1 Kurintu 14:2 - Manobo Western Bukidnon

² Ne emun duen ebpintezan te kineg̵iyan he kenè din egketuenan, iyan din egkelelag̵an is Megbevayà ne kenè din iyan egkelelag̵an is menge zuma zin he etew su kenè dan egkesavut is egkeg̵iyen din. Haazà is egkeg̵iyen din, ne in-ulin kandin te Wag̵as he Mulin-ulin, iyan, in-eles haazà su wazà ebpekesavut.

1 Kurintu 14:2 Кръстосани препратки

Mateo 13:11

Ne midtavak kandan si Jesus te, “Sikan is in-eles dengan mehitenged te kedhadì te Megbevayà, impesavut en keniyu te menge sumusundan ku, iyan, is duma he menge etew, id-eles heini kandan.

Marcos 16:17

Ne sikan is etew he edtuu kediey, duen menge singyal he egkehimu zan. Pinaag̵i te keg̵ehem te ngazan ku igkepeg̵uwè dan is menge mezaat he mulin-ulin he ebpenlalung te menge etew. Ne ebpekekag̵i sikandan te kineg̵iyan he kenè dan egketuenan.

Marcos 4:11

Ne ke si Jesus te, “Sikiyu is menge sumusundan ku, ibpesavut en keniyu te Megbevayà sikan is in-eles dengan mehitenged te kedhadì din, iyan, is menge zuma he menge etew, ibpenurù kandan pinaag̵i te menge sempità.

Nengeulaula 10:46

Su is menge Hudiyu zutun, nezineg dan haazà is menge kenà Hudiyu he ebpendalig te Megbevayà wey netekewtekew zan pintezi te menge kineg̵iyan he wazè dan dutun hanew ke hengkey haazà is egkeg̵iyen dan.

Nengeulaula 19:6

Ne zutun mibpendepenetan ni Pablo te velad din is menge purù dan, ne mid-ulinan sikandan te Wag̵as he Mulin-ulin ne netekewtekew zan mekekag̵i te menge kineg̵iyan he kenè dan egkesavut. Ne midtudtul zan is impesavut kandan te Megbevayà.

Nengeulaula 22:9

Ne is menge zuma ku, neehè dan haazà is merayag, iyan, wazè dan mesavut haazà is egkeg̵iyen diyà te kediey.

Ruma 16:25

Edelig̵en tew is Megbevayà! Pinaag̵i te Meupiya he Tudtulanen he ibpenudtul ku he iyan is mehitenged ki Jesu Kristu, wey pinaag̵i te tuluuwen he neug̵et he timpu is ked-elesa zuen te Megbevayà, egkehimu he edheg̵eten din is kedtuu niw.

1 Kurintu 12:10

Ne ziyè pa te sevaha, ibeg̵ey zaan te Wag̵as he Mulin-ulin is gehem wey mekehimu sikandin te menge egkengein-inuwan; ne ziyà te zuma pa ibeg̵ey is ketau te kedseysaya te impesavut kandin te Megbevayà; ne te zuma pa ibeg̵ey kandin is kegketueni te ed-ulin, ke ebpuun be te Megbevayà is ed-ulin wey ke mezaat he mulin-ulin ve haazà. Ne zuen daan menge etew he ebeg̵ayan te Megbevayà te ketau te kegkag̵i te kineg̵iyan he kenè dan egketuenan. Ne zuen daan menge etew he ibeg̵ey kandan is ketau te kedluwas duen te egkeg̵iyen kayi.

1 Kurintu 12:28

Ne is tivuuk he menge tumutuu, mibeg̵ayan te Megbevayà is kada sevaha te kenà ebpeked-iiring-iring he ebpeveelan din. Iyan aney he vaal zin is: mibpilì din is menge etew he midhimu zin he menge epustul. Ikezuwa, imbeg̵ey zin diyà te zuma is ketau te kedseysey te impesavut te Megbevayà. Iketelu, ne mibeg̵ayan din is duma he menge etew te ketau te kebpenurù te lalag din, ne mibeg̵ayan din is duma te g̵ehem te kebpekehimu te egkein-inuwan. Ne is duma pa ne mibeg̵ayan din te g̵ehem te kebewii te menge egkengezeruwan. Ne mibeg̵ayan din daan is duma te ketau te kedtevangi zan te menge zuma zan. Ne is duma pa, ne mibeg̵ayan din te ketau te ked-uwita zan te menge tumutuu. Ne is duma pa, mibeg̵ayan din te ketau te kegkag̵i te kineg̵iyan he kenè dan egkesavut.

