1 Kurintu 12:27 - Manobo Western Bukidnon

²⁷ Iyan kehulug̵an kayi te langun is: sikitew is menge tumutuu, ne menge parti kiw te lawa ni Kristu.

1 Kurintu 12:27 Кръстосани препратки

Ruma 12:5

Ne iring din ded daan, sikitew is menge tumutuu ki Kristu, ne nehimu kiw he iring te lawa zin, ne iyan kiw menge parti zutun. Neubpu is kada sevaha he parti te menge zuma zin he parti.

1 Kurintu 10:17

Ne g̵eina te sevaha zà is supas he iyan si Kristu, minsan pa ke mezakel kiw, nesevaha kiw g̵ihapun su pudu kiw ebpekekaan dutun te sevaha he supas.

1 Kurintu 12:12

Ne minsan pa te kenà ed-iiring-iring is ketau he imbeg̵ey kenitew te kada sevaha, nesevaha kiw g̵ihapun su iring kiw te sevaha zà he lawa ni Kristu he mezakel is menge parti zin.

1 Kurintu 12:26

Ne ke egkezeruwan is sengeparti te lawa ta ne egkesekitan is tivuuk he lawa ta. Ne iring din ded daan ke ebpurungan is sengeparti ne igkezeyzey te tivuuk he lawa ta.

1 Kurintu 6:15

Netuenan niw ve he heini is menge lawa tew te menge tumutuu, ne parti te lawa ni Kristu. Ne tenged kayi kenà egkehimu he egemiten ta is parti te lawa ni Kristu te kedhuliza te vahi he meremerik is ulaula zin.

Ipisu 1:23

Sikitew is edsarig ki Kristu, ne iring kiw te lawa zin ne iyan sikandin ulu tew. Ne sikitew is lawa zin, ne wazà kurang te ked-ulini zin kenitew su ziyà sikandin te minsan hendei te tivuuk he kelimbag̵an.

Ipisu 4:12

Umba imbeg̵ey zin heini is menge ketau su wey kiw mehimani ne wey tew meulaula is ebpeveelan kenitew te Megbevayà ne wey melig-eni is kedtuu tew te menge tumutuu he iyan lawa ni Kristu.

Ipisu 5:23

Su is maama, duen din keg̵ehem te kebayàbayà te esawa zin, iring te si Kristu, duen keg̵ehem din te kebayàbayà kenitew te langun he menge tumutuu he iyan lawa zin. Midlibri kiw zin te silut is lawa zin.

Ipisu 5:30

Ne iyan kiw is menge tumutuu, lawa ni Kristu.

Kulusas 1:18

Wey tenged te iyan sikandin ebayàbayà te lawa zin, he ke và dà egkeg̵iya, is langun he menge tumutuu kandin, wey tenged daan te iyan sikandin ebeg̵ey te untung diyà te langun he menge tumutuu su iyan sikandin lavew te langun he egkengevanhew ne tenged kayi iyan sikandin lavew te minsan hengkey.

Kulusas 1:24

Maambe ke ebpekeantus a g̵untaan te merasey su iyan igkezeyzey niw. Igkelipey ku heini su iring te kegkerasey ni Kristu edhimesazan ku en is langun he mereg̵en he ibpaantus din kediey su wey mezeyzey is lawa ni Kristu, he ke và dà egkeg̵iya, is menge tumutuu kandin.

Kulusas 2:19

Ne wazè dan en upakat ki Kristu he iyan ed-uwit kenitew. Iyan si Kristu puunà te zesen te kedtuu tew ne pinaag̵i kandin ed-iseg is kezesen te upakat tew te langun he tumutuu sumalà is egkesuatan te Megbevayà, iring te lawa tew, ne ed-iseg daan is desen din ne kenè ebpekedsusuwey pinaag̵i te kegkevagkes kayi zutun te menge ug̵at din.