin he henduen te merepatik. Ne nezineg dutun is Megbevayà he egkag̵i ziyà te langit he ke sikandin te, “Minahal ku sikew he Anak ku. Utew ku en sikew igkelipey.” Utew pa mezakel is impenurù ni Juan dutun te menge etew su ibpesavut din kandan is Meupiya he Tudtulanen. Migkag̵i ni Juan diyà te menge etew he mezaat is ulaula ni Gubirnedur Hirudis su mid-ag̵ew zin is ipag din he si Hirudyas he esawa te hazi zin he si Felipe. Ne kenà iyan dà mezaat he ulaula ni Hirudis haazà is nekag̵i ni Juan su mezakel pa zutun is utew memezaat he vaal zin. Ne kenà dutun dà taman te memezaat he ulaula zin he mibeelan din, kekenà, impepirisu zin pa si Juan.

Nengeulaula 13:15

Ne zuen mibasa ziyà te insurat he kesug̵uan wey ziyà te menge surat te ebpemeneuven dengan. Ne hein neipus haazà, mibpeinsaan ensi Pablo te menge egalen dutun te simbahan te, “Menge suled, ke zuen niw ibpesavut he ibmelig-en te kedtuu kayi te nengetig̵um he etew, ebpemineg̵en dey.”

Nengeulaula 14:22

Ne impesavut dan te menge tumutuu zutun is ibmezesen te kedtuu zan. Migkag̵i zan kandan he kinahanglan he kenè dan engkezi is kedtuu zan ki Jesus. Ke sikandan te, “Sikita is tumutuu, wey ki zà egkehedii te Megbevayà ke egkeantus ta is mezakel he kemereg̵enan.”

Nengeulaula 15:32

Ne si Hudas wey si Silas, ebpeneuven sikandan te Megbevayà, ne neug̵et is kebpekidlalag dan te menge tumutuu su midsembag̵an dan su wey meheg̵et is kezesen te kedtuu zan.

Nengeulaula 4:36

Ne zuen duma zan he tigSipru he Hudiyu zaan he kevuwazan duen te tipehuna he si Levi. Iyan ngazan din si Jose ne migeraran te menge epustul ki Bernabe he ke và dà egkeg̵iya, ebpekeveg̵ey te kezesen te kedtuu.

Nengeulaula 9:31

Ne zutun mibmelinew is kebpekesavuk te langun he menge tumutuu ki Jesus diyà te prubinsya he Hudiya, wey Semarya wey Geliliya. Neheg̵et is kedtuu zan ne tenged te layun dan ibpehuna is kedtahud dan te Nengazen wey tenged te kedtavang kandan te Wag̵as he Mulin-ulin mid-iseg dan mebmezakel.

Ruma 12:8

Ne emun iyan imbeg̵ey kenita is ketau te kedheg̵eta te kedtuu te menge zuma ta ne iyan heini ed-ul-ulahan ta. Ne emun iyan imbeg̵ey kenita is ketulanged ta te kedtavang te menge etew he egkengeayuayu, ne kinahanglan he edtulanged ki te kedtavang kandan. Ne emun iyan imbeg̵ey kenita is kedumelaha te menge tumutuu ne kinahanglan he ebpurungan ta is kedumala ta. Ne emun iyan imbeg̵ey kenita is kedtavang te menge etew he edlised ne kinahanglan he kenà pinaag̵i te ked-usur is ked-ul-ulaha ta kayi.

Ruma 14:19

Umba ebpurungan ta is menge ulaula ta su wey kenà maawà is melinawen he kebpekidepitè ta te menge zuma ta ne wey zaan meheg̵et is kedtuu te kada sevaha kenitew.

Ruma 15:2

kekenà, iyan ta ebpen-ahaan is igkesuat te zuma ta su wey meheg̵et is kedtuu zin.

1 Kurintu 10:23

Egkehimu, kun, he ed-ul-ulahan tew is minsan hengkey he meupiya. Ne venar iyan heeyan. Iyan, bahin kediey, iyan egkekag̵i ku is: mezakel is kenà meupiya he ed-ul-ulahan su kenà ebpeketavang. Minsan pa te egkehimu he ed-ul-ulahan tew is minsan hengkey, mezakel is ed-ul-ulahan he kenà ebpekeheg̵et te kedtuu te menge zuma tew.

1 Kurintu 14:12

Ne sikiyu, menge suled, geina te egkesuatan niw he meveg̵ayi kew te menge ketau he ibeg̵ey te Wag̵as he Mulin-ulin, kinahanglan he iyan niw vuyua is menge ketau he ebpekeheg̵et te kedtuu te langun niw te menge tumutuu.