1 Kurintu 13:1

Minsan ke ebeg̵ayan a te ketau te kegkag̵i te menge kineg̵iyan dini te kelibutan wey minsan is kineg̵iyan te menge velinsug̵uen diyà te langit, ne kenè ku ebmahalen is menge zuma ku, wazà pulus din su iring dà haazà is kegkag̵i ku te zag̵ing te ag̵ung etawa kulingtangan.

1 Kurintu 13:2

Ne penenglitan ke ebeg̵ayan a te ketau te kedseysey te impesavut kedì te Megbevayà, ne egkesavut ku is minsan hengkey he kenà egkesavut te zuma wey is minsan hengkey he mezalem, ne minsan ke utew mezesen is kedtuu ku ne egkehimu he egkepengelinteuwan ku he mekehalin is buntud ne segugunà edhalin, iyan, ke kenà mahal zini te g̵ehinawa ku is menge zuma ku, ne wazè ku g̵ihapun pulus.

1 Kurintu 14:16

Ne penenglitan ke edalig kew te Megbevayà he ed-ulinan kew te Wag̵as he Mulin-ulin, iyan, kenà egkesavut haazà is egkeg̵iyen niw, is etew he sikan pa edsimba, kenà sikandin ebpekepeg̵umbenar zutun te egkeg̵iyen niw su kenè din egkesavut.

1 Kurintu 14:26

Umba, menge suled, ke edtig̵um kew, iyan heini meupiya he ed-ul-ulahan. Meupiya ke zuen sevaha he andam te kegkanta te kedalig te Megbevayà, ne is sevaha, ebpenurù, ne is sevaha, idseysey zin is impesavut kandin te Megbevayà, ne zuen sevaha he egkag̵i te kineg̵iyan he kenè din egketuenan, ne zuen daan sevaha he edluwas kayi. Ne minsan hengkey he ed-ul-ulahan niw zutun ne kinahanglan he ebpekeheg̵et te kedtuu te menge tumutuu.

1 Kurintu 15:51

Pemineg̵a niw heini is daan he in-eles he impesavut kediey te Megbevayà. Duen duma kenitew te menge tumutuu he kenà ebpatey, asal, sikitew is langun, segugunà egkehalin is lawa tew.

1 Kurintu 2:10

Ne heini is in-eles din dengan, impesavut din en kenitew pinaag̵i te Wag̵as he Mulin-ulin. Su is Wag̵as he Mulin-ulin, egketuenan din is minsan hengkey, minsan is utew mezalem he in-eles he menge isip te Megbevayà.

1 Kurintu 2:7

Heini is ketau he egkeg̵iyen ku, ne iyan kes in-eles he edhimuwen te Megbevayà he wazà metueni zengan te menusiyà. Dengan dà te wazè pa limbag̵a is minsan hengkey, daan he mid-isip te Megbevayà heini is edhimuwen din su wey kiw tulusa.

Ipisu 6:19

Ne iampù a zaan keniyu he iveg̵ey kediey te Megbevayà is ketau te kebpenudtul te lalag din. Ne iampù niw zaan he kenà a mahandek, kekenà, iveg̵ey kediey is hustu he egkeg̵iyen wey ku ikepesavut is Meupiya he Tudtulanen he in-eles dengan.

Kulusas 2:2

Iyan idhag̵ù ku su wey melig-eni is kedtuu niw te Megbevayà pinaag̵i te kegkeupakat niw wey pinaag̵i te kebmahala niw te uman sevaha keniyu. Egkesuatan ku he meheg̵et is kegkesavut niw te impenurù keniyu he iyan kes impezayag te Megbevayà keniyu mehitenged ki Kristu.

1 Timoteo 3:16

Ne netuenan tew te langun he lavew pa te langun is imbugnà he tuluuwen he midtuuwan tew. Mibpeetew si Kristu; midtistig̵usan te Wag̵as he Mulin-ulin he metazeng sikandin; naahà sikandin te menge velinsug̵uen te Megbevayà; insangyew sikandin diyà te menge etew he kenà menge Hudiyu; duen menge tumutuu kandin dini te tivuuk he kelibutan; midtulus sikandin pehendiyà te langit.

1 Timoteo 3:9

Kinahanglan he edhemenan dan te edtuu he kenà duwazuwa is menge tuluuwen he imbugnà kenitew te Megbevayà.

Impezayag 10:7

Ne emun edhiyupen dutun te ikepitu he velinsug̵uen is budyung din, ne human dutun ed-ul-ulaha te Megbevayà is tuyù he in-eles din sumalà is migkag̵i zin dengan diyà te menge ebpeneuven din he menge sulug̵uen din.”