1 Kurintu 13:13 - Manobo Western Bukidnon

¹³ Na, duen tetelu he ebpeveelan kenita he kenà egkeawà. Kinahanglan he edtuuwan ta is Megbevayà, kinahanglan daan he layun ta ebperetenga is kegketuman te impenaad kenita te Megbevayà, ne kinahanglan daan he ebmahalen ta is menge zuma ta. Ne is lavew he meupiya kayi te tetelu, ne iyan is kebmahala ta te menge zuma ta.

1 Kurintu 13:13 Кръстосани препратки

Lucas 10:27

Ne midtavak haazà is etew te, “Is Megbevayà he Nengazen tew, kinahanglan he iyan tew sikandin ebmahalen dini te g̵ehinawa tew. Iyan sikandin mahal zini te g̵ehinawa tew, isip tew, kedsavut tew, wey tivuuk he ulaula tew. Ne kinahanglan daan he ebpurungan tew is duma tew; ed-isipen tew sikandin he iring en te kenitew he g̵ehinawa.”

Lucas 22:32

Iyan, in-ampù ku sikew, Simon, diyà te Megbevayà he kenà maawà is kedtuu nu kediey. Ne emun melig-en en is kedtuu nu kediey ne himuwa nu he mebmelig-en daan is kedtuu te menge zuma nu.”

Ruma 15:13

Is Megbevayà he iyan puunà te langun he meupiya he ebpeebuten tew, berakat he veg̵ayi kew zin te utew zekelà he kelipey wey melinawen he kebpekesavuk tenged te kedtuu niw kandin su wey pinaag̵i te g̵ehem te Wag̵as he Mulin-ulin meheg̵et is kebpeebuta niw te langun he meupiya he egkezawat niw keuzemà.

1 Kurintu 14:1

Umba, menge suled, kinahanglan he iyan niw ipehuna ziyà te g̵ehinawa niw is kebmahala niw te menge zuma niw. Ne meupiya zaan ke ebuyuen niw is menge ketau he ibeg̵ey te Wag̵as he Mulin-ulin, lavew en is kedseysaya te impesavut te Megbevayà.

1 Kurintu 16:14

Ne minsan hengkey is ebeelan niw, layun niw ipaahà is kebmahala niw te menge zuma niw.

1 Kurintu 3:14

Ne ke zuen etew he wazà maawà is kandin he vaal ne edsuhulan sikandin te Megbevayà.

1 Kurintu 8:1

Ne mehitenged te insè niw ke idtug̵ut be kenitew te menge tumutuu ke egkeenen tew is usa he impemuhat diyà te menge tarù he ed-ezapen, netuenan tew te langun he heini is menge tarù he ed-ezapen ne wazè dan gehem kenitew. Ne minsan ke netuenan ta he wazà gehem dan kenita, egkehimu he ebpegalbu ki tenged kayi te netuenan ta emun wazà heini metueni te menge zuma ta. Umba egkeg̵iyen ku heini su kenè ki ebpeketavang te menge zuma ta pinaag̵i zà te netuenan ta, kekenà, pinaag̵i te g̵ag̵ew ta kandan.

1 Kurintu 8:3

Ne haazà mulà is etew he mahal ziyà te gehinawa zin is Megbevayà, iyan sikandin kes migkag̵i te Megbevayà he g̵aked din.

2 Kurintu 5:10

Su is minsan hentei kenitew, kinahanglan he ziyà ed-etuvang keuzemà te ki Kristu su edsusiyen din is menge ulaula tew su wey mezawat te kada sevaha kenitew is suhul he zait te langun he mid-ulaula zin dini te kelibutan ke meupiya ve wey ke wazè din menge pulus.

2 Kurintu 5:15

Minatey sikandin he elili te tivuuk he menusiyà su wey sikandan is menge etew he uuyag pa, kenè dan en maan med-ulaula te kandan he egkesuatan, kekenà, med-tuman dan en te egkesuatan ni Kristu he iyan midhimetayan wey nevanhew su wey melibri sikandan te silut.

Gelasya 5:6

Su emun tumutuu ki en ki Jesu Kristu, neked-iiring kiw en diyà te Megbevayà is nengesirkunsidar wey is wazà mesirkunsidar. Iyan dà duen din pulus diyà te Megbevayà is kedtuu ta kandin he egketuusan heini pinaag̵i te g̵ag̵ew ta te zuma ta.

Pilipus 1:9

Ne id-ampù ku he med-iseg is kebpepurpurungè niw, is kegketueni niw te menge ulaula te Megbevayà, wey is ketau niw te ked-isip

Kulusas 1:27

su egkesuatan din he sikitew is menge g̵aked din, ne egkesayud kiw ke hengkey is utew lavew he meupiya he edhimuwen din diyà te langun he menge etew. Ibpesayud din en kenitew he edlumunan kiw ni Kristu ne tenged kayi egketuenan tew he edtulusen kiw keuzemà.

Kulusas 1:5

Umba mezesen is kedtuu niw wey zekelà is gag̵ew niw su kenà egkeawà is perateng niw te langun diyà te langit he integ̵ana keniyu te Megbevayà. Nezineg niw heini zutun te kebpesevuta keniyu te tutuu he penurù he iyan is Meupiya he Tudtulanen.