1 Kurintu 14:17

Minsan ke utew meupiya haazà is migkag̵i niw he kebpeselamati te Megbevayà, kenà ebpeketavang te kedtuu zutun te etew.

1 Kurintu 14:26

Umba, menge suled, ke edtig̵um kew, iyan heini meupiya he ed-ul-ulahan. Meupiya ke zuen sevaha he andam te kegkanta te kedalig te Megbevayà, ne is sevaha, ebpenurù, ne is sevaha, idseysey zin is impesavut kandin te Megbevayà, ne zuen sevaha he egkag̵i te kineg̵iyan he kenè din egketuenan, ne zuen daan sevaha he edluwas kayi. Ne minsan hengkey he ed-ul-ulahan niw zutun ne kinahanglan he ebpekeheg̵et te kedtuu te menge tumutuu.

1 Kurintu 14:31

Egkehimu he egkag̵i kew is langun, asal, kenè kew mebperedredseey ne zutun egkepenurù wey egkesembag̵an is langun.

1 Kurintu 8:1

Ne mehitenged te insè niw ke idtug̵ut be kenitew te menge tumutuu ke egkeenen tew is usa he impemuhat diyà te menge tarù he ed-ezapen, netuenan tew te langun he heini is menge tarù he ed-ezapen ne wazè dan gehem kenitew. Ne minsan ke netuenan ta he wazà gehem dan kenita, egkehimu he ebpegalbu ki tenged kayi te netuenan ta emun wazà heini metueni te menge zuma ta. Umba egkeg̵iyen ku heini su kenè ki ebpeketavang te menge zuma ta pinaag̵i zà te netuenan ta, kekenà, pinaag̵i te g̵ag̵ew ta kandan.

2 Kurintu 1:4

Edtevangan kiw zin te langun he menge seeng tew ne tenged kayi ebpeketavang kiw zaan te zuma he etew he zuen din minsan hengkey he seeng. Is idtavang tew kayi, ne iyan ded is intavang kenitew te Megbevayà.

2 Kurintu 2:7

Ne g̵untaan kinahanglan he peseyluwa niw sikandin. Sembag̵i niw su kela ke maawà is kedsarig din te Megbevayà te utew subra he kegkeseeng din.

Ipisu 4:29

Kinahanglan he kenà ebpekezezaat is kebpemèbè niw, kekenà, iyan keg̵iya niw is menge lalag he ebpekeveg̵ey he tavang te kedtuu te menge zuma niw su wey zekelà is pulus diyà te ebpemineg sumalà is egkinehenglanen dan.

Ipisu 6:22

Umba edsug̵uen ku sikandin diyan su wey niw metueni ke hengkey is kebpekesavuk dey zini su wey meheg̵et is kebpekesarig niw te Megbevayà.

Kulusas 4:8

Edsug̵uen ku sikandin diyan te keniyu su wey niw metueni ke hengkey is kebpekesavuk dey ne wey zaan maawà is ebpekesamuk te g̵ehinawa niw tenged kenami.

1 Tiselunika 2:11

Netuenan niw he is mid-ulaula zey ziyà te kada sevaha keniyu, ne meupiya su iring te ed-ul-ulahan te amey ziyà te menge anak din.

1 Tiselunika 2:3

Is kedwali zey ziyà te menge etew, ne kenà ebpuun te sayep wey te meremerik he tuyù. Kenè key edtarùtarù te minsan hentei.

1 Tiselunika 3:2

Ne zutun midsug̵ù dey ziyan si Timoteo he suled tew wey sulug̵uen daan te Megbevayà te kegkesengyawa te Meupiya he Tudtulanen mehitenged ki Kristu. Iyan insug̵ua zey kandin su wey zin meheg̵eti is kedtuu niw ne wey kew zin mesembag̵i

1 Tiselunika 4:1

Ne g̵untaan, menge suled, tenged te kegkesevaha tew te Nengazen tew he si Jesus, duen ebuyuen dey wey edhengyuen dey ziyan te keniyu. Impenurù dey keniyu is ed-ul-ulahan he egkesuatan te Megbevayà, ne mid-ulaula niw en. Iyan, edhengyuen dey keniyu he ipeiseg niw pa is ked-ul-ulaha niw kayi.

1 Tiselunika 4:18

Umba ipedlilipayè niw heini is egkeg̵iyen ku.

2 Tiselunika 3:12

Tenged te keg̵ehem te Nengazen tew he si Jesu Kristu, idsug̵ù dey wey idhangyù dey kandan he kinahanglan he medterebahu zan ne kenè dan medsamuk su wey zan meketig̵ayun te igkeuyag dan.

