1 Kurintu 10:6 - Manobo Western Bukidnon

⁶ Umba nehitavù diyà te kandan heini is langun su wey kiw meleg̵uyi ke hengkey is egkehitavù kenitew ke egkesuatan tew te ed-ulaula is iring te mid-ulaula zan he mezaat.

1 Kurintu 10:6 Кръстосани препратки

Ruma 5:14

Ne minsan pa zutun, puun pa te timpu ni Adan taman te timpu he zutun imbeg̵ey en is kesug̵uan diyà te ki Moises, egketuusan he zuen mezaat he ulaula te menge etew su mibpematey g̵ihapun is langun he menge etew. Is ulaula zan he mezaat, ne kenà iring dutun te mid-ulaula ni Adan su midsupak din is sug̵ù te Megbevayà, iyan, sikandan mulà, wazè pa kesug̵uan he egkesupak dan. Ne si Adan, nehimu sikandin he alung te etew he ebpekeuma he iyan si Kristu.

1 Kurintu 10:11

Umba neulaula heini is langun su wey metueni te langun he kenà iyan haazà ulaula he egkesuatan te Megbevayà. Ne insurat daan heini su wey ikepenurù kenitew he edsilutan te Megbevayà is ed-ulaula te iring kayi. Su sikitew, meg̵aan tew en egkeumahi is kegketuman te langun he nengetagnà dengan.

Hibriyuhanen 4:11

Umba, sikitew zaan, ebeelan tew is taman te egkehimu tew wey kiw zaan mekeseled dutun te edhimelayan he midteg̵ana te Megbevayà. Kenè tew ed-iringan haazà is menge etew zengan he wazà mebpemineg te Lalag te Megbevayà su wey wazà minsan sevaha kenitew he kenà ebmehimuwen he mekeseled dutun te edhimelayan.

Hibriyuhanen 9:24

Dutun te kebpemuhat ni Kristu, wazè sikandin medseled diyà te utew mahal he rug̵u te simbahan he zini te kelibutan su alung dà heini te tutuu he simbahan he ziyà te langit. Iyan midselezan din kes tutuu he simbahan he ziyà te langit ne g̵untaan iyan sikandin datù tew he edtavang kenitew ziyà te etuvangan te Megbevayà.

1 Pedro 3:21

Ne iyan teg̵ialung kayi te wahig is kebewtismu he ebpekelibri kenitew te silut. Ne haazà is kebewtismu, ne kenà iyan is kedlumpiyuwi te lawa tew ziyà te wahig, kekenà, iyan is kedhengyui tew te Megbevayà he maawè din is menge salè tew. Egkehimu heini tenged te mibanhew zin si Jesu Kristu.

2 Pedro 2:6

Elin daan midsilutan dengan te Megbevayà is menge etew ziyà te menge inged he Suduma wey Gumura. Iyan dà meg̵inged dutun he midlibri zin ensi Lut su metazeng mulà si Lut. Nerasey si Lut he ed-isip-isip te meremerik he ulaula te menge mesinupaken he zuma zin. Andew-andew utew mezaat he ulaula is egkengezineg din wey egkengeehè din ne zutun utew mibmesakit is gehinawa zin. Ne tenged dutun te utew menge lalung mibinsulan te Megbevayà is inged dan su wey mesavut te minsan hentei ke hengkey is kedsiluti zin keuzemà dutun te menge etew he kenà ebpemineg te menge sug̵ù din.

Hudas 1:7

Isipa niw zaan is menge meg̵inged dutun te menge inged he Suduma wey Gumura wey is menge inged he uvey zutun. Neiringan dan haazà is menge velinsug̵uen su utew subra is mezaat he menge ulaula zan. Is menge maama zutun, ne kenà iyan dà is menge vahi midhilevetan dan, kekenà, neked-eerig̵è dan is pudu menge maama ne tenged dutun midsilutan sikandan te hapuy ne nehimu haazà he petizaan te Megbevayà te langun keuzemà he edsilutan din te hapuy he kenà egkeevukan.