Kulusas 3:14

Kinahanglan he mahal ziyà te g̵ehinawa te kada sevaha is minsan hentei he zuma zin. Iyan heini lavew te langun he sambag ku keniyu su emun egketuman niw heini egkehimu niw zaan is langun kayi te menge meupiya he ulaula.

1 Tiselunika 1:3

Su emun ed-ampù key te Megbevayà he Amey tew kenè dey egkelipatan is kedtuu niw, wey is kebmahala niw, wey is kebperateng niw te Nengazen tew he si Jesu Kristu. Su egketuusan is kedtuu niw kandin pinaag̵i te ulaula niw, ne pinaag̵i te kedhag̵ù niw egketuusan daan is kebmahala niw kandin diyà te g̵ehinawa niw. Ne egketuusan daan is kebperateng niw kandin pinaag̵i te kebmeinentusen niw.

1 Tiselunika 5:8

Iyan, sikitew mulà is nesakup te maandew, kinahanglan he ed-eg̵enen tew is menge mezaat he suat tew. Idsun-ud tew is limbutung he iyan is kedtuu tew te Megbevayà wey is kebmahala tew zini te g̵ehinawa tew te menge zuma tew. Ne iring te kalù tew te sundaru is kedhemeni tew te kebperateng tew te kedlibriya te Megbevayà kenitew te silut.

1 Timoteo 1:5

Ne kinahanglan he iyan ketezengan ke maan is idsug̵ù nu kandan heini su wey zan mahala is menge zuma zan diyà te g̵ehinawa zan. Ne kenà egkehimu he hustu is kebmahala ta te menge zuma ta emun wazè ki melumpiyuwi te Megbevayà duen te menge salè ta. Kinahanglan he iyan dà ed-ul-ulahan ta is netuenan ta he hustu ne kinahanglan daan he tutuu is kedtuu ta te tutuu he tuluuwen ne zutun human hustu is kebmahala ta te menge zuma ta.

2 Timoteo 1:7

Su is Mulin-ulin he impeulin kenita te Megbevayà, kenè ta igketalew, kekenà, edlig-enan ki zin wey ebeg̵ayan ki zin te zesen su wey mehimu he ebmahalen ta is menge zuma ta wey edtengkaan ta is langun he ed-ul-ulahan ta.

Hibriyuhanen 10:35

Umba, menge suled, kenè niw engkezi is kedsarig niw su emun meheg̵et is kedsarig niw te Megbevayà, egkezawat niw is suhul zin he utew meupiya.

Hibriyuhanen 10:39

Iyan, sikitew, menge suled, kenè kiw iring te menge etew he edsuwey ne edsilutan sikandan te Megbevayà su mezesen mulà is kedtuu tew ne pinaag̵i kayi nelibri kiw en te silut.

Hibriyuhanen 6:11

Ne is kada sevaha keniyu, egkesuatan dey he kenè niw zaan engkezi is kedhag̵ù niw taman te kedlikù ni Jesus dutun te ketepusan he timpu keuzemà su wey zutun metuman diyan te keniyu is langun he meupiya he ebpeebuten tew.

Hibriyuhanen 6:19

Ne utew mezesen wey nelig-enan heini is kebpeebuta tew he edtumanen te Megbevayà is penaad din su iyan edserig̵an tew is Megbevayà. Ne si Jesus, ne nehimu en sikandin he zatù tew ne ziyè en sikandin te etuvangan te Megbevayà. Ne nehimu en si Jesus he lavew he memumuhat tew he wazè din pidtemanan he iring te memumuhat dengan he si Milkisidik.

1 Pedro 1:21

Pinaag̵i kandin neketuu kiw te Megbevayà. Mibanhew sikandin te Megbevayà ne midhimu zin sikandin he utew lavew. Ne tenged kayi iyan edserig̵an tew g̵untaan is Megbevayà ne ebpekeperateng kiw he edhimuwen kiw zin daan he utew lavew.

1 Juan 2:10

Is etew mulà he ebmahalen din is duma zin, iyan sikandin kes edteyawan is isip din te Megbevayà, ne kenè din ibpekesalà is menge ulaula zin.

1 Juan 2:14

Sikiyu is menge vatà, ebpesuratan ku sikiyu su menge emig̵u kew en te Amey tew he Megbevayà. Iyan ibpesurati ku keniyu te menge meg̵urang is: tenged te emig̵u kew en ni Kristu. Daan en sikandin te wazè pa limbag̵a is minsan hengkey. Iyan ibpesurati ku keniyu te menge menguhed su mevig̵er en is kedtuu niw ne kenà egkeawà diyan te isip niw is Lalag te Megbevayà, wey nezaag niw en si Setanas.

1 Juan 2:24

Is tuluuwen he impenurù keniyu hein aney kew medtuu, kinahanglan he edhemenan niw su emun edhemenan niw kenà egkehimu he kenè kew layun egkesevaha te Amey tew he Megbevayà wey te Anak din he si Jesu Kristu.

1 Juan 3:3

Is minsan hentei he ebperateng te kedlikù ni Kristu, layun din ebpurungi is menge ulaula zin su wey wazà mezaat iring te wazà daan mezaat he ulaula ni Kristu.

1 Juan 3:9

Is minsan hentei he nehimu en he anak te Megbevayà, kenè en sikandin egkesuat he ed-ulaula te mezaat su midsempù en man te Megbevayà. Geina te iyan Amey zin is Megbevayà kenà egkehimu he layun sikandin ed-ulaula te mezaat.