1 Timoteo 1:4

wey med-engked dan te ked-istudyu te menge sayep he menge g̵ug̵ud, wey te menge melug̵ayad he g̵ug̵ud te kepuun te menge etew. Su emun iyan heini ed-istudyuwan dan ebpekidlewanè dan dà ke hengkey is hustu. Kenà egkehimu he pinaag̵i kayi egketuenan ta is ibpesavut te Megbevayà pinaag̵i te kedtuu.

1 Timoteo 4:13

Taman te kenè e pa ebpekeuma ziyan, iyan beeli nu is: besaha nu is Lalag te Megbevayà diyà te menge etew. Sembag̵i nu wey penurua nu sikandan.

1 Timoteo 6:2

Ke tumutuu ki Kristu is egalen, kinahanglan he kenà maawà is kedtahud kandin te sulug̵uen din he tumutuu tenged te telesuled dan pinaag̵i ki Kristu. Kinahanglan he tuwas pa he meupiya is baal te sulug̵uen din tenged te tumutuu wey minahal te Megbevayà sikan is egketevangan dan pinaag̵i te vaal zan. Iyan heini ipenurù nu wey ipesavut nu ziyà te menge tumutuu.

2 Timoteo 4:2

Ne tenged kayi iyan idtelaan ku kenikew is: ipesavut nu is Lalag te Megbevayà. Kinahanglan he layun ka andam te kebpesevuta te lalag din te minsan keenu he timpu ke zuen egkesuat he ebpemineg wey ke wazà. Dewaya nu is menge etew, sembag̵i nu he med-iniyug dan te mezaat he ulaula. Hengyui nu sikandan. Kinahanglan he layun ka mepelevayen is ebpenurù kandan.

Tito 1:9

Kinahanglan he zutun te kebpenurù din, kenè din suwayi is tutuu he tuluuwen he iyan impenurù ta. Su emun iyan ibpenurù din is tutuu he tuluuwen, egkeheg̵et is kedtuu te ebpememineg kandin ne igkepesavut din he utew nengesayep is edsumpalit te penurù din.

Tito 2:15

Ne heini is langun he migkag̵i ku, ipenurù nu ziyà te menge etew ziyan. Gemita nu is keg̵ehem nu te kebayàbayà kandan. Sembag̵i nu wey dewaya nu sikandan. Kinahanglan he kenè ka lulupig̵an te minsan hentei.

Tito 2:6

Ne iring din daan dutun is penurù nu ziyà te menge menguhed he maama. Kinahanglan he ipenurù nu kandan he purungi zan tengkai is menge ulaula zan.

Tito 2:9

Penurua nu is menge tumutuu he sulug̵uen he pemineg̵a zan is sug̵ù te menge egalen dan su wey ikesuat te menge egalen is menge vaal zan. Kinahanglan he kenè dan medsukul,

Hibriyuhanen 10:25

Kenè tew ed-engkezan is kedtig̵um tew te ked-azap te Megbevayà; kenè tew ed-iringan is duma he menge tumutuu he mid-engkezan dan en is kedsimba, kekenà, edtig̵um kiw su wey kiw mekepesemsembag̵à. Utew heini kinahanglan, lavew en emun egketuusan ta he meg̵aan en is kedlikù te Nengazen tew he si Jesus.

Hibriyuhanen 13:22

Menge suled, edhengyuan ku sikiyu he entusa niw is kebpemineg kayi te langun he menge lalag ku keniyu su kenà utew melug̵ayad heini is insurat ku.

Hibriyuhanen 3:13

Ne g̵untaan te kemulu pa egkehimu he egkekuwa is keluwasan he imbeg̵ey kenitew te Megbevayà, kinahanglan he ebpesemsembag̵è kiw su wey kiw kenà melimbungi pinaag̵i te salà he iyan is kenà kedtuu ne wey kenà mebmezesen is gehinawa tew.

1 Pedro 5:12

Mid-ug̵upan a ni Silvanu te edsurat kayi. Suled tew sikandin he utew egkeserig̵i. Iyan insurati ku keniyu kayi su wey ku meheg̵et is kedtuu niw. Ibpesavut ku keniyu he impenurù ku en keniyu he tutuu is gag̵ew te Megbevayà keniyu. Ne kenè niw heini lipati.

Hudas 1:20

Ne sikiyu mulà, menge minahal ku he suled, peniguduwi niw is kebpetebtevangè niw su wey meheg̵et is kedtuu niw te tuluuwen he impetuuwan kenitew te Megbevayà. Pekezesen kew ampù pinaag̵i te g̵ehem he ibeg̵ey te Wag̵as he Mulin-ulin.